မဲခေါင်၊ ဇန်နဝါရီ ၁
ရှမ်းပြည်နယ်မြောက်ပိုင်း၊ လားရှိုး – နမ္မတူ လမ်းမပေါ်က အီနိုင်းတံတား ဒီဇင်ဘာ ၃၁ ရက်ညမှာ ဖောက်ခွဲဖျက်ဆီးခံလိုက်ရတယ်လို့ ဒေသခံတွေဆီက သိရပါတယ်။
ဒီဇင်ဘာ ၃၁ ရက်နေ့ ညပိုင်းနဲ့ ဇန်နဝါရီ ၁ ရက်နေ့ မနက်ပိုင်းတွေမှာ ပေါက်ကွဲသံတွေ ကြားရပြီးနောက်ပိုင်းမှာ ဖောက်ခွဲခံရပြီး ကျိုးကျသွားတာဖြစ်တယ်လို့ ဒေသခံတွေက ပြောပါတယ်။
“ညကရော အစောပိုင်းကရော ပေါက်ကွဲ သံတွေကြားတယ်။ ဘယ် တကြိမ်က ထိသွားတယ်တော့ မသိဘူး” လို့ ဒေသခံတစ်ဦးက မဲခေါင်သတင်းဌာနကို ပြောပါတယ်။
အီနိုင်းတံတား ကျိုးကျသွားတာကြောင့် ဒေသခံတွေအတွက်တော့ စားသောက်ကုန်တွေ ဝယ်ယူဖို့၊ သယ်ယူဖို့ များစွာ အခက်အခဲ ဖြစ်သွားပြီလို့ ဆိုပါတယ်။
“အီနိုင်းတံတားကျိုးသွားပြန်ပြီ။ သွားလာလို့ လုံးဝ မရတော့ဘူး။ ထက်ပိုင်းကျိုးသွားတာ။ မေိ့ညကလည်း တစ်ညလုံး လားရှိုးကနေ လက်နက်ကြီး ပစ်သံတွေ ကြားနေရတယ်။ မူဆယ် နဲ့ လားရှိုး ဒီလမ်းကပဲ သွားရတာ အခုတော့ မရတော့ဘူး” လို့ လားရှိုးရောက်နေတဲ့ မူဆယ် ဒေသခံတစ်ဦးက ပြောပါတယ်။
အီနိုင်းတံတား ကျိုးသွားတာကြောင့် ယာဉ်မောင်းတွေ အတွက် ဘာမှ လုပ်ကိုင်လို့ မရတော့ပဲ ခက်ခဲ သွားကြောင်း ကားသမားတွေက ပြောပါတယ်။
လားရှိုး-နမ္မတူ-မန်တုံ-နမ့်ဆန်မြို့တို့ကို အဓိကဆက်သွယ်ထားတဲ့ အီနိုင်းတံတားကို လားရှိုးမြို့ကနေ ထိုးစစ်ဆင်လာတဲ့ စစ်ကောင်စီတပ်က မနေ့ ဒီဇင်ဘာ ၃၁ ရက်မှာ ဖောက်ခွဲဖျက်ဆီးလိုက်တယ်လို့ မြောက်ပိုင်းညီနောင် ၃ ဖွဲ့က ထုတ်ပြန်ထားပါတယ်။
စစ်ကောင်စီနဲ့ သူ့ဝါဒဖြန့် သတင်းမီဒီယာတွေမှာတော့ အီနိုင်းတံတားဖောက်ခွဲဖျက်ဆီးခံရတာနဲ့ ပတ်သက်ပြီး ဘာသတင်းထုတ်ပြန်ချက်မှ မရေးသားကြပါဘူး။
၁၀၂၇ စစ်ဆင်ရေးကာလအတွင်း ကွန်လုံ – ဟိုပန် လမ်းက နမ့်တိန်တံတား၊ လားရှိုး – သိန္နီလမ်းက သိန္နီတံတား၊ ကျောက်မဲသီပေါကြားက ကျင်သီတံတားတို့ ကျိုးကျခဲ့ပြီး သီပေါ – နမ္မတူလမ်းက မိုးတွေတံတားလည်း ပေါက်ပြဲ ပျက်စီးသွားကာ သမိုင်းဝင် ကွမ်းလုံ တံတားလည်း Drop Bomb ထိမှက် ပျက်စီးခဲ့ပါတယ်။
CJ-008
#MeKongNews
#အီနိုင်း
#ကျိုးကျ
#တံတား
#စစ်ဆင်ရေး
#ပျက်စီး