မဲခေါင်၊ ဖေဖော်ဝါရီ ၄
မိုင်းဖြတ်မြို့နယ်နဲ့ မိုင်းယန်းမြို့နယ်အပါအဝင် ရှမ်းပြည်အရှေ့ပိုင်းမြို့အချို့တွင် အထွေထွေအုပ်ချုပ်ရေးဦးစီးဌာနရဲ့ဝန်ထမ်းတွေကို ခေါ်ယူပြီး လိုအပ်ပါက အရေးကြီး စာရွက်စာတမ်းတွေကို ဖျက်ဆီးပြစ်ဖို့ အသင့်လုပ်ထားဖို့ ညွှန်ကြားထားတယ်လို့ သတင်းရင်းမြစ်တွေထံကနေ သိရပါတယ်။
မဲခေါင်သတင်းဌာနက စုံစမ်းသိရတဲ့ အချက်အလက်တွေအရ ရှမ်းအရှေ့က အနည်းဆုံး မြို့နယ် ၅မြို့မှာ ဒီလိုညွှန်ကြားထားတာ ဖြစ်ပြီး ဖေဖော်ဝါရီ ၁ရက်၊ ၂ရက်တွေမှာ အဲဒီလို ညွှန်ကြားတာဖြစ်ပါတယ်။
“လူကြီးတွေကတော့ အားလုံးရွှေ့နေပြီ။ ရှိတဲ့ ငွေတွေလည်း သေချာသိမ်းပြီး လိုအပ်တာပဲသုံးဖို့ပြောတယ်။ ကြိုတင်လစာကိစ္စတော့မပြောဘူး”လို့ NonCDM ဝန်ထမ်းတစ်ဦးကပြောပါတယ်။
ဘာကြောင့် ဒီလိုညွှန်ကြားတယ်ဆိုတာကို မသိရဘဲ စစ်ရေးနဲ့ ပတ်သက်လို့ ထူးခြားတာမျိုးလည်း မရှိဘူးလို့ အဲဒီသတင်းရင်းမြစ်က ပြောပါတယ်။
လက်ရှိမှာ ရှမ်းမြောက်နဲ့ရှမ်းတောင်က နေရာတချို့မှာ တိုက်ပွဲတွေပြင်းထန် နေပေမယ့် ရှမ်းအရှေ့မှာ UWSA က ကျိုင်းတုံ ကိုဝင်တိုက်မယ် ဆိုတဲ့သတင်းကလွဲပြီး လှုပ်ရှားမှုမရှိပါဘူး။ ဒီသတင်းကိုလည်း UWSAကတရားဝင်ငြင်းဆိုထားပါတယ်။
ရှမ်းအရှေ့ဟာ ကျိုင်းတုံမြို့မှာ စစ်ကောင်စီရဲ့တြိဂံဒေသတိုင်းစစ်ဌာနချုပ်၊ မိုင်းဖြတ်နဲ့မိုင်းဆတ်မှာ စကခ ၁၄နဲ့ ၁၈ ရှိတဲ့ ဒေသဖြစ်ပြီး တာချီလိတ်၊ မိုင်းတုံ၊ မိုင်းယန်းမှာ အခြေချစစ်ဗျူဟာတွေရှိသလို ကျန်မြို့တွေမှာလည်း နည်းဗျူဟာတွေလှုပ်ရှားတဲ့ ဒေသဖြစ်ပါတယ်။ ဒါ့အပြင် စစ်တပ်လက်အောက်ခံ လားဟူပြည်သူ့စစ်အဖွဲ့တွေ ရာချီရှိနေတဲ့ ဒေသလည်းဖြစ်ပါတယ်။
တိုင်းရင်းသားလက်နက်ကိုင်တွေထဲမှာ UWSA ရဲ့ စစ်ဒေသ ၁၇၁က ဟွေအောနဲ့ဝမ်ဟုန်၊ ဟိုပန်၊ ဟိုရွက်တွေမှာအခြေချထားပြီး RCSS ကလည်း စခန်းခွဲတွေနဲ့ နေရာယူထားပါတယ်။ ဒါ့အပြင် RCSS/SSA ဌာနချုပ်ရှိရာ လွယ်တိုင်းလျန်းနဲ့လဲ မြေပြင် ဆက်စပ်နေတဲ့ဒေသဖြစ်ပါတယ်။
လက်ရှိမှာ ဒေသခံအများပြည်သူကတော့ ရှမ်းအရှေ့ကို စစ်မီး တွေကူးစက်လာမှာကို စိုးရိမ်မှုတွေရှိနေပါတယ်။
ရှမ်းပြည်အရှေ့ပိုင်းမှာ တိုင်းရင်းသား ကိုယ်ပိုင်အုပ်ချုပ်ခွင့်ရ ဒေသမြို့တွေမပါ ၉ မြို့နယ်ရှိပြီး ကျိုင်းတုံ၊ မိုင်းခတ်၊ မိုင်းပျဥ်း၊ မိုင်းယန်း၊ မိုင်းယောင်း၊ မိုင်းဖြတ်၊ မိုင်းဆတ်၊ မိုင်းတုံ၊ တာချီလိတ်တို့ ဖြစ်ပါတယ်။
MK – 012
#ရှမ်းအရှေ့
#UWSA
#RCSS
#ထွေအုပ်
