မဲခေါင်၊ ဇန်နဝါရီလ ၂၀
ရွှေစျေးကွက်မှာ ရွှေရှားပါးလို့ ဈေးတက်တာမဟုတ်ဘဲ ဈေးကစားသူတချို့ရဲ့ ရွှေဈေးဆွဲတင်မှုကြောင့် စံချိန်တင်မြင့်တက်နေရတာလို့ ရွှေအသင်းဥက္ကဌ ဦးမျိူးမြင့် က စွပ်စွဲ ပြောဆိုထားပါတယ်။
ရွှေအသင်းဟာ စစ်ကောင်စီအလိုကျ ရွှေစျေးကွက်ကို စီမံနေတာဖြစ်ပြီး ရွှေလောကသားတွေကြားမှာ ဝေဖန်မှုတွေလည်း ရှိနေတာပါ။
“ ဈေးကွက်မှာ ရွှေရှားလို့ ဈေးတက်နေတာမဟုတ်ဘူး၊ ပြည်နယ်နဲ့တိုင်းတွေက နေ့စဥ်ပိဿာချိန် ၅၀ လောက် အဝင်ရှိတယ်။ ကောလဟာလနဲ့ ဈေးဆွဲတင်တဲ့သူတွေရှိနေလို့ ဈေးတွေတက်နေတာလည်း ပါတယ်။ ဈေးတက်နေပေမယ့် အရောင်းအဝယ်က မရှိပါဘူး။ ဈေးတွေမြင့်နေတဲ့အတွက် ဘယ်သူကမှလည်း ဝယ်ပြီး သိမ်းမထားနိုင်ဘူးလို့” ဦးမျိုးမြင့်က ပြောပါတယ်။
လက်တွေ့မှာ ကမ္ဘာရွှေဈေး ၁ အောင်စ ကို ၁၉၀၀ ကျော် အထိမြင့်တက်နေတာကြောင့် ပြည်တွင်းရွှေဈေးမြင့်တက်နေတာဖြစ်ပြီး ဒီကနေ့ ပြင်ပရွှေဈေးဟာ အခေါက်ရွှေတစ်ကျပ်သား ကို ၂၈ သိန်းကျော် အထိ စံချိန်မြင့်တက်နေတာဖြစ်ပါတယ်။
“ ရွေဈေးတက်ရတဲ့ အဓိကအကြောင်းအရင်းက ကမ္ဘာ့ရွှေဈေးတက်လို့ တက်တာပါ။ ဒီနေ့ဆို စံချိန်တင်ပဲ ၂၈ သိန်းကျော် ဖြစ်သွားပြီ၊ ထပ်တက်နိုင်တဲ့ အခြေအနေမှာ ရှိတယ်။ အသင်းကလူတွေက ဝိနည်းလွတ်ပြောရတော့ သူတို့အန္တရာယ်ကင်းအောင် ဈေးနှုန်းနဲ့ ဈေးကွက်အခြေနေကို ဘောင်လွတ်အောင် ပြောကြတာ။ တကယ်က ကောလဟာလကြောင့် ရွှေဈေးကိုဆွဲတင်လို့ မရပါဘူး” လို့ ရန်ကုန်မြို့ ရွှေဆိုင်ပိုင်ရှင်တစ်ဦးက ဆိုပါတယ်။
လက်ရှိမှာ စစ်ကောင်စီက ရွှေဆိုင်တွေကို သတ်မှတ်နှုန်းထားအတိုင်းသာ ရောင်းချခိုင်းတာဖြစ်တဲ့အတွက် ရွှေဈေးကွက်မှာ ပြင်ပပေါက်ဈေးအတိုင်း နားလည်မှုနဲ့ရောင်းချနေရပြီး မှောင်ခိုစျေးကွက်က ပိုမိုကြီးထွားလာနေပြီလို့လည်း ရွှေလုပ်ငန်းရှင်တွေက ဆိုပါတယ်။
ရွှေဈေးနှုန်း သိန်း ၃၀ နီးပါးစျေးမြင့်တက်လာတဲ့အတွက် လုပ်ငန်းရှင်တွေအပေါ် စစ်ကောင်စီက ထပ်မံ တင်းကြပ်မှာကိုလည်း စိုးရိမ်မှုရှိတယ်လို့ သူကပြောပါတယ်။
စစ်ကောင်စီက ရွှေဆိုင်တွေကို သတ်မှတ်နှုန်းထားနဲ့သာ အရောင်းအဝယ်ပြုလုပ်စေတာ၊ ရွှေအသင်းက ပြုလုပ်တဲ့ငွေကြေးခဝါချမှု တိုက်ဖျက်ရေးသင်တန်းတက်ရောက်မှသာ ရွှေဆိုင်လိုင်စင်ထုတ်ပေးတာနဲ့ သက်တမ်းတိုးတာကိုလုပ်ဆောင်စေတဲ့အပြင် ပြင်ပရွှေဈေးကွက်မှာ အရောင်းအဝယ်လုပ်သူတွေကို ငွေအသွင်းအထုတ်အပေါ် အခြေခံပြီး ခေါ်ယူစစ်ဆေးမှုတွေ လုပ်ဆောင်နေတာပါ။
MK-006
