မဲခေါင်၊ မေ ၂၉

တာချီလိတ် ဟောင်လိတ်အုပ်စု လွယ်ယွန်းခမ်းစေတီအနီး ဧက ၄၀ လောက်ရှိတဲ့ ဧရိယာအတွင်း ခရိုင်အုပ်ချုပ်ရေးကို လာဘ်ငွေပေး တောင်မြေဖြိုပြီး ရောင်းစားနေတယ်လို့ ဒေသခံတွေဆီက သိရပါတယ်။

မြို့အတွင်း ခြံမြေဖို့လိုအပ်နေတဲ့ မြေတွေကို အာဏာပိုင်တွေနဲ့ပေါင်းပြီး မြို့ပြင်တောင်တွေကိုဖြိုကာ တစ်စီးကို ဘတ် ၅၀၀ မှ ၈၀၀ အတွင်း သယ်ယူရောင်းချနေတာဖြစ်ပါတယ်။

တောင်တွေကို မြေဖြိုဖို့အတွက် ဧက ၂၀ ကျော်အကျယ်အဝန်းရှိတဲ့ မြေဧရိယာအတွင်း တာချီလိတ်ခရိုင်အုပ်ချုပ်ရေးမှူး ဦးမင်းကို ကို ဘတ်(၄)သန်းကျော်လာဘ်ထိုးပြီး မြေရောင်းစားတဲ့အလုပ်ကို လုပ်နေတာလို့ သိရပါတယ်။

“မြို့ထဲ မြေသယ်တာကို တရားဝင်သယ်ခွင့်မရှိဘူး၊ အရင်ကတော့ ဖမ်းတာစီးတာကြားရတယ်။ အခုကတော့ အာဏာပိုင်တွေနဲ့ ဘယ်လိုပေါင်းပြီး လုပ်နေလဲတော့မသိဘူး။ ပိုက်ဆံမပေးဘဲနဲ့တော့ ဒီလုပ်ငန်းလုပ်လို့မရဘူး။ ဘတ်သန်းချီပေးရတယ်တော့ကြားတယ်။ မြေဖို့၊ မြေသယ်တာတွေ တွေ့နေရာတာပဲ။ မြို့ပြင်မှာဆိုရင် ကားကြီး ကားငယ်တွေအပြည့်ပဲ၊ အရင်က တစ်စီးကို ဘတ် ၁၅၀၀ လောက်ထိ ဈေးတက်ဖူးတယ်။ အခု ဘတ် ၅၀၀ ကျော်နဲ့ မြေဖို့လို့ရနေတာပဲ” လို့ မဲခေါင်သတင်းဌာနရဲ့ သတင်းရင်းမြစ်တစ်ဦးက ပြောပါတယ်။

တောင်မြေဖြိုပြီး မြေရောင်းစားနေတဲ့နေရာမှာ လွယ်ယွန်းခမ်းစေတီအနီး ရွေမဟာမဲခေါင် Gas အရောင်းဆိုင်အနောက်ဘက်က တောင်မြေကွက်အကျယ်ကြီးအတွင်း မြေတူးစက်တွေနဲ့ တူးဖေါ်ကာ လုပ်ကိုင်နေတာဖြစ်တယ်လို့ သိရပါတယ်။

တာချီလိတ်မြို့တွင်း လယ်မြေများ မြေကွက်ရိုက်ရောင်းချနေတဲ့အတွက် ပြည်ထောင်စုအဆင့်အစိုးရက ခြံကွက်အတွင်းမြေဖို့ခွင့်ကို ပိတ်ပင်ထားတာဖြစ်ပြီး အခုမြေရောင်းစားနေမှုမှာ တရားမဝင် လာဘ်ငွေပေးပြီး မြေသယ်ယူရောင်းချနေတာဖြစ်တယ်လို့သိပါတယ်။

မြေသယ်ကားတွေ မြို့တွင်း အဖုံးအကာမရှိဘဲ သွားလာနေတာကြောင့် လမ်းတစ်လျှောက်မြေကြီးတွေကျပြီး မြို့တွင်း သာယာလှပမှုမရှိဘဲ ဖုန်တွေရွံတွေနဲ့ ဒေသခံတွေအတွက် စိတ်အနှောက်အယှက်ဖြစ်နေရတယ်လို့လည်း သိရပါတယ်။

“မြေကားတွေက တအားမောင်းတာ၊ တစ်လမ်းလုံးဖုန်တွေချည်းပဲ။ စည်းကမ်းလည်း မရှိကြဘူး။ မြေကားလာရင် ဝေးဝေးက ရှောင်နေရတယ်” လို့ ဒေသခံတစ်ဦးက ပြောပါတယ်။

လွယ်ယွန်းခန်းအနီး မြေတောင်မှ ကားတစ်စီးကို ဘတ် ၈၀၀ ခန့်လောက်နဲ့ နေ့စဉ် ကားအစီးရေ ထောင်ချီ မြို့တွင်း သယ်ယူရောင်းချနေတာ ဖြစ်ပါတယ်။

တာချီလိတ်မြို့အတွင်း လယ်ယာ၊ ဥယာဉ်မြေများကို အခြေားမြေအသုံးပြုခွင့် လျောက်ထားခြင်းမရှိဘဲ လူနေအိမ်၊ မြေကွက်ဖေါ်ထုတ် ရောင်းချနေမှုကို လုံးဝလုပ်ဆောင်ခြင်းမပြုရန် ၂၀၂၀ ခုနှစ်ကတည်းက ဌာနဆိုင်ရာအဆင့်ဆင့် ကြပ်မတ်ရန် ပြည်ထောင်စုအဆင့် အစိုးရက ညွှန်ကြားချက်ထုတ်ထားတယ်လို့ သိရပါတယ်။

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)