မဲခေါင်၊ ဇန်နဝါရီ ၃၁
ရန်ကုန်တိုင်းအတွင်းမှာရှိတဲ့ စျေးဆိုင်တွေကို အသံတိတ်သပိတ်မှာ ပူးပေါင်းပါဝင်ရင် လိုင်စင်သိမ်းမယ့်အပြင် ဖမ်းဆီးအရေးယူသွားမယ်လို့ သက်ဆိုင်ရာ မြို့နယ်အလိုက် စည်ပင်သာယာဌာနတွေက ခြိမ်းခြောက်နေပါတယ်။
“ မနေ့ကညကလာပြီး ခြိမ်းခြောက်တယ်။ ဆိုင်တွေပိတ်မယ်ဆို နောက်ဖွင့်လို့မရအောင် လုပ်ပစ်မယ်၊ ပုံမှန်အတိုင်းဆိုင်တွေ ဖွင့်ရမယ်” လို့ တာမွေမြို့နယ်ရှိ ကုန်မျိုးစုံရောင်းဝယ်နေသူတစ်ဦးက ပြောပါတယ်။
တော်လှန်ရေးအင်အားစုတွေက အာဏာသိမ်းမှု ၂ နှစ်ပြည့်တဲ့နေ့ ဖြစ်တဲ့ ဖေဖော်ဝါရီလ ၁ ရက်နေ့မှာနံ နက် ၁၀ နာရီမှ ညနေ ၃ နာရီအတွင်း စျေးဆိုင်များပိတ်ရန်မလိုဘဲ အသံတိတ်သပိတ်ပြုလုပ်ကြဖို့ တိုက်တွန်းချက်အပေါ် စစ်ကောင်စီက လိုက်လံတင်းကျပ်နေတာလည်း ဖြစ်ပါတယ်။
စစ်ကောင်စီလက်အောက်ခံ အဖွဲ့အစည်းတွေက ပုံမှန်အတိုင်း သွားလာလှုပ်ရှားဖို့နဲ့ ရန်ကုန်တိုင်း မြို့နယ်အလိုက် စစ်တပ်ထောက်ခံပွဲတွေ စုပေါင်းပြုလုပ်ဖို့နဲ့၊ တန်ပြန်လှုံဆော်မှုတွေပြုလုပ်ဖို့ နှုတ်မိန့်ညွန်ကြားမှုတွေလည်း ရှိနေတယ်လို့ နီးစပ်ရာအသိုင်းအဝိုင်းက ဆိုပါတယ်။
“ အရင် အသံတိတ်သပိတ်တွေတုန်းကလိုပဲ ရုံးကို မဖြစ်မနေတက်ရမယ်၊ ရုံးဖယ်ရီကားစီးတဲ့သူတွေက ဘုရားသွားရမယ်၊ တရားဝင်ထုတ်ပြန်ချက်မျိုး မဟုတ်ဘဲ နှုတ်မိန့်နဲ့ ညွှန်ကြားထားတာလို့” စည်ပင်ဝန်ထမ်းတစ်ဦးကလည်း ဆိုပါတယ်။
လက်ရှိမှာ ဌာနဆိုင်ရာရုံးတွေမှာ စစ်ကောင်စီတပ်သားတွေ အပြည့်ချထားပြီး ရန်ကုန်မြို့ တစ်မြို့လုံးနီးပါး လုံခြုံရေး အပြည့်အဝယူထားတဲ့ အနေအထားရှိနေတာလည်း ဖြစ်ပါတယ်။
အရင် အသံတိတ်သပိတ်များ ပြုလုပ်ခဲ့ရာ သပိတ်မတိုင်မီရက်များတွင် အခုလိုဘဲ စစ်ကောင်စီက ဆိုင်တွေကို မဖြစ်မနေဖွင့်ဖို့ ခံဝန်လက်မှတ်ထိုးခိုင်းတာတွေ၊ ဖမ်းဆီးအရေးယူမှုတွေ လုပ်ခဲ့ပေမယ့်လည်း အောင်မြင်ခဲ့ပါတယ်။
လူထုပါဝင်မှုအားကောင်းခဲ့တဲ့ အသံတိတ်သပိတ်ကို ၂၀၂၁ ခုနှစ် မတ်လ ၂၄ ရက်တွင် တစ်ကြိမ်၊ ဒီဇင်ဘာ ၁၀ ရက်နေ့နဲ့ အာဏာသိမ်းမှု တစ်နှစ်ပြည့်တဲ့ ၂၀၂၂ ဖေဖော်ဝါရီလ ၁ ရက်နေ့တို့မှာ အောင်မြင်စွာပြုလုပ်နိုင်ခဲ့တာပါ။
MK-006
#MeKongNews
#အသံတိတ်သပိတ်
#ရန်ကုန်စည်ပင်