မဲခေါင်၊ မေ ၅
ရှမ်း-ကရင်နီ နယ်စပ် စစ်မြေပြင် အရေးပေါ် ကယ်ဆယ်ရေးမှာ အသုံးပြုဖို့ အတွက် လူနာတင်ကားတွေ ပြန်လည် ဖြည့်တင်းဖို့ MOBYE PDF RESCUE TEAM -MPRT က ပြုလုပ်တဲ့ “ရှေ့ပြေး “ကား” ကူ သိန်း ၅၀၀ လှူ” ကမ်ပိန်း ၂ ပတ်ကျော် ကြာတဲ့အထိ ၁၀ ရာခိုင်နှုန်းသာ ရရှိသေးတယ်လို့ သိရပါတယ်။
MPRT အဖွဲ့ဟာ တိုက်ပွဲတွင်း ဒဏ်ရာရ ရဲဘော်တွေကို သယ်ယူ ကယ်ဆယ်ရေး အဓိက လုပ်နေတဲ့ အဖွဲ့ ဖြစ်ပြီး ကမ်ပိန်းကို ဧပြီ ၂၀ ရက်နေ့မှာ စတင်ခဲ့ရာ အချိန်ကာလ တစ်လ သတ်မှတ်ထားတယ်လို့ သိရပါတယ်။
“အခုရလဒ်ကို အားမရပါဘူး။ ကျွန်တော်တို့ အဖွဲ့က ကမ်ပိန်းကို အခုမှ စလုပ်တာလည်း ဖြစ်လို့ပါ။ လက်ရှိမှာတော့ ကားငှားသုံး နေရပါတယ်။ ဆေးဝါးကတော့ ရှိနေသေးပါတယ်ဗျ။ အရင်ကလည်း တော်တော်များများကို ဝယ်စုထားပါတယ်ဗျ” လို့ MPRT အဖွဲ့ ပြန်ကြားရေး တာဝန်ရှိသူက မဲခေါင်သတင်းဌာနကို ပြောပါတယ်။
စစ်ကောင်စီရဲ့ လေကြောင်း တိုက်ခိုက်မှုကြောင့် MPRT အဖွဲ့ရဲ့ ကား ၂ စီး ပျက်စီးဆုံးရှုံး ခဲ့ရတဲ့အပြင် ကယ်ဆယ်ရေး ရဲဘော် ၃ ဦး ဒဏ်ရာရထားတာကြောင့် အချိန်ယူကာ ကမ်ပိန်း ပြုလုပ်နေရတယ်လို့ ဆိုပါတယ်။
“ကမ်ပိန်း အမြန်ပြည့်မီမှသာ တိုက်ပွဲဆင်နေတဲ့ ထိခိုက်ရဲဘော်တွေကို ကယ်ထုတ်နိုင်မှာဖြစ်လို့ သွေးသံတရဲရဲ ငြီးငြူနေရတဲ့ ရဲဘော်တွေ အတွက် ရှေ့ပြေး ကယ်ဆယ်ရေးကားက ဖြေသာစရာ တစ်ခုပါ။ ရဲဘော်တွေကို သနားပါ” လို့ MPRT ပြန်ကြားရေး တာဝန်ရှိသူက ဆက်ပြောပါတယ်။
မိုးဗြဲ PDF ကယ်ဆယ်ရေးအဖွဲ့ရဲ့ “ရှေ့ပြေး “ကား” ကူ သိန်း (၅၀၀) လှူ” ကမ်ပိန်းကို MOBYE PDF RESCUE TEAM-MPRT လူမှုကွန်ရက် စာမျက်နှာက တဆင့် NUG pay၊ KBZ pay၊ Wave pay၊ USD၊ SGD၊ PayPal၊ Zelle၊ Thai bank တို့ကနေ ပါဝင်နိုင်တယ်လို့ သိရပါတယ်။
လက်ရှိ စစ်တပ် စစ်ကြောင်းထိုးမှုကြောင့် ရှမ်း-ကရင်နီ နယ်စပ် တစ်လျှောက် အပါအဝင် ကရင်နီပြည်၊ ဒီးမော့ဆိုမြို့နယ်မှာ တိုက်ပွဲတွေ ဖြစ်ပွားနေပြီး ဧပြီလ အတွင်း တိုက်ပွဲ အကြိမ် ၅၀ ထက်မနည်း ဖြစ်ပွားခဲ့တယ်လို့ KNDF က မေလ ၃ ရက်နေ့မှာ ထုတ်ပြန်ထားပါတယ်။
MK-009
#MeKongNews
#မိုးဗြဲ-PDF
#ကယ်ဆယ်ရေး
#KNDF