မဲခေါင်၊ မတ် ၃
စစ်ကိုင်းတိုင်း၊ ယင်းမာပင်မြို့နယ်ထဲက ရွာလုံးကျွတ်နီးပါး မီးရှို့ဖျက်ဆီးခံခဲ့ရတဲ့ ကုန်းကျေးရွာ ဒေသခံတွေ အတွက် စားနပ်ရိက္ခာနဲ့ ဆေးဝါး အကူအညီတွေ အရေးပေါ် လိုအပ်နေတယ်လို့ ယင်းမာပင်မြို့နယ်၊ ပြည်သူ့အုပ်ချုပ်ရေးအဖွဲ့က ပြောပါတယ်။
ယင်းမာပင်မြို့နယ်မှာ စစ်ကြောင်းထိုးနေတဲ့ စစ်ကောင်စီတပ်က ဖေဖော်ဝါရီ ၂၈ ရက်နေ့ကနေ မတ်လ ၁ ရက်နေ့အထိ ကုန်းကျေးရွာက ဒေသခံ နေအိမ်တွေကို မီးရှို့ဖျက်ဆီးခဲ့တာကြောင့် အိမ်ခြေ ၆၃၅ လုံး မီးလောင်ပျက်စီးခဲ့ပြီး ပြည်သူ ၃ ဦး အသတ်ခံခဲ့ရတယ်လို့ သိရပါတယ်။
“မလောင်တဲ့ အိမ်တွေကတော့ နေလို့ရတာပေါ့ဗျာ။ မီးရှို့ခံရတဲ့ အိမ်တွေကတော့ နေစရာလည်း မရှိဘူး။ စားစရာ သောက်စရာတွေကလည်း မရှိဘူး။ အဓိက ကတော့ သူတို့မှာ ဆားတွေ၊ ဆန်တွေ၊ ပဲတွေကအစ မရှိတော့ဘူး ပေါ့ဗျာ” လို့ ယင်းမာပင်မြို့နယ်၊ ပြည်သူ့အုပ်ချုပ်ရေးအဖွဲ့ တာဝန်ခံက မဲခေါင်သတင်းကို ပြောပြပါတယ်။
ကုန်းကျေးရွာမှာ အိမ်ခြေ ၇၀၀ ကျော်နဲ့ လူဦးရေ ၂,၅၀၀ ဝန်းကျင် နေထိုင်ပြီး ရွာလုံးကျွတ်နီးပါး မီးရှို့ခဲ့တဲ့ စစ်တပ်ဟာ ယင်းမာပင်မြို့နယ်ထဲကို ပြန်လည်ဝင်ရောက်ပြီးနောက် ဒီနေ့ မနက်ပိုင်းမှာတော့ ပြန်လှည့်ရွာနဲ့ မြောက်နုံးရွာဘက်ကို ဆက်လက် စစ်ကြောင်းထိုးနေတယ်လို့ ဒေသခံတွေက ဆိုပါတယ်။
ယင်းမာပင် အခြေစိုက် မြောက်ယမား ပြည်သူ့ကာကွယ်ရေးတပ်ဖွဲ့ ကတော့ တိုက်ပွဲတွေ ပြင်းထန်လာနိုင်တဲ့ ပြောင်းပြရွာ၊ မြို့ပေါ်ရွာ၊ စားတော်ပြင်ရွာ၊ လက်လှုပ်ရွာ၊ ရုံးလေးပင်ရွာ၊ ရေအောက်ရွာ၊ ကုန်းရွာ၊ ဇီးတောတောင်ရွာ၊ ဇီးတောမြောက်ရွာ၊ နုံးကြီးရွာ၊ ပေါက်ပန်းဖြူရွာ စတဲ့ရွာက ဒေသခံတွေ တိမ်းရှောင်ကြဖို့ သတိပေး ထုတ်ပြန်ထားပါတယ်။
၂၀၂၁ ခုနှစ်၊ မေလ ၁ ရက်ကစပြီး ၂၀၂၃ ခုနှစ်၊ ဇန်နဝါရီ ၃၁ ရက်နေ့ထိ တစ်နိုင်ငံလုံးမှာ အိမ်ခြေ ၅၅,၄၈၄ လုံး မီးရှို့ဖျက်ဆီး ခံထားရပြီး စစ်ကိုင်းတိုင်းထဲက အိမ်ခြေ ၄၃,၂၉၂ လုံး ပါဝင်တယ်လို့ Data For Myanmar ရဲ့ အချက်အလက်တွေအရ သိရပါတယ်။
MK-009
