ရန်ကုန်တိုင်း၊ ပန်းဘဲတန်းမြို့နယ် ၂၇ လမ်း အောက်လမ်းမှာ ဒီဇင်ဘာ ၁၂ ရက်နေ့က အသက် ၅၀ ကျော်အရွယ် အမျိုသား တစ်ဦး အသတ်ခံရမှု ဖြစ်ပွားခဲ့ပါတယ်။
အသတ်ခံရသူမှာ ပန်းဘဲတန်းမြို့နယ် ၂၇ လမ်း အောက်ဘလောက်၊ အမှတ် (၄၈) ပထမထပ်မှာ တစ်ဦးထဲ နေထိုင်သူ ဖြစ်ပြီး သံသယရှိသူကို ဖမ်းဆီးထားပြီလို့ သတင်းရင်းမြစ်က ပြောပါတယ်။
“ သတ်တဲ့လူက အဲ့ဒီအိမ်ကို အဝင်အထွက် အမြဲရှိတယ်။ သူ့အတွက် စားစရာတွေလည်း ပို့နေကြပါ။ ဖုန်းနဲ့ ပိုက်ဆံ ယူသွားလို့ ပြန်မပေးရင် ကောင်လေးရဲ့ ဆိုင်ရှင်နဲ့ တိုင်မယ်ပြောလို့ ပြောရင်း စကားများ ရန်ဖြစ်ရင်း ကောင်လေးက ပါလာတဲ့ ဓားနဲ့ လည်ပင်းကို ထိုးသတ်သွားတာ” လို့ သူကပြောပါတယ်။
လူသတ်မှု ကျူးလွန်သူလို့ ယူဆရသူ အမျိုးသားဟာ အသတ်ခံရသူရဲ့ နေအိမ်ကို ဝင်ထွက်သွားလာနေသူ ဖြစ်ပြီး သေဆုံးခဲ့သူ အမျိုးသား နေအိမ်မှ ဆမ်ဆောင်းဖုန်းနဲ့ ငွေ ၈ သိန်း ယူသွားတဲ့ ကိစ္စ စကားများ ရန်ဖြစ်ရာမှ လူသတ်မှု ဖြစ်ပွားခဲ့တာ ဖြစ်တယ်လို့ သူကပြောပါတယ်။
“ လူသတ်မှု ကျူးလွန်တဲ့ ကောင်လေးက လူယုံလို ဖြစ်နေတာ။ အဲ့မနက် ရှစ်ခွဲလောက်မှာ မုန့်ဟင်းခါး သွားပို့ရင်း စကားများ ရန်ဖြစ်ကြတာ။ ကောင်လေးက အလုပ်လုပ်တာလည်း ကြာနေပြီ။ အသင့်ပါလာတဲ့ ဓားနဲ့ လည်ပင်းကို ထိုးလိုက်တာ။ သေဆုံးသူ အိမ်မှာ ပစ္စည်းတွေ စစ်တော့လည်း ဘာမှ မပျောက်ဘူး” လို့ သူက ပြောပါတယ်။
လူသတ်မှု ကျူးလွန်ခဲ့သူလို့ သံသယရှိသူ အမျိုးသားမှာ ပုံမှန်အတိုင်း နေ့စဉ် အလုပ်ဆင်းနေပြီး ဒီကနေ့ ဒီဇင်ဘာ ၁၄ ရက် မနက် ၈ နာရီခွဲမှာ C.I.D က အရပ်ဝတ်နဲ့ အမျိုးသား ၃ ယောက်က လာရောက် ဖမ်းဆီးသွားတာ ဖြစ်တယ်လို့ ရပ်ကွက်နေ ပြည်သူ တစ်ဦးက ပြောပါတယ်။
