မဲခေါင်၊ ဇန်နဝါရီ ၂၇
ရန်ကုန်တိုင်း အတွင်းရှိ မြို့နယ်အချို့မှာ လက်နက်ခဲယမ်းနဲ့ ဗုံးသီးတွေ ဖမ်းမိတယ်လို့ စစ်ကောင်စီပိုင် မီဒီယာတွေမှာ သတင်းထုတ်လွှင့်မှုတွေ ပြုလုပ်နေတယ်လို့ ဒေသခံတွေက ပြောပါတယ်။
ဇန်နဝါရီ ၂၆ ရက် ညနေ ၄ နာရီခွဲက ရွှေပြည်သာမြို့နယ်က နေအိမ် တစ်လုံး အတွင်း စစ်တပ်က ဝင်ရောက် ရှာဖွေရာ မြေကြီးထဲ ကြွပ်ကြွပ်အိပ်နဲ့ ထည့်မြှုပ်ထားတဲ့ ပစ္စတို တစ်လက်၊ ကျည်အိမ် တစ်ခု၊ ပွိုင့် ၃၈၀ ကျည် ၄ တောင့် တွေ့ရှိခဲ့လို့ အိမ်ရှင်ဖြစ်သူကို ဖမ်းဆီးခဲ့တယ်လို့ စစ်တပ်ပိုင် မီဒီယာတွေမှာ ဖော်ပြထားပါတယ်။
“ ရပ်ကွက်နဲ့ လမ်း နာမည်တောင် မပါဘူး။ သက်သက်ဝါဒဖြန့်နေတာ။ ဘာမှလည်း ဖမ်းမိတယ် မကြားပါဘူး။ သူတို့လား နည်းနည်းမိရင်တောင် မပေါ်သေးတာနဲ့ ပေါင်းထည့်မှာ။ မနေ့ကတော့ ရှင်စောပု ပန်းခြံနားက အိမ်မီးလောင်တာပဲ ဖြစ်တယ်။ လုယက်မှုတွေကတော့ နေ့တိုင်း ဖြစ်နေတာပါ” လို့ စစ်ကောင်စီရဲ့ လက်နက်ဖမ်းမိမှု သတင်းဖော်ပြချက်နဲ့ ပတ်သက်လို့ ဒေသခံ တစ်ဦးက ဝေဖန်ပါတယ်။
ဒါ့အပြင် စမ်းချောင်းမြို့နယ်၊ ဗားကရာလမ်းက ဘုန်းကြီးကျောင်းမှာ ဇန်နဝါရီ ၂၅ ရက် ည ၈ နာရီခွဲက အမှိုက်ကန်ထဲ ဗုံးသီးတွေနဲ့ သေနတ် တွေ့ရှိခဲ့တယ်လို့ စစ်တပ်ပိုင် မီဒီယာတွေက ဝါဒဖြန့် သတင်းတွေ ဖော်ပြထားတယ်လို့ ဒေသခံ ပြည်သူ တစ်ဦးက ပြောပါတယ်။
ဗုံးသီးနဲ့ လက်နက် ရှာတွေ့ခဲ့တဲ့ နေရာသို့ ည ၉ နာရီခွဲမှသာ စစ်တပ်က လာရောက် လမ်းပိတ်ကာ သာမန် စစ်ဆေးမှု အချို့ ပြုလုပ်ပြီးနောက် ည ၁၀ နာရီကျော်မှာ ပြန်လည် ထွက်ခွာသွားရာ ဖမ်းဆီးခံရသူ မရှိခဲ့ဘူးလို့ မျက်မြင် တွေ့သူ တစ်ဦးက ပြောပါတယ်။
အခုလို လက်နက်တွေ မိတယ်လို့ စစ်တပ်က ဝါဒဖြန့်နေတာဟာ ရန်ကုန် မြို့ပြပြောက်ကျားတွေကို အဓိက ဖမ်းဆီးနေတဲ့ အမှတ်(၁) စစ်ဘက်ရေးရာ လုံခြုံရေး အကူတပ် စစ်ကြောရေး တာဝန်ခံ စရက(၁) တပ်မှူး ဗိုလ်မှူးသန်းထွဋ် (ဒုဗိုလ်မှူးကြီး အစမ်းခန့်)နဲ့ တပ်ကြပ်ကြီး မြင့်အောင်တို့ ရန်ကုန်- မန္တလေး အမြန်လမ်းပေါ်မှာ ဇန်နဝါရီ ၂၂ ရက် နေ့လယ်က ပစ်သတ် ခံခဲ့ရပေမယ့် အခြေအနေတွေကို ထိမ်းချုပ်နိုင်တယ်ဆိုတာ ပြသဖို့ ဝါဒဖြန့်မှု အဖြစ် သုံးသပ်မှုတွေ ရှိနေပါတယ်။
MK-005
ဓာတ်ပုံ – ပုံဟောင်း ဖြစ်ပါတယ်။