မဲခေါင်၊ ဇန်နဝါရီ ၁၂
ထားဝယ်ခရိုင်၊ ရေဖြူမြို့နယ်၊ ပိတောက်ကုန်းရွာမှာ ပျူစောထီး ခေါင်းဆောင်ဆိုသူ သေနတ်နဲ့ အပစ်ခံရပြီးနောက် အမည်မသိ အမျိုးသား အလောင်း ၂ လောင်း ရောက်လာတယ်လို့ Dawei Information Center က ဒီကနေ့ ထုတ်ပြန်ပါတယ်။
ဇန်နဝါရီ ၁၀ ရက်က ပိတောက်ကုန်းရွာမှ ပျူခေါင်းဆောင် ဆိုသူ ဦးကျော်ဝင်းကို ရေဖြူမြို့နယ် ပြည်သူ့ကာကွယ်ရေးတပ်ဖွဲ့-YPPDF ရဲဘော်တွေက သူ့ရဲ့ နေအိမ်မှာ ဝင်ရောက် ရှင်းလင်းစဉ် အပြန်အလှန် ပစ်ခတ်မှု ဖြစ်ပွားပြီး ဦးကျော်ဝင်း ကျည်ထိမှန်လို့ ဆေးရုံတင်လိုက်ရတယ်လို့ ဆိုပါတယ်။
ဦးကျော်ဝင်းဟာ လက်နက်ကိုင် ပျူခေါင်းဆောင် တစ်ဦးဖြစ်ကာ ရွာခံတွေကို ခြိမ်းခြောက်တာ၊ စစ်ကြေး တောင်းတာ၊ ရွာခံတွေကို ဖမ်းခိုင်းတာ၊ သတင်းပေးပို့တာနဲ့ ရွေးကောက်ပွဲ အတွက် ကူညီပေးနေတာတွေကြောင့် နေအိမ်ကို သွားရောက် ရှင်းလင်းခဲ့တာလို့ YPPDF က ဖော်ပြပါတယ်။
အဲဒီနေ့ ညမှာတော့ သဗြေဇွန်းရွာသွားတဲ့ လမ်းဘေးမှာ အမည်မသိ အမျိုးသား ၂ ဦး လက်နောက်ပြန်ကြိုး တုတ်ကာ မျက်နှာ အဝတ်စည်း သတ်ဖြတ်ခံထားရပြီး တစ်ဦးရဲ့ အောက်ပိုင်းမှာ သင်္ကန်းလို့ ယူဆရတဲ့အရာ ဝတ်ဆင်ထားတဲ့ အလောင်း ၂ လောင်းကို ကားတစ်စီးပေါ်မှ စွန့်ပစ်ခဲ့တယ်လို့ ဒေသခံတွေက ဆိုပါတယ်။
“ အဲနားမှာ ညပိုင်း သေနတ်အသံတွေ ကြားရပြီး ကားတစ်စီး မောင်းပြေးသွားပါတယ်။ ထွက်မကြည့်ရဲလို့ မနက်မှ အခြေနေ လိုက်ရှိုးတာ အခုလို ဖြစ်ရပ်မျိုးနဲ့ သေဆုံးနေပါတယ်။ ဒီလူတွေကို ရွာဘက်မှာ မတွေ့ဖူးဘူး။ ပျူစောထီးတွေ လက်ချက်လဲ ဖြစ်နိုင်ပါတယ်” လို့ ဒေသခံ တစ်ဦးက ပြောပါတယ်။
လက်ရှိအချိန်အထိ အဲဒီ အလောင်း ၂ လောင်းဟာ ဘယ်သူတွေ ဖြစ်တယ်ဆိုတာနဲ့ ဘယ်သူက ရှင်းလင်းခဲ့လဲ ဆိုတာ မသိရသေးဘူးလို့ Dawei Information Center က ထုတ်ပြန်ထားပါတယ်။
MK-003
