မဲခေါင်၊ ဖေဖော်ဝါရီ ၁၆
ကရင်အမျိုးသား အစည်းအရုံး၊ ကော်သူးလေ အုပ်ချုပ်နယ်မြေ၊ ညောင်လေးပင်ခရိုင်-ခလယ်လွီထူခရိုင် အတွင်း စစ်ကောင်စီတပ်မှ လေယာဉ်နဲ့ ဗုံးကြဲတာနဲ့ လူ့အခွင့်အရေး ချိုးဖောက်မှုတွေကြောင့် ထွက်ပြေးတိမ်းရှောင် နေရတဲ့ ကျေးရွာတွေမှာ တောမီးလောင်မှုမှတစ်ဆင့် မီးကူးပြီး နေအိမ် ၁၅၇ လုံးခန့် မီးလောင်ပြာကျ ခဲ့တယ်လို့ ကေအဲန်ယူ−ဗဟိုက ဒီကနေ့ ထုတ်ပြန်ပါတယ်။
ဖေဖော်ဝါရီ ၁၂ ရက်က ကေအဲန်ယူ-မူးမြို့နယ် အုပ်ချုပ်မှု နယ်မြေအတွင်းရှိ ကြောင်ပြာ ကျေးရွာမှာ တောမီးလောင်ရာမှ တစ်ဆင့် ကျေးရွာအတွင်းသို့ မီးစွဲသွားပြီး အိမ်ခြေ ၂၂၀ ကျော်ရှိတဲ့ အနက် အိမ်ခြေ ၁၅၀ ဝန်းကျင်ခန့် မီးလောင်ပြာကျခဲ့တယ်လို့ သိရပါတယ်။
ဖေဖော်ဝါရီ ၁၀ ရက်မှာလည်း တောမီးလောင်ရာမှတစ်ဆင့် ကော့ပျင်းကျေးရွာ အတွင်းသို့ မီးကူးသွားပြီး အိမ်ခြေ ၅၁၃ လုံးရှိတဲ့ အနက် ၇ လုံး မီးလောင်ပြာကျ ပျက်စီးခဲ့တယ်လို့ ဆိုပါတယ်။
မီးစွဲလောင်ခံရတဲ့ ကျေးရွာတွေဟာ စစ်ကောင်စီတပ်တွေရဲ့ လူ့အခွင့်အရေး ချိုးဖောက်မှုတွေကြောင့် ၂၀၂၂ ခုနှစ် ဇူလိုင်လမှာ ရွာလုံးကျွတ် ထွက်ပြေးခဲ့တဲ့ အချိန်မှစပြီး စစ်ကောင်စီတပ်တွေ ကျေးရွာတွင်းသို့ ဝင်ရောက် မွှေနှောက်ဖျက်ဆီးတာတွေ ပြုလုပ်ခဲ့တဲ့အပြင် ပြည်သူ တစ်ဦးဦးကို တွေ့ရှိပါက ဖမ်းဆီးနှိပ်စက် သတ်ဖြတ်တာတွေ ပြုလုပ်ခဲ့ပါတယ်။
အဲဒီလို စစ်တပ်က ပြုလုပ်တာကြောင့် ကျေးရွာနေ ပြည်သူတွေဟာ အခုအချိန်အထိ ကျေးရွာတွင်းသို့ ပြန်မနေရဲကြဘဲ ကျေးရွာအတွင်း အမှိုက်သရိုက် သစ်ရွက်ခြောက်တွေ ပြည့်နှက်နေတာကြောင့် အခုလို လွယ်ကူစွာ မီးစွဲလောင်ခံရတာလို့လည်း သိရပါတယ်။
ကော်သူးလေ အုပ်ချုပ်နယ်မြေ၊ ခလယ်လွီထူခရိုင် တပ်မဟာ(၃)၊ လယ်ဒိုမြို့နယ် အတွင်းသို့ စစ်ကောင်စီတပ်က မနေ့က ညနေ ၅ နာရီခွဲမှာ လေယာဉ် ၂ စင်းနဲ့ ဗုံး ၄ လုံးကြဲချတဲ့အပြင် အော်လီဂန်းတွေနဲ့ ပစ်ခတ်ခဲ့ပေမယ့် ထိခိုက်ပျက်စီးခဲ့တာ မရှိဘူးလို့ သိရပါတယ်။
MK-003
#MeKongNews
#ကော်သူးလေနယ်မြေ #မီးလောင် #လူ့အခွင့်အရေးချိုးဖောက်မှု