ရန်ကုန်တိုင်း၊ ကမာရွတ်မြို့နယ်၊ စံရိပ်ငြိမ် ၄ လမ်းထိပ်မှာ ဒီဇင်ဘာ ၁၇ရက် ည၈နာရီ၂၀မိနစ်ဝန်းကျင်က ယာဥ်တိုက်မှုဖြစ်ပွားခဲ့ပြီး အတိုက်ခံရသူအမျိုးသမီးကြီးမှာနေရာတင် ပွဲချင်းပြီးသေဆုံးခဲ့ပါတယ်။
အရှိန်လွန်မောင်းနှင်လာတဲ့ အိမ်စီးကားတစ်စီးက လှည်းတန်းမီးပွိုင့်ဘက်ကို မောင်းနှင်လာစဥ်လမ်း ကူးနေတဲ့အမျိုးသမီးကြီးကို ဝင်တိုက်ပြီးနောက် ကားမောင်းပြီးထွက်ပြေးသွားတာဖြစ််တယ်လို့ မျက်မြင်တွေ့သူတစ်ဦးကပြောပါတယ်။
“ ကျွန်တော်က စက်ဘီးစီးပြီးလာတာ။ အမေကြီးကိုတိုက်လိုက်တော့ လေပေါ်မြောက်တက်သွားပြီး ဟိုက်ဘက်လမ်းကိုရောက်သွားတာ။ ကိုယ်လည်းဖြစ်ဖြစ်ချင်းကြောင်နေတာ။ သွားကြည့်တော့အသက်မရှူတော့ဘူး။ ဘယ်သူမှလည်းအလောင်းကိုမထိကြပါဘူး။ ဆေးရုံကားရောက်ပြီး လာသယ်တော့အသက်မရှိတော့ဘူး” လို့ သူကပြောပါတယ်။
သေဆုံးသူအမျိုးသမီးကြီးဟာ စံရိပ်ငြိမ်မှတ်တိုင်မှာ ညဘက်အိပ်တဲ့အိမ်ရာမဲ့ အမျိုးသမီးကြီးတစ်ဦးဖြစ်တယ်လို့ ရပ်ကွက်နေပြည်သူတစ်ဦးက ပြောပါတယ်။
“ အသက်ကတော့ ၆၀ဝန်းကျင်လောက်ရှိမယ်ထင်တယ်။ စံရိပ်ငြိမ်မှတ်တိုင်မှာ ညဘက်အိပ်တာတွေ့တယ်။ သနပ်ခါးလိမ်းပြီး အိပ်နေတာတောင်တွေ့ရသေးတယ်။ ကားတိုက်တော့ ကိုယ်ကဘေးက ဖြတ်သွားတာနဲ့တိုက်ဆိုင်နေတာ။ ခွေခွေလေးဖြစ်နေလို့အဖွားလို့တောင်မထင်မိဘူး။ ရပ်တောင်ကြည့်နေမိသေးတယ်” လို့ သူကပြောပါတယ်။
ယာဥ်တိုက်မှုကျူးလွန်ခဲ့သော ကားနံပါတ်ကို မျက်မြင်အချို့က မှတ်မိကြပြီး ယာဥ်တိုက်မှုကျူးလွန်ပြီး ထွက်ပြေးသွားသောကားသမားကို အမြန်ဆုံးဖမ်းမိစေချင်တယ်လို့ ရပ်ကွက်နေပြည်တွေက ပြောပါတယ်။