မဲခေါင်၊ ဖေဖော်ဝါရီ ၁၅
မကွေးတိုင်း အတွင်းရှိ စစ်ရေး ပစ်မှတ် ၁၉ ခုကို တပြိုင်တည်း တိုက်ခိုက်ခဲ့ရာ စစ်သား ၃၁ ဦး သေဆုံးခဲ့တယ်လို့ အမျိုးသား ညီညွတ်ရေး အစိုးရ၊ ကာကွယ်ရေးဝန်ကြီးဌာနက မနေ့က ထုတ်ပြန်ပါတယ်။
သရက်မြို့နယ်၊ မကွေးမြို့နယ်၊ စလင်းမြို့နယ်၊ ဆိပ်ဖြူမြို့နယ်၊ ပေါက်မြို့နယ်၊ ရေစကြို မြို့နယ်၊ ဆောမြို့နယ်၊ ထီးလင်းမြို့နယ်၊ ဂန့်ဂေါမြို့နယ်တို့ရှိ စစ်သားတွေ တပ်စွဲထားရာ နေရာတွေကို မဟာဗျူဟာ ကျကျ တိုက်ခိုက်ခဲ့တယ်လို့ NUG ကာကွယ်ရေးဝန်ကြီးဌာနက ဆိုပါတယ်။
ဖေဖော်ဝါရီလ ၈ ရက်နဲ့ ၉ ရက်နေ့တွေမှာ စစ်ရေး ပစ်မှတ်တွေကို အမှတ် (၁) စစ်ဒေသ၊ သက်ဆိုင်ရာ ခရိုင်ကွပ်ကဲရေးအဖွဲ့တွေရဲ့ ကွပ်ကဲမှုနဲ့ မဟာဗျူဟာကျကျ ဟန်ချက်ညီညီ တိုက်ခိုက်နိုင်ခဲ့တာဖြစ်ပြီး တိုက်ပွဲတွေ အတွင်း စစ်ကောင်စီတပ်သား ၃၁ ဦး သေဆုံးခဲ့တယ်လို့ သိရပါတယ်။
ဒါ့အပြင် စစ်သား အများအပြား ထိခိုက်ဒဏ်ရာရခဲ့ပြီး စစ်တပ်ရဲ့ ပင်မ အဆောက်အအုံတွေ၊ ဘားတိုက်တွေ ပျက်စီးကာ ကား၊ လက်နက်ငယ်၊ ကျည်ဆံနဲ့ စစ်အသုံးအဆောင်တွေ သိမ်းဆည်းရရှိခဲ့တယ်လို့ ဆိုပါတယ်။
တိုက်ခိုက်ခဲ့တဲ့ စစ်ရေး ပစ်မှတ်တွေမှာ သရက်မြို့နယ်ရှိ အမှတ် (၁၂) ကာကွယ်ရေး ပစ္စည်းစက်ရုံ၊ ရေမျက်နီ ရဲစခန်း၊ မကွေးမြို့နယ်ရှိ မကွေးလေတပ်စခန်း ဌာနချုပ်၊ စလင်းမြို့နယ်ရှိ ခလရ (၂၅၃)၊ (၂၅၄)၊ (၂၅၅)၊ ကံပြားရဲစခန်း၊ ဆိပ်ဖြူမြို့နယ်ရှိ လေကြောင်းရန် ကာကွယ်ရေး တပ်မ (၉)၊ အမှတ် (၂၁) ကာကွယ်ရေးပစ္စည်း စက်ရုံ အနီးရှိ ရန်သူ့ကင်းပုန်းစခန်း၊ အမှတ် (၂၂) ကာကွယ်ရေးပစ္စည်းစက်ရုံ၊ ပေါက်မြို့နယ်ရှိ ကိုင်းလယ်ရဲစခန်း၊ ပခုက္ကူမြို့နယ် စီးကောင်းရွာ ရန်သူ့အထိုင်စခန်း၊ ရေစကြိုမြို့နယ် ဇီးတောရွာ အခြေစိုက် ပျူစောထီးစခန်း၊ ဆောမြို့နယ်ရှိ အမှတ် (၂၅) ကာကွယ်ရေးပစ္စည်းစက်ရုံ၊ လောင်းရှည်ရဲစခန်းကုန်း၊ ညောင်နီချောင်း ရဲစခန်းကုန်း၊ ယွန်းချောင်း၊ စက်တော်ရာကုန်း၊ မီးသတ်ကုန်း၊ ထီးလင်းမြို့ စစ်တပ် တပ်စွဲထားတဲ့ မြို့နယ်အထွေထွေ အုပ်ချုပ်ရေးမှူးရုံး၊ ဂန့်ဂေါမြို့နယ် မင်းရွာရဲစခန်းတို့ ဖြစ်တယ်လို့ သိရပါတယ်။
စစ်ဆင်ရေးကို ပြည်သူ့ကာကွယ်ရေး တပ်မတော် သရက်ခရိုင် တပ်ရင်းတွေ၊ မကွေးခရိုင် တပ်ရင်းတွေ၊ မင်းဘူးခရိုင်တပ်ရင်းတွေ၊ ပခုက္ကူခရိုင်တပ်ရင်းတွေ၊ ဂန့်ဂေါခရိုင်တပ်ရင်းတွေ၊ စစ်ကိုင်းခရိုင်တပ် ရင်းတွေ၊ မြင်းခြံခရိုင်တပ်ရင်းတွေ၊ ပြည်သူ့ကာကွယ်ရေးအဖွဲ့-ရေနံချောင်း၊ မင်းဘူး၊ ပွင့်ဖြူ၊ ထီးလင်း၊ ဆိပ်ဖြူမြို့နယ် ဘာမထီအဖွဲ့နဲ့ ဒေသကာကွယ်ရေးအဖွဲ့တွေ တိုက်ခိုက်ခဲ့တာ ဖြစ်ပြီး ပြည်သူ့ ကာကွယ်ရေးတပ်ဖွဲ့ဝင်အချို့ ထိခိုက်ဒဏ်ရာ ရရှိခဲ့တယ်လို့ သိရပါတယ်။
MK-003
#MeKongNews
#မကွေးတိုင်း #MOD #စစ်ရေးပစ်မှတ်