မဲခေါင်၊ မတ် ၄
မွန်ပြည်နယ်၊ ရေးခရိုင်၊ လမိုင်းမြို့၊ သောင်ပြင်ကျေးရွာ ကမ်းခြေမှာ သမီးရည်းစား ၂ ဦး ဆိုင်ကယ်စီးနေစဉ် အမျိုးသား ၂ ဦး ဆိုင်ကယ်နဲ့ လိုက်လာပြီး သေနတ်နဲ့ပစ်ကာ ဆိုင်ကယ်လုယူသွားတယ်လို့ သွားရောက် ကူညီပေးသူ တစ်ဦးက မဲခေါင်သတင်းကို ပြောပါတယ်။
ဒီကနေ့ မတ်လ ၄ ရက်နေ့၊ နေ့လယ် ၁၁ နာရီကျော်က သေနတ်နဲ့ အမျိုးသမီး ဖြစ်သူကို ပစ်ခတ်ပြီး ဆိုင်ကယ် လုယူသွားတာ ဖြစ်တယ်လို့ သူကပြောပါတယ်။
“ အမျိုးသမီးကို ရှေ့ကနေ သေနတ်နဲ့ ပစ်သွားတာ။ ချက်ဘေးနားကို သေနတ်မှန်ပြီး ပေါက်ထွက်သွားတယ်။ ကောင်လေးမှာ ဝတ်ထားတဲ့ ဆွဲကြိုးကိုလည်း ယူသွားတယ်။ ဖုန်းဆက်ပြီး အကူအညီတောင်းလို့ သွားကယ်တာပါ။ သူတို့ လုခံရတဲ့ နေရာက လူအသွားအလာ နည်းတယ်” လို့ ကူညီပေးခဲ့သူ တစ်ဦးက ပြောပါတယ်။
လုယက်ခံရတဲ့ အမျိုးသားမှာ အသက် ၂၃ နှစ်အရွယ်ဖြစ်ပြီး သေနတ်ပစ်ခံရသူ အမျိုးသမီးမှာ အသက် ၁၉ နှစ်ဖြစ်ကာ လမိုင်းဆေးရုံသို့ ပို့ဆောင်ပေးခဲ့ပြီးနောက် ဒဏ်ရာ မသက်သာတဲ့ အတွက် မော်လမြိုင်ဆေးရုံသို့ ထပ်မံ ပို့ဆောင်ပေးခဲ့တယ်လို့ သူကပြောပါတယ်။
သေနတ်အပစ်ခံရသူ အမျိုးသမီး ဒဏ်ရာ စိုးရိမ်ရပြီး လုယက်ခဲ့တဲ့ အမျိုးသား ၂ ယောက်ကို ရှာဖွေနေပေမယ့် ဖမ်းဆီးရမိခြင်း မရှိသေးဘူးလို့ သိရပါတယ်။
MK-005