မဲခေါင်၊ ဖေဖော်ဝါရီ ၁၉
ညောင်ရွှေမြို့ကနေ ၃ မိုင်ခန့်သာဝေးတဲ့ ဝါးတော်ရွာဘုန်းကြီးကျောင်းထဲက လောင်းကစားဝိုင်းကို ပြီးခဲ့ ဖေဖော်ဝါရီ၊ ၁၇ရက်နေ့ ညနေ ၄ နာရီ လောက်က PNO – ပအိုဝ်းပြည်သူ့စစ်တွေက သေနတ်ပစ်ဖောက် ဝင်စီးပြီး ဓားပြတိုက်ခဲ့တယ်လို့ စုံစမ်းသိရပါတယ်။
ပအိုဝ်းပြည်သူစစ်အင်အား ၂၀ ခန့်ပါဝင်တဲ့အဖွဲ့ သေနတ် ၆ ချက်ဖောက်ခြောက်လှန့် ဝင်စီးခဲ့တာဖြစ်ပြီး ကျောင်းဝန်းတွင်း လောင်းကစားသူတွေ ကြောက်လန့်တကြား ထွက်ပြေးနေတဲ့အချိန်မှာ ကျန်ခဲ့တဲ့ ဆိုင်ကယ်၊ ဖုန်းနဲ့ ပိုက်ဆံတွေကို ယူဆောင်သွားတယ်လို့ ဒေသခံတစ်ဦးက မဲခေါင်ကိုပြောပါတယ်။
“ အဲ့နေ့က ရွာဆွမ်းလောင်းပွဲလည်းရှိတော့ လူများနေတာ PNO တွေက ကြံခင်းတွေကြားထဲကနေရုတ်တရက်ကြီး သေနတ်မိုးပေါ်ထောင်ဖောက်ပြီး ဝိုင်းစီးကြတာ။ လူတွေလန့်ပြီး ထပြေးတဲ့အချိန်မှာ ကျန်တဲ့ပစ္စည်းတွေကို ယူသွားကြတာ” လို့ သူက ပြောပါတယ်။
စစ်ကောင်စီတပ်ကတော့ ပစ်ခတ်မှုဖြစ်ပြီး အချိန်အနည်းငယ် ကြာမှရောက်ရှိလာပြီး ည ၈ နာရီအထိ ရွာကို အဝင်အထွက် ပိတ်ပြီးစစ်ဆေးတာတွေ လုပ်ခဲ့တယ်လို့ သတင်းရင်းမြစ်တစ်ဦးက ပြောပါတယ်။
“ ပွဲမှာ လေးကောင်ဂျင်ဝိုင်း လုပ်တဲ့သူလည်းပိုက်ဆံအများကြီး ပါသွားတယ်။ PNO ကသူတို့နယ်မြေမဟုတ်ဘဲ အင်းရွာမှာ စစ်တပ်အားကိုးနဲ့ လူပါးလာဝတာပေါ့” လို့ သတင်းရင်းမြစ်က ဆိုပါတယ်။
ဝါးတော်ရွာဟာ ညောင်ရွှေမြို့နယ်၊ တောင်ခြေမြင်းစခွန့်ကျေးရွာအုပ်စု၊ မိုင်းစောက်ကျေးရွာအပိုင်ရွာဖြစ်ပါတယ်။ အဲဒီလောင်းကစာဝိုင်းကို စစ်ကောင်စီအမိန့်အရ ဝါးတော်ရွာ ဘုန်းကြီးကျောင်းဟောင်းဘေးမှာ ပြီးခဲ့တဲ့ ဖေဖော်ဝါရီ ၁၂ ရက်နေ့ကမှ ဖွင့်ထားတာလို့ ဒေသခံတွေဆီကသိရပါတယ်။
ဓာတ်ပုံ – ဝါးတော်ကျောင်းစေတီ
CJ – 001
#MeKongNews
#PNO #ညောင်ရွှေမြို့နယ် #လောင်းကစားဝိုင်း
