မဲခေါင်၊ ဇန်နဝါရီ ၂၀
အထည်ချုပ်လုပ်ငန်းနဲ့ စက်မှုထုတ်ကုန်ဆိုင်ရာ လုပ်ငန်းတွေ ဘဏ်စာရင်းမဖွင့်ဘဲ လည်ပတ်ရတာက အမြတ်ခွန်ဆောင်တဲ့အခါ အခွန်ကိုခန့်မှန်းဆောင်ခိုင်းတာကြောင့် ကိုယ်ပိုင်အကောင့်အသုံးပြုရတာလို့ လုပ်ငန်းရှင်တွေက ပြောပါတယ်။
အထည်ချုပ်လုပ်ငန်းနဲ့ စက်မှုထုတ်ကုန်ဆိုင်ရာ လုပ်ငန်းတွေ ဘဏ်စာရင်းမဖွင့်ဘဲ ကိုယ်ပိုင်အကောင့်တွေနဲ့ သာလည်ပတ်နေတာကြောင့် ဘဏ်စာရင်းမဖွင့်ထားတဲ့ စက်ရုံတွေနဲ့၊ ဘဏ်စာရင်းဖွင့်ပြီး နိုင်ငံခြားငွေမရောက်တဲ့ စက်ရုံတွေကို အရေးယူခံရမယ်လို့ စစ်ကောင်စီလက်အောက်ခံ အလုပ်သမားရေးဝန်ကြီးဌာနက ဖိအားပေးထားပါတယ်။
“ စီးပွားရေး အခြေနေက တော်တော်ကျဆင်းနေတာ၊ နှစ်ကုန်လို့ စာရင်းအနှစ်ချုပ် သွားတင်ရင် စာရင်းအတိုင်း ခန့်မှန်းချေနဲ့ အခွန်ဆောင်ခိုင်းတာ၊ လုပ်ငန်းအရှုံးအမြတ်ကိုမကြည့်ဘူး၊တကယ်မြတ်လို့ အမြတ်ခွန်ဆောင်ရတဲ့ ပုံစံမဟုတ်တော့ဘူး၊ အလုပ်လုပ်ရင် အမြတ်ခွန်ဆောင်ဆိုတဲ့ ပုံစံဖြစ်နေတယ်။ လုပ်ငန်းရှင်တွေက ကိုယ်ပိုင်အကောင့်တွေ သုံးလာကြတာ။ ဒါကအစိုးရပိုင်းရဲ့လိုအပ်ချက်တွေပေါ့။ လုပ်ငန်းရှင်တွေကလည်း မှန်ကန်စေချင်ရင် သူတို့ ဘက်ကလည်းတိကျသေချာဖို့ လိုတယ်လို့” အထည်ချုပ် လုပ်ငန်းရှင်တစ်ဦးက ဆိုပါတယ်။
မြန်မာနိုင်ငံမှာ CMP ချုပ်ပြီး အထည်တင်ပို့ နေတဲ့ အထည်ချုပ်လုပ်ငန်း၊ စက်ရုံ၊ အလုပ်ရုံပေါင်း ၇၃၈ ရုံ လောက်ရှိရာက ငွေစာရင်းဖွင့်လှစ်ထားတဲ့ နိုင်ငံခြားငွေ ဝင်ရောက်တဲ့ စက်ရုံ ၃၆၂ ရုံ နဲ့ နိုင်ငံခြားငွေဝင်ရောက်တာမရှိတဲ့ စက်ရုံ ၂၈၄ ရုံ ရှိပြီး ငွေစာရင်း ဖွင့်လှစ်ထားတာ မရှိတဲ့ စက်ရုံတွေလည်း ကျန်ရှိနေသေးတယ်လို့ သိရပါတယ်။
“ CMP လုပ်ငန်းတွေမှာ ပြည်ပ က အမှာစာ တွေ ကျဆင်းလာတယ်။ ကုန်ကြမ်းတင်သွင်းရာမှာလည်း စစ်ကောင်စီရဲ့ မူဝါဒအပြောင်းအလဲတွေကြောင့်အခက်ခဲတွေနဲ့ ရင်ဆိုင်နေရတယ်။ ပြည်ပတင်ပို့မှု အပိုင်း မှာလည်း လုပ်ငန်းရှင်တွေရဲ့ ပို့ကုန် ရငွေ ၆၅ ရာခိုင်နှုန်း ကို သတ်မှတ် နှုန်းထားနဲ့ ဖြတ်ယူနေတဲ့ အတွက် ရပ်တည်ဖို့ ခက်ခဲနေတယ်လို့ အထည်ချုပ် လုပ်ငန်းရှင် တစ်ဦးက ပြောပါတယ်။
ဒါ့ပြင် လျှပ်စစ်မီးရရှိချိန် နည်းပါးတာ၊ အထွေထွေ ကုန်ကျစရိတ်တွေ တိုးမြင့်လာတာကြောင့် လုပ်ငန်းရပ်ဆိုင်းရတာတွေရှိသလို အလုပ်လက်မဲ့ လူဦးရေ တိုးလာပြီး အဆင်မပြေမူတွေနဲ့ကြုံတွေ့ နေရတယ်လို့လည်း သိရပါတယ်။
မြန်မာနိုင်ငံ အထည်ချုပ်လုပ်ငန်းရှင်များ အသင်းဝင် CMP ချုပ်ပြီး အထည်တင်ပို့နေတဲ့ စက်ရုံ ၃၅၀ ကျော်လောက်ရှိရာမှာ ၂၀၀ ကျော်လောက်ပဲ လုပ်ငန်းလည်ပတ်နိုင်တယ်လို့ အသင်းက ထုတ်ပြန်ထားပါတယ်။
၂၀၂၂-၂၃ ခုနှစ် ဘဏ္ဍာနှစ် ဧပြီ ၁ ရက်ကနေ ဒီဇင်ဘာ ၃၁ ရက်အထိ ပြည်ပကို CMP လက်ခစား ချုပ်ပြီး အထည်တင်ပို့မှုကနေ အမေရိကန်ဒေါ်လာ ၄ ဘီလီယံ ကျော် ရရှိထားတယ်လို့လည်း သိရပါတယ်။
MK-006