မဲခေါင်၊ မတ် ၅
ရန်ကုန်တိုင်း၊ စမ်းချောင်းမြို့နယ်၊ ဒဂုံစင်တာ၂ ရှေ့မှာ ဒီနေ့ မတ်လ ၅ရက် မနက်ပိုင်းက စစ်ကောင်စီတပ်တွေ ရောက်ရှိလာပြီး လမ်းသွားလမ်းလာလူအချို့ထံကနေ ဖုန်းစစ်ဆေးကာ လူငယ် ၃ဦးကို ဖမ်းဆီးသွားတယ်လို့ မျက်မြင်တွေ့သူတစ်ဦးက မဲခေါင်သတင်းကိုပြောပါတယ်။
“ မနက်၁၀ နာရီလောက်မှာ ဒဂုံစင်တာရှေ့က လူနားတဲ့နေရာကို စစ်သားတွေရောက်လာတယ်။ ပြီးတော့သူတို့တွေ ဖုန်းတောင်းပြီး လိုက်စစ်နေတာ။ ပြည်သူ ၃ယောက်ကိုတော့ ဖုန်းစစ်ပြီး သူတို့ကားပေါ်တင်ပြီးဖမ်းသွားတယ်။ အချိန်၁၀မိနစ်ကျော်လောက် စစ်ဆေးပြီးတော့သူတို့တွေလဲ ပြန်ထွက်သွားတာတွေ့တယ်။ ဘာလို့ဖမ်းတာလဲတော့မသိဘူး။ အနားလည်းသွားပြီးမကြည့်ရဲလို့ပါ” လို့ သူကပြောပါတယ်။
ဒီနေ့မနက်ပိုင်းမှာ စမ်းချောင်းမြို့နယ် စမ်းချောင်းလမ်းမပေါ်ရှိ ဝင်းစတားစားသောက်ဆိုက်ရှေ့မှာလည်း စစ်ကားတစ်စီးအင်အားအပြည့်နဲ့ လက်နက်တွေကိုင်ဆောင်ပြီး စောင့်ကြည့်မှုတွေရှိနေတယ်လို့ ရပ်ကွက်နေပြည်သူတွေက ပြောပါတယ်။
အလားတူ လှိုင်မြို့နယ် အင်းစိန်လမ်းမ သံလမ်းမှတ်တိုင်အနီးမှာလည်း ဒီနေ့ညနေ၄ နာရီကျော်က လူငယ်တစ်ဦးမောင်းနှင်လာတဲ့ကားကို စစ်ကောင်စီတပ်တွေ ၁၅ ယောက်လောက်က ကြမ်းကြမ်းတမ်းတမ်း စစ်ဆေးနေတယ်လို့ ဒေသခံတစ်ဦးကပြောပါတယ်။
ကမာရွတ်မြို့နယ်မှာလည်း စစ်ကောင်စီတပ်သားတွေ ဒီနေ့ညနေ၄နာရီကျော်က ဦးထွန်းလင်းခြံလမ်အတွင်း အနက်ရောင်ဝတ်ထားတဲ့ လူငယ်များတွေထံကနေ ဖုန်းနဲ့အိတ်တွေက စစ်သား၅ယောက်က လိုက်လံတောင်းယူစစ်ဆေးနေတယ်လို့ မျက်မြင်တွေ့သူတစ်ဦးကပြောပါတယ်။
MK-005