မဲခေါင်၊ ဇန်နဝါရီ ၂၁
ရှမ်းပြည် တောင်ပိုင်း၊ ဟိုပုံးမြို့နယ်ထဲက စံဖူး(လုံးဟီး)ကျေးရွာမှာ စစ်ကောင်စီ၊ ပအိုဝ်းပြည်သူ့စစ် – PNO ပူးပေါင်းတပ်နဲ့နဲ့ ပအိုဝ်းအမျိုးသား လွတ်မြောက်ရေး တပ်မတော် -PNLA တို့ တိုက်ပွဲပြင်းထန်နေတယ်လို့ ရွာခံတွေက ပြောပါတယ်။
မနေ့ ဇန်နဝါရီ ၂၀ရက် ညနေပိုင်းကတည်း တိုက်ပွဲ စတင်နေတာ ဖြစ်ပြီး ဒီနေ့ ဇန်နာဝါရီ ၂၁ မှာတော့ ပိုပြင်းထန်လာတာကြောင့် ကျေးရွာနေ ပြည်သူတွေဟာ ပိတ်မိနေတယ်လို့ ဒေသခံတစ်ဦးက ပြောပါတယ်။
“မနေ့ညက လူမှားပစ်တယ်ဆိုပြီး ပြန်ညှိကြတာ၊ ဒီမနက် ပြန်ပစ်နေကြတာ၊ ခု နေ့လည်အထိပဲ တိုင်တစ်ရာဘုန်းကြီးကျောင်းလဲ မီးလောင်ပြီ” လို့ သူက ပြောပါတယ်။
ပအိုဝ်းကိုယ်ပိုင် အုပ်ချုပ်ခွင့်ရဒေသ၊ ဟိုပုံးမြို့နယ်၊ မဲနယ်တောင်မှာရှိတဲ့ စံဖူးရွာမှာ တိုက်ပွဲဖြစ်ပွားတဲ့အကြောင်းနဲ့ ပတ်သက်လို့ ဘိန်းစားသူ၊ ဘိန်းရောင်းသူတွေကို ဖမ်းဆီးပေးဖို့ ဒေသခံတွေက အကူအညီတောင်းတာကြောင့် PNLA က ဝင်ရောက်ဖမ်းဆီးရင်း တိုက်ပွဲဖြစ်တာ ဖြစ်တယ်လို့ PNLA နဲ့ နီးစပ်သူတစ်ဦးကပြောဆိုပြီး PNO နဲ့ နီးစပ်သူတွေကတော့ PNLO က လက်နက်သယ်လာတာကို တားဆီးစစ်ဆေးရင်း တိုက်ပွဲဖြစ်တယ်လို့ ဆိုပါတယ်။
တိုက်ပွဲကြောင့် လတ်တလောမှာ စစ်ကောင်စီဘက်က အရာရှိအပါအဝင် ၃ ဦးသေဆုံးပြီး ကျေးရွာသားတစ်ဦးလည်း မီးလောင်သေဆုံးတယ်လို့ ဒေသခံတွေထံကနေ ကနဦး သိရပါတယ်။
ဒါ့အပြင် စစ်ကောင်စီဘက်က လက်နက်ကြီး ပစ်ခတ်တာတွေကြောင့် စံဖူးကျေးရွာ အပါအဝင် ကျေးရွာ ၅ ရွာမှာ လက်နက်ကြီး ကျရောက် ပေါက်ကွဲခဲ့ပြီး လူနေအိမ် ၂၀ ထက်မနည်း မီးလောင်ပြာကျကာ စံဖူးကျေးရွာအနီးမှာရှိတဲ့ တိုင်တရာဘုန်းကြီးကျောင်းလည်း မီးလောင်ပျက်စီးနေတယ်လို့ သိရပါတယ်။
တိုက်ပွဲဖြစ်တဲ့ စံဖူးကျေးရွာနဲ့ အနီးတစ်ဝိုက်ကို ဖုန်းလိုင်းတွေဖြတ်ထားတာကြောင့် အဆက်အသွယ်ပြတ်နေပြီး ရွာသားတွေက ပြေးချင်ပေမယ့် လမ်းတွေပိတ်ထားတာကြောင့် ပြေးမရဖြစ်နေတယ်လို့ စံဖူးရွာနဲ့ နီးစပ်သူတစ်ဦးက ပြောပါတယ်။
တောင်ကြီး – ဟိုပုံး လမ်းမကြီးပေါ်မှာ သွားလာနေတဲ့ ပြည်သူ အယောက် ၅၀ ကျော်ကိုလည်း စစ်ကောင်စီနဲ့ PNO ပူးပေါင်းတပ်တွေက ဖမ်းဆီးပြီး ဓါးစာခံ လုပ်ထားတယ်လို့ နီးစပ်သူတွေက သတင်းပေးပို့ ထားပါတယ်။
တိုက်ပွဲဖြစ်ပွားရာ စံဖူးကျေးရွာဟာ တောင်ကြီး – လွယ်လင်သွားလမ်း ထမ်စမ့်ကျောက်ဂူသွားလမ်းအနီးမှာ တည်ရှိပြီး ဟိုပုံးကနေ ၅ မိုင်ခန့်အကွာမှာ တည်ရှိတာဖြစ်ပါတယ်။
ပြီးခဲ့တဲ့ ၂၀၂၂ ခုနှစ် စက်တင်ဘာလ ၁၄ ရက်နေ့ကလည်း ပင်လောင်းမြို့နယ်၊ ဝါးပြုံးကျေးရွာမှာ PNLA တပ်သား ၅ ဦးကို PNO က ဖမ်းဆီး သတ်ဖြတ်ခဲ့ပေမယ့် နောက်ပိုင်းမှာတော့ အဖွဲ့ အရာရှိပိုင်းတွေ ညှိနှိုင်းဆွေးနွေးမှုကြောင့် ပြေလည်မှု ရခဲ့ပါတယ်။
CJ – 007
#MeKongNews
#PNLA
#PNO
#ဟိုပုံး
#စံဖူးကျေးရွာ
