မဲခေါင်၊ အောက်တိုဘာ ၁၀
အမျိုးသားတွေနဲ့ တန်းတူ တော်လှန်ရေး တာဝန်ထမ်းဆောင်နေတဲ့ ကရင်နီ အမျိုးသားများ ကာကွယ်ရေးတပ်ဖွဲ့- KNDF ရဲ့ ပထမဆုံး အမျိုးသမီးတပ်ဖွဲ့ လှုပ်ရှားမှု ပုံရိပ်တွေကို ထုတ်ပြန်ပြီး နွေဦးတော်လှန်ရေးမှာ အမျိုးသမီးတွေရဲ့ အရေးပါမှုကို ပြသလိုက်ပါတယ်။
ခေတ်အဆက်ဆက် အမျိုးသမီးတွေ နိုင်ငံရေးမှာ ပါဝင်မှု နည်းပါးပေမယ့် အခု နွေဦးတော်လှန်ရေးမှာ အမျိုးသမီးတွေ ဘက်ပေါင်းစုံက ပါဝင်နေပြီး KNDF ရဲ့ ပထမဆုံး အမျိုးသမီး တပ်ဖွဲ့ကို တပ်ရင်း (၅) ရဲ့ တပ်ခွဲ (၄) အဖြစ် ဖွဲ့စည်းထားတာ တစ်နှစ်ကျော် ရှိနေပြီလို့ KNDF တပ်ရင်း (၅) ရဲ့ ထုတ်ပြန်ချက်မှာ ဖော်ပြပါတယ်။
“အမျိုးသမီး ပါဝင်လာတဲ့ နိုင်ငံရေး တော်လှန်ရေးကို ကြည့်ခြင်းအားဖြင့် ဆိုရင် နိုင်ငံရေး ယဉ်ကျေးမှုတွေ အဆင့်အတန်း မြင့်မားလာတာကို ပြသနေခြင်းနဲ့ အတူ ယနေ့ နွေဦးတော်လှန်ရေးဟာ အရင်လို တောခို တော်လှန်ရေး မဟုတ်တော့ဘဲ အမျိုးသမီးတွေ အပါအဝင် နည်းပညာတွေနဲ့အတူ လူထုတွေ အင်တိုက် အားတိုက် ပါဝင်လာတဲ့ တော်လှန်ရေး တစ်ခု ဖြစ်ပြီ ဖြစ်တယ်” လို့ ထုတ်ပြန်ချက်က ဆိုပါတယ်။
KNDF တပ်ရင်း (၅) က ထုတ်ပြန်တဲ့ အမျိုးသမီးတပ်ဖွဲ့ရဲ့ လှုပ်ရှားမှု ပုံရိပ်မှာ အမျိုးသမီးတွေဟာ အမျိုးသား တပ်ဖွဲ့ဝင်တွေနဲ့ တန်းတူ တောတောင်ထဲ လက်နက်တွေကိုင်ပြီး စစ်ကြောင်းထွက်နေတာကို တွေ့ရပါတယ်။
အမျိုးသမီးတွေ ခံစားရတဲ့ အကြမ်းဖက်မှုတွေ၊ ဖိနှိပ်မှုတွေ ခွဲခြားဆက်ဆံမှုတွေ အတွက် နောင်တချိန် ဖက်ဒရယ်စနစ် ထူထောင်တဲ့ အခါမှာ နိုင်ငံရေး စကားဝိုင်းတွေ ညှိနှိုင်းမှုတွေ မူဝါဒတွေ ရေးဆွဲတဲ့အခါမှာ အမျိုးသမီးတွေ ပါဝင်နိုင်ဖို့ ကြိုးစားရမယ်လို့ ထုတ်ပြန်ချက်မှာ ဖော်ပြပါတယ်။
“အမျိုးသမီးများရဲ့ အခွင့်အရေး၊ ခံစားပိုင်ခွင့်ရရှိဖို့က အမျိုးသမီးတွေမှာပဲ တာဝန်ရှိတာ မဟုတ်ဘဲ ကျွန်တော်တို့ အမျိုးသားတွေလည်း တကယ့် လူမှုဘဝမှာ ကြိုးစားပေးဖို့ အများကြီး လိုအပ်ပါတယ်” လို့ KNDF တပ်ရင်း (၅) ကပြောပါတယ်။
KNDF တပ်ရင်း တပ်ဖွဲ့တွေမှာ အမျိုးသမီး တပ်ဖွဲ့ဝင်တွေ အမျိုးသားတွေနဲ့ တန်းတူ တာဝန် အတူတကွ ထမ်းဆောင်နေကြပေမယ့် KNDF တပ်ရင်း ၅ တပ်ခွဲ (၄) ကတော့ ပထမဆုံး ဖွဲ့တဲ့ အမျိုးသမီးတပ်ဖွဲ့ ဖြစ်ပါတယ်။
CJ-002
#MeKongNews
#ကရင်နီပြည်နယ်
#KNDF
#တော်လှန်ရေး
