ရန်ကုန်တိုင်း၊ လှည်းကူးမြို့နယ်၊ ဘာလားကျေးရွာအုပ်စု၊ အမှတ် (၇) လမ်းမကြီးနဲ့ ငွေနံသာကျေးရွာကြား၊ တပင်ရွှေထီး လမ်းမကြီးပေါ်မှာ အမျိုးသား ရုပ်အလောင်း ၁၃ လောင်း တွေ့ရှိခဲ့ပါတယ်။
ဒီကနေ့ ဒီဇင်ဘာ ၅ ရက် မနက် ၇ နာရီခွဲ အချိန်က အလောင်းများကို တွေ့ရှိခဲ့တာဖြစ်ပြီး သေဆုံးသူများဟာ ရိုဟင်ဂျာတွေ ဖြစ်တယ်လို့ ဒေသခံတစ်ဦးက ပြောပါတယ်။ ဒါပေမယ့် မဲခေါင် သတင်း အနေနဲ့ သီးခြား အတည်ပြုနိုင်ဖို့ ကြိုးစားနေဆဲ ဖြစ်ပါတယ်။
“ သေတဲ့ အရွယ်လေးတွေက ၁၅ နှစ်နဲ့ ၁၆ နှစ်အရွယ်လေးတွေပဲ ရှိတယ်။ ကားထဲ အောက်ဆီဂျင် ပြတ်တော့ အသက်ရှူရပ်ပြီး သေကြတာ။ ပြင်ပဒဏ်ရာ ဘာမှမရှိဘူး။ ကားပေါ်ကနေ အလောင်းတွေ ပစ်ချသွားတာ မြင်တဲ့သူတွေရှိတယ်။ ခုတော့ ရဲတွေရောက်ပြီး ရွာထဲက မြင်တဲ့သူတွေကို မေးနေတယ်” လို့ မျက်မြင်တွေ့သူ တစ်ဦးက ပြောပါတယ်။
သေဆုံးသူတွေရဲ့ အလောင်းများကို ရှာဖွေစစ်ဆေးရာမှာ ပြင်ပဒဏ်ရာ မတွေ့ရှိရဘဲ အလောင်းများ လာရောက် စွန့်ပစ်ခဲ့တဲ့ အလုံပိတ်ကား ပုံစံကို မြင်တွေ့ခဲ့တယ်လို့ ဆိုတဲ့ ရွာသားအချို့ကို စစ်ဆေးနေတယ်လို့ သူက ပြောပါတယ်။
နိုဝင်ဘာ ၁၃ ရက် ည ၇ နာရီခွဲကလည်း မင်္ဂလာဒုံမြို့နယ် ထောက်ကြန့် သင်္ဃန်းကျွန်းကြီးကျေးရွာ အမှတ် (၃) လမ်းမကြီး၊ ပုလဲလမ်းဆုံက အမှိုက်ကန် အနီးမှာ ရိုဟင်ဂျာ ၉ ဦး ဖမ်းဆီး ခံခဲ့ရပါသေးတယ်။
