မဲခေါင်၊ နိုဝင်ဘာ ၁၁
ကရင်နီပြည်နယ်အတွင်း တော်လှန်ရေးတပ်ပေါင်းစုရဲ့ ၁၁၁၁ စစ်ဆင်ရေး ပထမရက် ဒီကနေ့မှာ စစ်ကောင်စီ တပ်စခန်း ၇ ခု သိမ်းပိုက်နိုင်ခဲ့ရာ သေနတ် အလက် ၁၀၀ ကျော်ရရှိပြီး စစ်ဂျက်လေယာဥ် တစ်စီး ပစ်ချနိုင်ခဲ့တယ်လို့ KNDF က ဒီကနေ့ နိုဝင်ဘာ ၁၁ ရက် ညပိုင်းမှာ ထုတ်ပြန်ပါတယ်။
ဒေသခံ တော်လှန်ရေးတပ်တွေဖြစ်တဲ့ KA ၊ KNDF ၊ KNPLF ၊ DMO PDF ၊ Loikaw PDF ၊ မိုးဗြဲ PDF ၊ ဖယ်ခုံ PDF ၊ မြို့ပြပြောက်ကျားတပ်၊ ရှမ်းတောင် PDF တို့ ပူးပေါင်းပြီး ဒီးမောဆိုမြို့နယ်၊ နန်းမယ်ခုံမြို့က တပ်စခန်းတွေ အပါအဝင် မိုးဗြဲမြို့ နဲ့ လွိုင်ကော်မြို့နယ် အတွင်းရှိ စစ်ကောင်စီ တပ်စခန်းတွေကို ဒီကနေ့ ထိုးစစ်ဆင် တိုက်ခိုက်ခဲ့ရာ စခန်းပေါင်း ၇ ခု သိမ်းပိုက်နိုင်ခဲ့တယ်လို့ ဆိုပါတယ်။
“စစ်ကောင်စီဘက်က အယောက် ၃၀ ကျော် သေဆုံးတယ်” လို့ KNDF ခေါင်းဆောင် ခွန်းဘီထူးက ပြောပါတယ်။
တိုက်ပွဲတွေအတွင်း စစ်ကောင်စီဘက်က တိုက်လေယာဥ်နဲ့ အကြိမ် ၂၀ ထက်မနည်း ပစ်ခတ်နေတဲ့ကြားက စခန်းတွေကို အောင်မြင်စွာ သိမ်းပိုက်နိုင်ခဲ့ပြီး လက်နက်ကြီးငယ် အလက် ၁၀၀ ကျော်ရခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
ဒါ့အပြင် စစ်တိုက်လေယာဥ် တစ်စီးကို ပစ်ချနိုင်ခဲ့တယ်လို့ ဆိုပါတယ်။
လက်ရှိ လွိုင်ကော်မြို့အနီးမှာ စစ်ကောင်စီနဲ့ တော်လှန်ရေးတပ်ဖွဲ့ တိုက်ပွဲတွေ ဆက်လက် ဖြစ်ပွားနေပြီး စစ်ကောင်စီဘက်က မြို့တွင်းမှာ ပြည်သူတွေ လမ်းမပေါ်ထွက်ပါက ပစ်မယ်လို့ ကြေညာထားတယ်လို့ မြို့ခံတွေက ပြောပါတယ်။
MK-007