လက်ရှိ YBS ယာဉ်လိုင်း ၁၅ လိုင်းမှာ CCTV တွေ တပ်ဆင်ထားပြီး နောက်ထပ် ယာဉ်လိုင်း ၅ လိုင်းမှာလည်း CCTV ကင်မရာတွေ ထပ်မံ တပ်ဆင်နေတယ် ဆိုပေမယ့် ဘယ်ယာဉ်လိုင်း နံပါတ်တွေမှာ တပ်ဆင်ထားတယ် ဆိုတာကိုတော့ YRTC က တရားဝင် ထုတ်ပြန်တာ မရှိသေးဘူးလို့ သိရပါတယ်။
၆၀ ကား စီးဖူးတဲ့သူတိုင်း သိတယ်။ ဘယ်လောက် သောင်းကျန်းနေလဲ ဆိုတာ။ ၆၁ လိုင်းပေါ်မှာလည်း အဖွဲ့လိုက် နှိုက်တယ်။ ပြဿနာတက်ရင် ဆင်းချင်တဲ့နေရာ ဆင်းတာ။ ကားသမားက သူ့ပထွေးတွေ ဆင်းတော့ ရပ်ပေးတယ်။ ခရီးသည်တွေ ဆင်းချင်ရင် သူတို့ရပ်ချင်တဲ့ နေရာ ရပ်ကြတာ။ ၆ ကားနဲ့ ၃၅ ကားတွေမှာလည်း အဖွဲ့လိုက် သူခိုးတွေ အများကြီးပဲ။ ဘယ်သူမှ ဖမ်းတာ စစ်တာ တခါမှ မကြုံဘူးပါဘူး
လို့ နေ့စဉ် YBS စီးကာ ပစ္စည်းပို့နေတဲ့ ခရီးသွားပြည်သူတစ်ဦးက ပြောပါတယ်။
အခုလို CCTV ကင်မရာတွေ တပ်ဆင်တာဟာ မှုခင်းကျဆင်းရေး အတွက်လို့ ဆိုပေမယ့် စစ်ကောင်စီကို ဆန့်ကျင်နေတဲ့ လူငယ်တွေကို ဖမ်းဆီးဖို့ အတွက် ဖြစ်နိုင်တယ်လို့ ရန်ကုန်မြို့ခံတွေက သုံးသပ်ပါတယ်။
အဲ့ဒီ သူခိုး ခါးပိုက်နှိုက်နဲ့ လုတဲ့ကောင်တွေကို ဘယ်သူလွှတ်ပေးလိုက်တာလဲ။ ပြည်သူတွေ ဒုက္ခရောက်အောင် သူတို့လုပ်နေတာ။ ခုလည်း CCTV တပ်ထားတဲ့ လိုင်းနံပါတ်တော့ မကြေညာဘူး။ ဆန္ဒပြတဲ့ ကလေးတွေ လိုင်းကားပေါ်တွေမှာ စာကပ်ပြီးလုပ်လို့ ဖမ်းရလွယ်အောင် တပ်နေတာ။ ယာဉ်လိုင်း တစ်ရာကျော်ရှိရင် အကုန်လုံးမှာ တပ်လေ။ ခုလည်း လမ်းမတွေ တံတားတွေပေါ်မှာလည်း CCTV တပ်နေကြတာပဲ
လို့ ရန်ကုန်မြို့ခံတစ်ဦးက ပြောပါတယ်။
ဒီဇင်ဘာ ၂၆ ရက် မနေ့က YBS ယာဉ်လိုင်း ၁၁၆ လိုင်းမှ ယာဉ်အစီးရေ ၃၃၅၈ စီးနဲ့ ခရီးသည် ၁၃ သိန်း ၄ သောင်းကျော် ပို့ဆောင်ပေးခဲ့ပြီး စည်ကမ်းဖောက်ယာဉ် အစီးရေ ၅၈၀ ကို CNG ပိတ်သိမ်း အရေးယူထားတယ်လို့ YRTC က ဒီကနေ့ ထုတ်ပြန်ထားပါတယ်။