အဲဒီစာရွက် တွေကို ဒီကနေ့ မနက် မိုးမလင်းမီမှာ ဒရုန်းနဲ့ ကြဲချခဲ့တာပါ။
ပြည်သူ့ဘက် အမှန်တရားဘက်မှာ ရပ်တည်လိုပေမယ့် အကြောင်းအမျိုးမျိုးကြောင့် အာဏာသိမ်း တပ်ချုပ် မင်းအောင်လှိုင်ရဲ့ ထင်ရာစိုင်းမှုအောက်မှာ မပျော်သော်လည်း ဆက်လက် အသုံးတော်ခံနေရတဲ့ စခတ (၁၀)၊ တကရ(၅၀ဝ၄)၊ အမတ(၃၆၉)၊ အရာတော်မြို့မ ရဲစခန်း၊ နောင်ကြီးအိုင်ရဲကင်းရသစ်ရဲကင်း တို့မှ အရာရှိ – စစ်သည်တွေ၊ ရဲတပ်ဖွဲ့ဝင်တွေ၊ အရာတော်မြို့နယ်မှ ဌာနဆိုင်ရာ ဝန်ထမ်းတွေ အားလုံး သိရှိစေဖို့ အမာခံ သတင်းပေးခေါ်ယူခြင်း အစီအစဉ်ကို ရှင်းလင်းဖော်ပြထားတဲ့ စာကို ကြဲချခဲ့တာပါ။
အကြောင်းအမျိုးမျိုးကြောင့် ပြည်သူ့ရင်ခွင် မခိုလှုံနိုင်တဲ့ အရာရှိ စစ်သည်တွေ၊ ရဲတပ်ဖွဲ့ဝင်တွေ၊ ဌာနဆိုင်ရာ ဝန်ထမ်းတွေကို အမာခံသတင်းပေးပို့သူ ဖရဲသီး တွေအဖြစ် ပါဝင်ကူညီနိုင်ဖို့ ဖိတ်ခေါ်ပါတယ်လို့လည်း အရာတော်မြို့နယ် ပြည်သူ့ကာကွယ်ရေးအဖွဲ့ရဲ့ စာမှာ ပါရှိပါတယ်။
ဖရဲသီး အဖြစ် ပြုလုပ်မယ်ဆိုပါက ကာကွယ်ရေးဝန်ကြီးဌာနသို့ ဆက်သွယ်ပြီး အချက်အလက်တွေ ဖြည့်သွင်းတာကို ဦးစွာ လုပ်ဆောင်ရမှာဖြစ်ပြီး အချက်အလက် လုံခြုံမှုအတွက် အပြည့်အဝ အာမခံ တာဝန်ယူတယ်လို့ ဒီဇင်ဘာ ၁၂ ရက်က အမျိုးသားညီညွတ်ရေးအစိုးရက ကြေညာပေးခဲ့တဲ့ အမာခံ သတင်းပေးခေါ်ယူခြင်း အစီအစဉ်ကို အသေးစိတ်ဖော်ပြထားပါတယ်။
ပြည်သူ့ အမာခံသတင်းပေးပို့သူ ဖရဲသီးပြုလုပ်သူတွေဟာ ကာကွယ်ရေးဝန်ကြီးဌာနကို တိုက်ရိုက်ချိတ်ဆက်ပြီး သတင်းအချက်အလက်တွေ လုံခြုံစွာ ပေးပို့နိုင်မယ့်အပြင် သတင်းအချက်အလက် အဆင့်အတန်းပေါ် မူတည်ပြီး ပြန်လည်ချီးမြှင့်တဲ့ ဆုတော်ငွေတွေလည်း ရရှိခံစားနိုင်မှာ ဖြစ်တယ်လို့ သိရပါတယ်။
ဒါ့အပြင် အမျိုးသားညီညွတ်ရေးအစိုးရ၊ ကာကွယ်ရေး ဝန်ကြီးဌာနရဲ့ အကာအကွယ်ပေးမှု အာမခံချက်ကို တော်လှန်ရေးကာလ အတွင်းမှာရော တော်လှန်ရေး အလွန်ကာလမှာပါ ပြည့်ဝစွာ ခံစားရမှာဖြစ်တဲ့အပြင် သတင်းပေးပို့သူတွေဟာ ပြည်သူ့ရင်ခွင်ခိုလှုံရေးအစီအစဉ်ရဲ့ အကျိုးခံစားခွင့်တွေကိုလည်း ရရှိမှာ ဖြစ်တယ်လို့ ဖော်ပြထားပါတယ်။
ဒါကြောင့် ပြည်သူနဲ့ တသားတည်း ရပ်တည်တာကို စစ်ကောင်စီယန္တရားတွင်းမှနေပြီး လုံခြုံစွာ လုပ်ဆောင်နိုင်မယ့်အပြင် ချီးမြှင့်ငွေ၊ ခံစားခွင့် တွေနဲ့ကာကွယ်ရေးဝန်ကြီးဌာနရဲ့ အကာအကွယ်ပေးမှု အာမခံချက်ကိုလည်း ရရှိမှာ ဖြစ်တာကြောင့် အမြန်ဆုံး ဆက်သွယ်သတင်းပေးပို့ကြဖို့လည်း တိုက်တွန်းထားပါတယ်။
စစ်ကောင်စီ ယန္တရားတွင်းရှိ အရာတော်မြို့နယ်မှ အရာရှိ စစ်သည်တွေ၊ ရဲတပ်ဖွဲ့ဝင်တွေ၊ ဌာနဆိုင်ရာ ဝန်ထမ်းတွေကို တိုက်တွန်း ဖိတ်ခေါ်လိုက်ပါတယ်လို့လည်း အရာတော်မြို့နယ် ပြည်သူ့ကာကွယ်ရေးအဖွဲ့က ကြဲချတဲ့စာမှာ ပါရှိပါတယ်။