မဲခေါင်၊ ဖေဖော်ဝါရီ ၁
ချင်းပြည်နယ်၊ ဟားခါးမြို့နယ် အခြေစိုက် ချင်းကာကွယ်ရေးတပ်-CDF အနေနဲ့ ပြီးခဲ့တဲ့၂ နှစ်အတွင်း တိုက်ပွဲပေါင်း ၁၆၆ ကြိမ် ဖော်ဆောင်ခဲ့ရ တိုက်ပွဲတွေ အတွင်း စစ်ကောင်စီတပ်ဖွဲ့ဝင် ၅၁၀ ဦးကို သုတ်သင်နိုင်ခဲ့ကာ ၂၂၂ ဦး ဒဏ်ရာရရှိခဲ့တယ်လို့ ဒီကနေ့ ထုတ်ပြန်ပါတယ်။
ဒီကနေ့ ပြည်သူ့နွေဦး တော်လှန်ရေး ၂ နှစ်ပြည့် ထုတ်ပြန်ချက်မှာ အခုလိုဖော်ပြခဲ့တာ ဖြစ်ပြီး တိုက်ပွဲတွေ အတွင်း ဟားခါး CDF ရဲဘော် ၁၉ ဦး ကျဆုံးကာ ၄၁ ဦး ဒဏ်ရာရခဲ့တယ်လို့လည်း ဖော်ပြထားပါတယ်။
၂ နှစ်တာ ကာလအတွင်း စစ်ကောင်စီရဲ့ ဖမ်းဆီးနှိပ်စက်မှု၊ လက်နက်ကြီး ပစ်ခတ်မှုတွေကြောင့် အရပ်သား ပြည်သူ ၁၄ ဦး သေဆုံးပြီး ၆ ဦး ဒဏ်ရာရတယ်လို့ ဆိုပါတယ်။
ဒါ့အပြင် ပြည်သူ ၃၇၄ ဦး မတရား ဖမ်းဆီး ချုပ်နှောင်ခံရပြီး ပြည်သူလူထုရဲ့ နေအိမ် ၃၀ လုံး မီးလောင်ခဲ့တဲ့ အပြင် နေအိမ်ပျက်စီးမှု တွေလည်း ရှိတယ်လို့ ထုတ်ပြန်ချက်မှာ ဖော်ပြပါတယ်။
တိုင်းပြည်နဲ့ လူမျိုး လွတ်မြောက်ရေး အတွက် နောက်ဆုံး တိုက်ပွဲဖြစ်တဲ့ နွေဦးတော်လှန်ရေးမှာ ပြည်သူ တစ်ရပ်လုံး ပူးပေါင်းပါဝင်ကြဖို့နဲ့ လက်နက်ကိုင် တော်လှန်ရေး အဖွဲ့တွေ အနေနဲ့ စစ်ဆင်ရေး၊ အထူးသဖြင့် မြို့တွင်း စစ်ဆင်ရေးတွေ တိုးမြှင့်ဖော်ဆောင်ကြဖို့လည်း ဟားခါး CDF က နှိုးဆော်ထားပါတယ်။
အာဏာရှင်စနစ် အမြစ်ပြတ် ချေမှုန်းရေးနဲ့ စစ်မှန်တဲ့ ဖက်ဒရယ် ဒီမိုကရေစီ ရရှိရေးအတွက် တော်လှန်ရေးကို အရှိန်မြှင့်ကာ ဆုံးခန်းတိုင်အောင် တိုက်ပွဲဝင်သွားမယ်လို့လည်း ထုတ်ပြန်ထားပါတယ်။
စစ်တပ်က အဓမ္မအာဏာသိမ်းတဲ့ ၂ နှစ်တာ ကာလအတွင်း ပြည်သူလူထု နည်းပေါင်းစုံနဲ့ တော်လှန်ခဲ့ရာ ဟားခါးမြို့နယ်မှာ လူအင်အား ၅ သောင်းကျော် ပါဝင်တဲ့ အထွေထွေသပိတ်၊ ဝန်ထမ်း ၄,၀၀၀ ကျော်ပါဝင်တဲ့ CDM၊ လူအင်အား ၃,၀၀၀ ကျော် ပါဝင်တဲ့ လက်နက်ကိုင်လှုပ်ရှားမှုတို့နဲ့ တိုင်းပြည်နဲ့ လူမျိုး လွတ်မြောက်ရေး အတွက် နွေဦးတော်လန်ရေးကို ပါဝင်ဆင်နွှဲခဲ့တယ်လို့လည်း ထုတ်ပြန်ချက်မှာ ဖော်ပြထားပါတယ်။
MK-003