မဲခေါင်၊ ဇန်နဝါရီ ၁
ရှမ်းပြည်နယ်မြောက်ပိုင်း၊ ကျောက်မဲမြို့နယ်၊ မိုင်းငေါ့မြို့ရှိ စစ်ကောင်စီရဲ့ ဗျူဟာမှူးအခြေချ ကွပ်ကဲနေတဲ့ တပ်စခန်းကို တိုက်ခိုက်သိမ်းယူ နိုင်ခဲ့တယ်လို့ တအာင်းအမျိုးသား လွတ်မြောက်ရေး တပ်မတော် (TNLA)က ထုတ်ပြန်ထားပါတယ်။
၁၀၂၇ စစ်ဆင်ရေးအရ ဒီဇင်ဘာလ ၂၉ ရက်နေ့မှာ စတင် တိုက်ခိုက်ခဲ့တာ ဖြစ်ပြီး ၃ ရက်ကြာပြီးနောက် ၃၁ ရက်နေ့ည ၁၂ နာရီ ဝန်းကျင်လောက်မှာ တပ်စခန်း ဗျူဟာကုန်း အပါအဝင်၊ ရဲစခန်းနဲ့ စစ်ကောင်စီ ဌာနဆိုင်ရာ ရုံးတွေ အားလုံးကို သိမ်းယူနိုင်ခဲ့တယ်လို့ ဆိုပါတယ်။
မိုင်းငေါ့မြို့ရှိ စစ်ကောင်စီ တပ်စခန်းဟာ စစ်ကောင်စီရဲ့ တပ်မ ၁၀၁ လက်အောက်ခံ ခြေလျှင်တပ်ရင်းတွေ ဖြစ်တဲ့ ခလရ – ၂၅၃၊ ခလရ – ၂၃၅ တို့က အထိုင်ချ စစ်ရေး လှုပ်ရှားနေပြီး တိုက်ပွဲအတွင်း စစ်ကောင်စီဘက်က ဂျက်ဖိုက်တာနဲ့ ၅ ကြိမ်၊ Y12 လေယာဉ်နဲ့ ၁၉ ကြိမ် လေကြောင်းကနေ ပစ်ခတ်ခဲ့တယ်လို့ ထုတ်ပြန်ချက်အရ သိရပါတယ်။
ဒါ့အပြင် မိုင်းငေါ့တပ်စခန်းနဲ့ ကျောက်မဲမြို့ တပ်စခန်းကနေလည်း လက်နက်ကြီးနဲ့ အကြိမ် ၅၀ ထက်မနည်း မြို့ထဲကို ရမ်းသန်း ပစ်ခတ်ခဲ့တယ်လို့ ဆိုပါတယ်။
တိုက်ပွဲ ၃ ရက်တာ ကာလအတွင်း စစ်ကောင်စီရဲ့ လေကြောင်း တိုက်ခိုက်မှုနဲ့ လက်နက်ကြီး ရမ်သန်း ပစ်ခတ်မှုတွေကြောင့် မြို့ခံ အရပ်သား ၂ ဦး သေဆုံးခဲ့ပြီး ၅ ဦး ဒဏ်ရာ ရရှိခဲ့တဲ့အပြင် ဘာသာရေး အဆောက်အဦးနဲ့ လူနေအိမ် (၁၉) လုံး မီးလောင်ပြာကျ ပျက်စီးခဲ့တယ်လို့ ထုတ်ပြန်ချက်မှာ ပါရှိပါတယ်။
တိုက်ပွဲမဖြစ်ပွားမီ ရက်တွေက စစ်ကောင်စီတပ်ဟာ MI 17ထောက်ပို့လေယာဉ်နဲ့ လက်နက်အင်အား၊ လူအင်အား စစ်ကူတွေကို ၃ ကြိမ်တိတိ လာရောက်ပို့ဆောင်ခဲ့တယ်လို့ ဆိုပါတယ်။
တိုက်ပွဲအပြီးမှာ စစ်ကောင်စီရဲ့ လက်နက် ခဲယမ်းအပါအဝင် မိုင်း၊ စစ်အသုံးအဆောင် ပစ္စည်းတွေကို သိမ်းဆည်းနိုင်ခဲ့ပြီး ၁၂၀၇ စစ်ဆင်ရေး ဒီနေ့ (ဇန်နာဝါရီလ ၁) အထိ နမ့်ဆန်၊ နမ့်ခမ်း၊ မန်တုံ၊ နမ္မတူ၊ မိုင်းလုံ စတဲ့မြို့တွေက စစ်ကောင်စီတပ်စခန်းတွေကို TNLA အနေနဲ့ သိမ်းပိုက်ထားနိုင်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
CJ-007
#MeKongNews
#မိုင်းငေါ့
#TNLA
#စစ်ကောင်စီ
#သိမ်းပိုက်
#တအာင်း
#ဗျူဟာ