မဲခေါင်၊ ဩဂုတ် ၁၄
ရှမ်းပြည်နယ် တောင်ပိုင်းနဲ့ ကရင်နီနယ်စပ် ဒေသမှာ စစ်အင်အား တိုးချဲ့နေတဲ့ စစ်ကောင်စီတပ်ကို ရှမ်းတောင် ဒရုန်းတပ်ဖွဲ့-SSDF က ဇူလိုင်လ တစ်လ အတွင်း ဒရုန်းနဲ့ ဗုံးသီး ၆၈ လုံးကြဲချ တိုက်ခိုက်ခဲ့တယ်လို့ မနေ့က ထုတ်ပြန် အသိပေးပါတယ်။
ပြည်သူ့ကာကွယ်ရေးတပ်ဖွဲ့တွေနဲ့ နေ့စဥ် တိုက်ပွဲတွေ ဖြစ်ပွားနေတဲ့ စစ်ကောင်စီတပ်တွေကို ၆၀ မမ ဗုံးသီး ၁၀ လုံး၊ လက်လုပ်ဗုံးသီး ၅၂ လုံး၊ ဗုံးသီးအသေး ၆ လုံး အသုံးပြုကာ ဒရုန်းနဲ့ အတွဲလိုက် ဗုံးကြဲ တိုက်ခိုက်ခဲ့တာ ဖြစ်တယ်လို့ ဆိုပါတယ်။
စစ်ဆင်ရေးတွေအတွင်း စစ်ကောင်စီတပ် ထိခိုက် သေဆုံးမှုတွေ ရှိပေမဲ့ နယ်မြေ အနေအထားနဲ့ စစ်ရေး အခြေအနေအရ စစ်သား ထိခိုက်သေဆုံးမှု အတိအကျကို စုံစမ်းနေဆဲလို့ SSDF က ထုတ်ပြန်ထားပါတယ်။
ရှမ်းတောင် ဒရုန်းတပ်ဖွဲ့ စတင်ဖွဲ့စည်းခဲ့ချိန်က ဒရုန်း စစ်ဆင်ရေးတွေကို မြေပြင်တော်လှန်ရေး အင်အားစုတွေနဲ့ ပူးပေါင်း လုပ်ဆောင်ခဲ့တာဖြစ်ပြီး လက်ရှိအချိန်ထိ ဗုံးသီးမျိုးစုံ ၂၀၀ နီးပါး ကြဲချ တိုက်ခိုက်ခဲ့တယ်လို့ သိရပါတယ်။
MK-007
#MeKongNews
#ရှမ်း-ကရင်နီ
#ဒရုန်း
#SSDF