မဲခေါင်၊ ဩဂုတ် ၉
ရှမ်းပြည်နယ် မြောက်ပိုင်း၊ သီပေါမြို့၊ ပန်းတိမ်တောင်နဲ့ တောင်မြို့ ရပ်ကွက်အုပ်ကြီးတွေဟာ စစ်ကောင်စီတပ်၊ နယ်မြေခံ ရဲတွေနဲ့ ပေါင်းပြီး လောင်းကစား၀ိုင်းတွေ အကြီးအကျယ် ပြုလုပ်နေတယ်လို့ ဒေသခံ တစ်ဦးက မဲခေါင်သတင်းဌာနကို ပြောပါတယ်။
သီပေါမြို့၊ ပန်းတိမ်တောင်ရပ်ကွက် အုပ်ချုပ်ရေးမှူး စိုင်းစံမြင့်နဲ့ တောင်မြို့ ရပ်ကွက် အုပ်ချုပ်ရေးမှူး မြတ်ကို ဆိုသူတို့က အဆိုပါ ရပ်ကွက် ၂ ခုမှာ လောင်းကစား၀ိုင်းတွေ စစ်တပ်နဲ့ ပေါင်းပြီး ပြုလုပ်နေတာ လနဲ့ချီ ကြာမြင့်နေပြီလို့ ဆိုပါတယ်။
“သီပေါမြို့မှာ ရပ်ကွက် ၁၁ ခုရှိတယ်။ တခြားရပ်ကွက် အုပ်ကြီးတွေက လောင်းကစား၀ိုင်းတွေ လုပ်ခွင့်မပေးဘူး။ သူတို့ ၂ ယောက်ပဲ ဦးစီးလုပ်တာ” လို့ ဒေသခံ တစ်ဦးက ရှင်းပြပါတယ်။
ဒီလို လောင်းကစား၀ိုင်းတွေ အကြီးအကျယ် ပြုလုပ်နေတာကြောင့် သီပေါမြို့ထဲမှာ ခိုးဆိုးလုယက်မှုတွေ များပြားလာပြီး ဒေသခံတွေ မလုံခြုံမှု ခံစားနေရတယ်လို့ သူကပြောပါတယ်။
လက်ရှိ သီပေါမြို့ထဲမှာ ကားနဲ့ ဆိုင်ကယ် မကြာခဏ အခိုးခံရတာ၊ လျှပ်စစ်မီတာ ခိုးယူမှုတွေ၊ လွယ်မုတ်ဘုရားက ခေါင်းလောင်း အခိုးခံရတာတွေဟာ မြို့ထဲမှာ လောင်းကစား၀ိုင်းတွေ ကြီးစိုးလာပြီး နောက်ပိုင်း ဖြစ်လာတာလို့ ဒေသခံ တစ်ဦးက မှတ်ချက်ပြု ပြောဆိုထားပါတယ်။
အဆိုပါ လောင်းကစား၀ိုင်းတွေကို စစ်တပ်၊ နယ်မြေခံရဲတွေ၊ အုပ်ကြီးတွေ အကျိုးတူ ပူးပေါင်း လုပ်ကိုင်နေတာကြောင့် ပြည်သူတွေ တိုင်ကြားဖို့ မဖြစ်နိုင်ဘူးလို့ ဒေသခံတွေက ပြောပါတယ်။
MK-007