မဲခေါင်၊ ဇန်နဝါရီ ၁၉
ရှမ်းပြည်နယ် လားရှိုးခရိုင်၊ ကျောက်မဲခရိုင်နဲ့ မူဆယ်ခရိုင်တို့မှ CDM ဝန်ထမ်းတွေကို လိုက်လံ ဖမ်းဆီးမှုတွေ ရှိနေပြီး နမ့်ဆန်မြို့နယ်မှာလည်း CDM ပညာရေးဝန်ထမ်းတွေ တာဝန်ပြန်ထမ်းဆောင်ဖို့ စစ်ကောင်စီက ဖိအား ပေးနေတယ်လို့ သိရပါတယ်။
ဇန်နဝါရီ ၁၅ ရက်က ကျောက်မဲခရိုင် သီပေါမြို့မှာ CDM ပညာရေး ဝန်ထမ်း ၂ ဦးကို စစ်ကောင်စီတပ်ဖွဲ့က ဖမ်းဆီးခဲ့ပြီး ရှမ်းပြည်နယ် အတွင်း CDM ဝန်ထမ်းတွေကို ဖမ်းဆီးဖို့နဲ့ ချေးငွေတွေ ပြန်ဆပ်ဖို့ စစ်ကောင်စီက ဖိအားပေးနေတယ်လို့ ဒေသခံတွေဆီက သိရပါတယ်။
“CDM တွေ အားကောင်းတုန်းက အများကြီး လုပ်ကြတယ်။ အခု အခက်အခဲ အမျိုးမျိုးကြောင့် Non-CDM ဖြစ်လာကြတယ်။ CDM တွေ Non CDM ပြန်လုပ်တဲ့အခါ စစ်ကောင်စီဟာ ငါတို့ကို ဆန့်ကျင်ထားတာ အဲ့ဒီ အတွက် နဂိုအတိုင်းတော့ ပြန်မရဘူး။ အောက်ကျနောက်ကျတော့ ခံရမယ်ဆိုပြီး လုပ်တာတွေ ရှိတယ်။ Non-CDM ဖြစ်သွားပေမယ့် စစ်ကောင်စီအောက်တော့ ကြာရှည် မလုပ်ချင်ဘူး။ လုပ်သက်ပြည့် ပင်စင် တင်တယ်။ ဒါပေမယ့် တင်တဲ့လူတွေ များလာတဲ့အခါ လုပ်သက်ပြည့် ပင်စင်တွေကို ‘မပေးသေးပါ’ ဆိုပြီး ရပ်ဆိုင်းပစ်တာတွေရှိတယ်” လို့ Non CDM ကျောင်းဆရာမ တစ်ဉီးက ပြောပါတယ်။
ပြီးခဲ့တဲ့ ဇန်နဝါရီ ဒုတိယပတ်ကလည်း နမ့်ဆန်မြို့နယ်က ကျေးရွာ အုပ်ချုပ်ရေးမှူးတွေကို အစည်းအဝေးခေါ်ပြီး Non-CDM မလုပ်တဲ့ ဝန်ထမ်းတွေရဲ့ လုံခြုံရေးကို တာဝန်ယူမှာ မဟုတ်ဘူးလို့ စစ်ကောင်စီက ခြိမ်းခြောက်ခဲ့တယ်လို့ သိရပါတယ်။
“ CDM လုပ်လာတာ ၂ နှစ်နီးပါးရှိပြီ။ အမှန်က ဝန်ထမ်းအချင်းချင်း ချောက်ချတာဖြစ်တယ်။ တချို့က CDM လုပ်ပြီးတော့ ကိုယ်ပိုင်လုပ်ငန်းနဲ့ အဆင်ပြေနေတော့ Non-CDM တွေက မနာလိုလို့ သတင်းပို့ တိုင်ကြား တာတွေရှိတယ်။ ဘယ်လို အခြေအနေရောက်ရောက် NON မှာ မဟုတ်သလို မဖြစ်မနေ လုပ်ရမယ်ဆို ရင်တောင် တာဝန်ကနေ ရပ်နားမယ်လို့ ဆုံးဖြတ်ထားတယ်” လို့ CDM ကျောင်းဆရာ တစ်ဉီးက ပြောပါတယ်။
CDM ဝန်ထမ်းတွေဟာ လက်ရှိမှာ မြို့၊ ရွာတွေကို ပြန်လည်ဝင်ရောက် နေထိုင်တဲ့ အတွက် ရပ်ရွာ အုပ်ချုပ်ရေးမှူးတွေ၊ မြို့နယ်အုပ်ချုပ်ရေးမှူးတွေ အနေနဲ့ စာရင်းပြုစုပေးဖို့ စစ်ကောင်စီက အခုလအတွင်း အမိန့်ပေးထားပါတယ်။
CDM နိုင်ငံ့ ဝန်ထမ်းတွေကို စစ်အုပ်စု အလိုကျ ဖိနှိပ်နေတဲ့ Non CDM ဝန်ထမ်းတွေ အပေါ် သဘောထားနဲ့ CDM Policy အမြန်ဆုံး အတည်ပြုပေးဖို့ ပြည်သူ့ကျန်းမာရေး အင်အားစု ၈ ဖွဲ့နဲ့ ပညာရေး အင်အားစု ၁၅ ဖွဲ့က မြန်မာ့နွေဦး တော်လှန်ရေးကို ဦးဆောင်နေကြတဲ့ အဖွဲ့အစည်းတွေကို တိုက်တွန်းထားပါတယ်။
MK-010
#MeKongNews