မဲခေါင်၊ ဖေဖော်ဝါရီ ၂၀
မြန်မာနိုင်ငံမှာ စစ်ကောင်စီက စစ်မှုမထမ်းမနေရ ဥပဒေကို ပြဌာန်းလိုက်ပြီးနောက် ထိုင်းနိုင်ငံကို လူငယ်များစွာ စုပြုံဝင်ရောက်လာဖို့ ရှိနေခြင်းအတွက် ပူပန်မှုအခြေအနေကို မေးမြန်းရာ ထိုင်းဝန်ကြီးချုပ် ဆရတ်သာ သာဗီဆင်းက တရားဝင် လာရောက်မယ့် မြန်မာတွေကို ကြိုဆိုမှာဖြစ်ပေမယ့် တရားမဝင် ဝင်ရောက်လာသူတွေ ကိုတော့ ဥပဒေအရ အရေးယူသွားရမှာပဲလို့ ရှင်းလင်းပြောကြားသွားပါတယ်။
ထိုင်းနိုင်ငံမှာ လက်ရှိ အလုပ်လက်မဲ့ရာခိုင်နှုန်းဟာ ၁ ရာခိုင်နှုန်းအောက်သာရှိသေးတဲ့အတွက် ပြည်တွင်း လုပ်သားလိုအပ်ချက်များစွာရှိနေသေးလို့ ထိုင်းတွေရဲ့ အလုပ်အကိုင်အခွင့်အလမ်းတွေကို မြန်မာတွေကသာ ရယူပြီးအခက်တွေ့စေမှာမျိုး မရှိနိုင်ကြောင်း၊ ဒါပေမဲ့ အိမ်နီးချင်းနိုင်ငံသားတွေ ဝင်ရောက်လာရင် တရားဝင် နည်းလမ်းနဲ့သာ ဝင်ရောက်ရမှာဖြစ်ပြီး လုံခြုံရေးအေဂျင်စီတွေနဲ့ ဒီအရေး တွေ့ဆုံ ဆွေးနွေးသွားမယ် လို့လည်း ဆရတ်သာက ဆိုပါတယ်။
သမ်မာဆတ်တက္ကသိုလ် ပီရီဒီဘာနိုမြောင် အင်စတီကျုအမှုဆောင်ကော်မတီဥက္ကဌ တာမာဂျိုင်က မြန်မာနိုင်ငံမှာ ထုတ်ပြန်လိုက်တဲ့ စစ်မှုထမ်းဥပဒေကြောင့် MOU နဲ့ ဝင်လာမယ့် မြန်မာနိုင်ငံသားများစွာ ထပ်တိုးလာမှာဖြစ်လို့ ဒီ MOU မူဘောင်နဲ့ အံဝင်တဲ့ လုပ်ငန်းတွေမှာ လုပ်သားလိုအပ်ချက်ကို ဖြည့်တင်းနိုင်မှာဖြစ်ပေမယ့် ဘောင်မဝင်တဲ့ တခြားသော စီးပွားရေးလုပ်ငန်းပိုင်းတွေမှာ လုပ်သားလိုအပ်ချက်တွေ ဖြစ်လာလိမ့်မယ်လို့ သုံးသပ်ပြောဆိုသွားပါတယ်။
မြန်မာနိုင်ငံ ရန်ကုန်မြို့က ထိုင်းသံရုံးမှာ နေ့စဉ် ထောင်ချီတဲ့ မြန်မာနိုင်ငံသားတွေ ဗီဇာလာလျှောက်နေကြလို့ သံရုံးက တစ်ရက် အယောက် ၄၀၀ ပဲ လက်ခံတော့မယ်လို့ ပြီးခဲ့တဲ့ ကြာသပတေးနေ့က ထုတ်ပြန်ခဲ့ပါတယ်။ ဒါအပြင် ပတ်စ်ပို့တ် ကိုင်ဆောင်ထားတဲ့ မြန်မာနိုင်ငံသားတွေဟာ ထိုင်းနိုင်ငံကို ဗီဇာမလိုဘဲ ၁၄ ရက် အလည် သွားရောက်နိုင်မယ်လို့လည်း ကြေညာခဲ့ပါတယ်။
Ref: bangkokpost
MKF-001
