မဲခေါင်၊ ဇန်နဝါရီ ၁၂
ရှမ်းပြည်နယ် မြောက်ပိုင်း၊ လားရှိုး အနီးက နားကွမ်းတံတား ဇန်နဝါရီ ၁၁ ရက်နေ့ည ၇ နာရီကျော်ခန့်က ဖောက်ခွဲခံရလို့ ကျိုးကျသွားကြောင်း ဒေသခံတွေဆီက သိရပါတယ်။
နားကွမ်းတံတားဟာ လားရှိုး-နမ္မတူလမ်းပေါ်က အီနိုင်းတံတား ဖောက်ခွဲခံရပြီးနောက် ဒေသခံတွေရော ခရီးသွားတွေပါ လက်ရှိအသုံးပြုနေတဲ့ တံတားဖြစ်ပါတယ်။
“ တံတား ကျိုးသွားတာ မှန်တယ်။ လားရှိုး ကနေ နမ္မတူဘက် အထွက် နောင်လိုင် – နားကွမ်း – အီနိုင်း လမ်းက တံတား။” လို့ လားရှိုး ဒေသခံ တစ်ဦးက ပြောပါတယ်။
လားရှိုး-နမ္မတူ-မန်တုံ-နမ့်ဆန်မြို့တို့ကို အဓိကဆက်သွယ်ထားတဲ့ အီနိုင်းတံတားဟာ ဒီဇင်ဘာ ၃၁ ရက်နေ့ညမှာ ဖောက်ခွဲဖျက်ဆီးခံရတာဖြစ်ပါတယ်။
နားကွမ်းတံတားဖျက်ဆီးခံရမှုမှာ မည်သည့်အဖွဲ့မှ လုပ်ဆောင်သည်ကို ထုတ်ဖော်ပြောဆိုခြင်း မရှိသေးပါ။
“ လိုင်းကားတွေက အဲဒီလမ်းပဲ သွားနေရတာဟုတ်တယ်။ အီနိုင်းတံတားကျိုးလို့ သွားတဲ့ လမ်းက နားကွမ်းတံတား။ အီနိုင်းဈေးနားကနေ နားကွမ်းတံတားဖြတ်ပြီး နောင်လိုင်ကို ပြန်ပေါက်တဲ့လမ်း” လို့ ဒေသခံ အမျိုးသမီး တစ်ဦးက ပြောပါတယ်။
၁၀၂၇ ကာလအတွင်း ရှမ်းပြည်နယ်မြောက်ပိုင်းက တံတား အများအပြား ကျိုးသွားပြီး ခရီးသွား ပြည်သူလူထုတွေ အနေနဲ့ ခဲကာခဲဆစ် အဓိက သွားလာ နေတဲ့ တံတား ထပ်မံ ကျိုးကျသွားလို့ အခက်အခဲ ဖြစ်နေရတယ်လို့ ဆိုပါတယ်။
CJ-008
#MeKongNews
#နားကွမ်း
#အီနိုင်း
#စစ်ကောင်စီ
#တော်လှန်ရေး
#တံတား
