မဲခေါင်၊ ဇန်နဝါရီ ၂၇
ရန်ကုန်တိုင်း၊ တောင်ဒဂုံမြို့နယ် (၁၈) ကွေ့ မီးပွိုင့်အနီးမှာ ဖွင့်လှစ်ထားတဲ့ Grand Yangon ဆေးရုံကို စစ်သား၊ ရဲ၊ ရပ်ကွက်အုပ်ချုပ်ရေးမှူးနဲ့ ရုံးဝန်ထမ်းတွေ ဝင်ရောက်ရှာဖွေ စစ်ဆေးမှုတွေ လုပ်ခဲ့တယ်လို့ ဒေသခံတွေက ပြောပါတယ်။
ဇန်နဝါရီ ၂၆ ရက် မနက် ၁၁ နာရီ ဝန်းကျင်က စစ်ကား၊ ရဲကားနဲ့ အိမ်စီးကားတွေ ဆေးရုံသို့ ရောက်ရှိလာပြီးနောက် စစ်ဆေးမှုတွေ လုပ်ခဲ့တာ ဖြစ်တယ်လို့ မျက်မြင်တွေ့သူ တစ်ဦးက ပြောပါတယ်။
“ အားလုံး ပေါင်းကြည့်ရင် လူ ၁၀၀ ကျော်လောက်ရှိမယ်။ အဲ့လောက် အများကြီးနဲ့ ရပ်ကွက်တွေထဲ မဝင်ဖူးပါဘူး။ ကြားတာတော့ CDM ဆရာဝန်တွေ ရှိမရှိလာပြီး စစ်ဆေးကြတာလို့ ပြောတယ်။ ဖမ်းဆီး ခံရတာတော့ သေချာ မသိသေးဘူး” လို့ သူကပြောပါတယ်။
အလားတူ တောင်ဒဂုံမြို့နယ် (၂၅) ရပ်ကွက်မှာ ဖွင့်လှစ်ထားတဲ့ အေးချမ်းစေ ဆေးခန်းနဲ့ ကြယ်စင်သစ် ဆေးခန်းတို့ကို ရပ်ကွက်အုပ်ကြီး ကျော်နိုင်နဲ့ ရဲဝန်ထမ်းတွေ မနေ့က မနက် ၁၀ နာရီကျော်မှာ ဝင်ရောက် စစ်ဆေးမှုတွေလုပ်ခဲ့ပြီး ဖမ်းဆီးခံရသူတော့ မရှိဘူးလို့ မျက်မြင်တွေ့သူ တစ်ဦးက ပြောပါတယ်။
ဒါ့အပြင် သာကေတမြို့နယ် အတွင်းမှာ ဖွင့်လှစ်ထားတဲ့ ဆေးရုံနဲ့ ဆေးခန်း အချို့ကိုလည်း စစ်ကောင်စီတပ် အင်အား အများအပြားနဲ့ CDM ဆရာဝန်တွေ ရှိမရှိ ဇန်နဝါရီ ၂၅ ရက်နေ့က ဝင်ရောက် စစ်ဆေးမှုတွေ လုပ်ခဲ့တယ်လို့ ဒေသခံတွေက ပြောပါတယ်။
စစ်ကောင်စီ အနေနဲ့ ရန်ကုန်တိုင်း အတွင်း ပုဂ္ဂလိက ဆေးရုံဆေးခန်းတွေမှာ CDM ဆရာဝန်တွေ ရှိမရှိ စီမံချက်နဲ့ စစ်ဆေးနေတယ်လို့ သတင်းတွေ ထွက်ပေါ်နေပါတယ်။
MK-005
