မဲခေါင်၊ ဖေဖော်ဝါရီ ၁၃ရက်
ရှမ်းပြည်တောင်ပိုင်း၊ မိုင်းရှူးမြို့နယ် တောင်ပေါ်ကျေးရွာတွေမှာ စစ်ကောင်စီတပ်ဖွဲ့က အိမ်တိုင်းရာရောက် အိမ်ထောင်စုစာရင်းတွေကို လိုက်လံပြုစုနေတယ်လို့ ဒေသခံတစ်ဦးက ပြောပါတယ်။
ကျေးရွာအုပ်ချုပ်မှူးတွေကိုခေါ်ပြီး အိမ်ထောင်လူဦးရေစားရင်တွေကို လိုက်လံပြုစု ပူပေါင်းပေးဖို့ မနေ့ ဖေဖော်ဝါရီ ၁၁ ရက်နေ့မှာ ပြောခဲ့ပါတယ်။
“ စစ်မှုထမ်းဥပဒေ ထုတ်ပြီးနောက်နေ့မှာပဲ အုပ်စု အုပ်ချုပ်ရေးမှူးတွေကို အစည်းအဝေးခေါ်တယ်။ သူတို့နဲ့ပူပေါင်းပေးဖို့ပေါ့။ အိမ်ထောင်စာရင်းတွေလည်း သူတို့စယူနေပြီး လူထုတွေရဲ့ အခြေအနေတော့ စောင့်ကြည့်ရဦးမယ် ” လို့ပြောပါတယ်။
စစ်ကောင်စီတပ်ဖွဲ့ထဲကို စစ်မှုထမ်းဖို့ ပညာမတက်တဲ့ ကျေးရွာတွေကို ဦးစားပေးပြီး စာရင်းတွေယူနေတယ်လို့ သူကဆိုပါတယ်။
စစ်မှုထမ်းဖို့ မလိုလားတဲ့အတွက်ကြောင့် ပြည်ပကိုထွက်ခွာလာတဲ့ ဒေသခံတွေပိုများလာတယ်လို့ နောက်ထပ် ဒေသခံတစ်ဦးကပြောပါတယ်။
“ စစ်ကောင်စီတွေရဲ့ အကြောင်းသိတဲ့သူတွေကတော့ ဒါကိုလုံးဝလက်မခံနိုင်ဘူး အဲ့တာကြောင့်လဲ မိသားစုလိုက်ပြောင်းလာခဲ့တယ်။ တောင်ပေါ်တွေမှာက ပညာမတတ်တဲ့သူတွေ အသက်မပြည့်တဲ့သူတွေ စားဝတ်နေရေး အခက်အခဲဖြစ်တဲ့သူတွေပဲ ကျန်တော့တယ်။ သူတို့လဲ သနားတာကလွဲလို့ ကူညီနိုင်မှာ မဟုတ်ဘူး” လို့ ပြောပါတယ်။
အခုလို လူဦးရေစာရင်းလိုက်ကောက်တာဟာ ရွေးကောက်ပွဲအတွက် လူဦးရေစာရင်းနဲ့ မဲပေးနိုင်တဲ့သူ စာရင်းတွေလိုက်ကောက်တာဖြစ်ပြီး စစ်မှုထမ်းဥပဒေနဲ့ မသက်ဆိုင်ဘူးလို့ ရန်ကုန်တိုင်း၊ လှိုင်သာယာမြို့နယ်မှ အုပ်ချုပ်ရေးမှူးတစ်ဦးက ပြောပါတယ်။
“မဲစာရင်း လိုက်ကောက်တာပါ၊ စစ်မှုထမ်းဥပဒေကလည်း ပြဌာန်းလိုက်တော့ အဲ့ဒါပဲ ထင်နေကြပြီး မယုံကြတော့တာ” လို့ သူက ရှင်းပြပါတယ်။
အရွယ်ရောက်ပြီးသူတိုင်း စစ်မှုထမ်းရမယ့် ဥပဒေကို စစ်ခေါင်းဆောင်မင်းအောင်လှိုင်က ဖေဖော်ဝါရီ ၁၀ မှာ အသက်သွင်းလိုက်တာကြောင့် စစ်မှုထမ်းရမယ့်အရေး ပြည်သူတွေကြား ဂယက်ရိုက်နေကြပါတယ်။
တချိန်တည်းမှာပဲ တော်လှန်ရေးအဖွဲ့တွေကလည်း PDF တပ်သားတွေလိုတဲ့အကြောင်း ခေါ်ယူနေကြပါတယ်။
MK-011
#MeKongNews
#မိုင်းရှူး
#စစ်ကောင်စီ
#လူဦးရေစာရင်း
