မဲခေါင်၊ ဇန်နဝါရီ ၂၁
စစ်ကောင်စီ တပ်စွဲထားတဲ့ မယ်စလောင်းတောင် စခန်းကုန်းကို သိမ်းပိုက်နိုင်ခဲ့ပြီး စစ်သား အလောင်း ၅ လောင်းနဲ့ လက်နက်တွေ သိမ်းဆည်းရမိတယ်လို့ KNDF ဗဟို သတင်းနဲ့ ပြန်ကြားရေးဌာနက ဒီကနေ့ ထုတ်ပြန်ပါတယ်။
ကရင်နီပြည်နယ်၊ ဘောလခဲမြို့နယ် နန်းဖဲကျေးရွာ အနီးရှိ မယ်စလောင်း တောင်ကုန်းပေါ်မှာ အခိုင်အမာ တပ်ချထားတဲ့ စစ်တပ်စခန်းကို မနေ့က မနက် ၇ နာရီ ၅၀ မိနစ်မှစပြီး Karenni Commando၊ KA၊ KNDF B(15)၊ KNDF B(16)၊ KNDF B (09)၊ Loikaw PDF၊ DMO PDF တို့ ပူးပေါင်း တိုက်ခိုက်ခဲ့တာပါ။
မနက် ၉ နာရီခွဲအထိ တိုက်ပွဲတွေ ဖြစ်ပွားခဲ့ပြီး ကရင်နီ ပူးပေါင်းတပ်ဖွဲ့ မယ်စလောင်းတောင် စခန်းကုန်းကို ချေမှုန်း သိမ်းပိုက်နိုင်ကာ စခန်းအတွင်း စစ်သား ၅ ဦးရဲ့ ရုပ်အလောင်းတွေကို ရှင်းလင်းခဲ့ရပြီး ကျန်တပ်ဖွဲ့ဝင်တွေ စခန်းကို စွန့်ခွာ ထွက်ပြေးသွားတယ်လို့ သိရပါတယ်။
စခန်းသိမ်း တိုက်ပွဲ အတွင်း စစ်တပ်က တိုက်လေယာဉ် တစ်စီးနဲ့ ၃ ကြိမ် လာရောက် ပစ်ကူပေးခဲ့သလို ဘောလခဲမြို့ အခြေစိုက်တပ်တွေကလည်း လက်နက်ကြီးတွေ အဆမတန် ပစ်ကူပေးခဲ့တယ်လို့ သိရပါတယ်။
တိုက်ပွဲအပြီး စစ်ကောင်စီတပ်ဖွဲ့တွေ အသုံးပြုခဲ့တဲ့ ၆၀ မမ စိန်ပြောင်း ၂ လက်၊ RPG တစ်လက်၊ MA-1 တစ်လက်၊ MA -2 တစ်လက်၊ MA-3 တစ်လက်၊ MA-4 79 တွဲ တစ်လက်၊ 9mm တစ်လက်၊ ငါကြင်းမြီး တစ်လက်၊ စနိုက်ပါ တစ်လက်၊ မိုင်းတွေ၊ ခဲယမ်းကျည်ဆံတွေနဲ့ အခြား အသုံးအဆောင် ပစ္စည်းတွေ သိမ်းဆည်း ရရှိခဲ့တယ်လို့ သိရပါတယ်။
မယ်စလောင်းတောင် တိုက်ပွဲအတွင်း ကရင်နီတပ်မတော်-KA ရဲဘော် တစ်ဦး မြင့်မြတ်စွာ ကျဆုံးခဲ့ပြီး ကျဆုံးသွားတဲ့ ရဲဘော်ကို KNDF မှ အာဇာနည် သူရဲကောင်းအဖြစ် လေးစား အသိမှတ်ပြု သမိုင်း မှတ်တမ်းတင်ထားပါတယ်။
ဘောလခဲမြို့နယ်အတွင်း စစ်ရေးအရ အရေးပါပြီး နှစ်ပေါင်းများစွာ အခိုင်အမာ တပ်ချကာ ခြေကုပ်ယူထားတဲ့ စစ်ကောင်စီရဲ့ မယ်စလောင်းတောင် စခန်းကုန်းကို ချေမှုန်း သိမ်းပိုက်နေစဉ် KA ၊ KNDF B (21 ၊ KNDF B (10)၊ ဘောလခဲ PDF တို့က ဘောလခဲမြို့တွင်းရှိ စစ်ကောင်စီရဲ့ ခြေကုပ်စခန်း အချို့ကို တိုက်ခိုက်ခဲ့ရာ ထိခိုက် သေဆုံးမှုကို အတည်မပြုနိုင်ဘဲ ပူးပေါင်းတပ်တွေဘက်က ထိခိုက်မှု မရှိခဲ့ဘူးလို့ သိရပါတယ်။
MK-003
