မဲခေါင်၊ ဖေဖော်ဝါရီ ၁၁

ရှမ်းပြည်နယ်တောင်ပိုင်း၊ ဓနုကိုယ်ပိုင်အုပ်ချုပ်ခွင့်ရဒေသ၊ ရွာငံမြို့ထဲရှိ ကျေးရွာ ၆ ရွာကနေ စစ်ဘေးရှောင်နေရတဲ့ ပြည်သူတွေက စားနပ်ရိက္ခာပိုင်း ထောက်ပံ့မှုမရတာ ၆ လကျော်ထိရှိနေပြီလို့ စစ်ဘေးရှောင်ပြည်သူက ဖေဖော်ဝါရီလ ၈ ရက်နေ့က ပြောပါတယ်။

တောတွင်းထဲက စစ်ရှောင်စခန်းမှာ ၂၀၂၂ ခုနှစ် ၆ လပိုင်းကစပြီး ၂ နှစ်ကျော်ကြာ နေထိုင်နေကာ အိမ်ခြေ ၂၆ အိမ်ရှိပြီး ပြည်သူ ၄၃ ယောက်ထဲမှာ ကလေးငယ်နဲ့ သက်ကြီးရွယ်အို အယောက် ၂၀ ကျော်ပါဝင်တယ်လို့ သိရပါတယ်။

“ အဓိက ကတော့ ဆေးပစ္စည်း နဲ့ ရိက္ခာပေါ့။ အထောက်ပံ့မရတာ ၆ လကျော်နေပြီ။ အခက်အခဲပေါင်းစုံနဲ့ ရင်ဆိုင်နေရပါတယ်။ အလုပ်လုပ်နိုင်သူတချို့ကတော့ အပြင်ထွက်အလုပ်လုပ်နေပါတယ်။ “ လို့ စစ်ဘေးရှောင်အမျိုးသားတဦးက ပြောပါတယ်။

နွားဘန်းကြီးကျေးရွာ၊ သဲဖို့ကျေးရွာ၊ တောင်ဦးဘုရား၊ မျက်ခါးအင်းကျေးရွာ နဲ့ နေအိမ်ချိတ်ပိတ်ခံရသူ၊ နေအိမ်မီးရှို့ခံရသူတွေ စုဝေးကာ လုံခြုံမယ်ထင်ရတဲ့နေရာတခုမှာ နေထိုင်နေကြပြီး ဆေးဝါးနဲ့ ရိက္ခာပိုင်းတွေမှာ ပိုမိုခက်ခဲနေတယ်လို့ သိရပါတယ်။

စစ်ကောင်စီတပ်က နေအိမ်တွေမီးရှီု့ဖျက်ဆီးတာ၊ မဟုတ်မမှန်တဲ့ ဖမ်းဝရမ်းထုတ်တာတွေကြောင့် ကျေးရွာတွေထဲ ပြန်လည်နေထိုင်ဖို့ အခက်အခဲတွေရှိနေတယ်လို့ သိရပါတယ်။

CJ004

#MeKongNews

#ရွာငံ

#စစ်ဘေးရှောင်

#ရိက္ခာ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)