မဲခေါင်၊ ဇန်နဝါရီ ၁၆
သက်တမ်းကုန်ဆုံးမယ့် မော်တော်ယာဉ်နဲ့ ဆိုင်ကယ်တွေကို ယာဥ်စစ်ဆေးပြီးမှသာ မော်တော်ယာဥ် သက်တမ်းတိုးပေးတော့မယ်လို့ စစ်ကောင်စီ လက်အောက်ခံ ကုန်းလမ်းပို့ဆောင်ရေး ညွှန်ကြားမှုဦးစီးဌာနက ထုတ်ပြန်ထားပါတယ်။
ပြီးခဲ့တဲ့ ၂ နှစ်ကျော်နီးပါးကတည်းက ယာဉ်လိုင်စင်သက်တမ်းတိုးရာမှာ ယာဉ်စစ်ဆေးခြင်းမပြုတော့ဘဲ လိုအပ်တဲ့စာရွက်စာတမ်းနဲ့သာ သက်တမ်းတိုးပေးခဲ့ပေမယ့် မတ်လကုန် က စတင်ပြီး ယာဉ်စစ်ဆေးမှုတွေ လုပ်ဆောင်တော့မယ်လို့ သိရပါတယ်။
“ ကိုဗစ်တွေတအားဖြစ်တော့ သက်တမ်းတိုးတာမှာ ယာဉ်စစ် မရှိတော့ဘူး။ အခုပြန်စစ်ဖို့ လုပ်နေကြတယ်။ ကိုယ့်ကားကိုချိန်းထားတာ အရောင်ပြောင်းထားတာဆို ကြိုတင်လုပ်သင့်တာလုပ်ရမယ် ဒဏ်ကြေးက သူတို့ခေတ်ဆိုတော့ ပါးစပ်ထဲ ရှိတဲ့အတိုင်းတောင်းမှာလို့” ကညန ရုံးနဲ့နီးစပ်သူသတင်းရင်းမြစ်က ပြောပါတယ်။
ယာဉ်စစ်ဆေးတာကို ရန်ကုန်တိုင်းက ခရိုင်အလိုက်လုပ်ဆောင်သွားမယ့်အပြင် တစ်နိုင်ငံလုံးအတိုင်းအတာ နဲ့ ပြည်နယ်တိုင်းအလိုက် လုပ်ဆောင်ဖို့ညွန်ကြားချက် ထွက်ရှိထားတယ်လို့ သိရပါတယ်။
ယာဉ်စစ်ကင်းလွတ်နဲ့ သက်တမ်းတိုးပေးတာတွေကို ပြီးခဲ့တဲ့ ၂၀၂၁ ခုနှစ်၊ မတ်လက စတင်ပြီး ဆောင်ရွက်ပေးခဲ့ကာ ၂၀၂၁ ခုနှစ် စက်တင်ဘာလမှာ တစ်ကြိမ်၊ ဒီဇင်ဘာလမှာ တစ်ကြိမ် ၊ ၂၀၂၂ ခုနှစ်၊ ဇွန်လမှာ တစ်ကြိမ် နဲ့ စက်တင်ဘာလမှာ တစ်ကြိမ် ယာဉ်စစ်ကင်းလွတ်ခွင့်ကို ဖြေလျှော့ပေးခဲ့တယ်လို့ သိရပါတယ်။
MK-006