မဲခေါင်၊ မတ် ၁၉
ကရင်နီပြည်၊ ဘောလခဲမြို့နယ်၊ ရေနီပေါက်ကျေးရွာ ကြိုးတံတားကနေ စစ်ကြောင်းထိုးလာတဲ့ စစ်ကောင်စီတပ်နဲ့ မတ်လ ၁၆ ရက်က တိုက်ပွဲ ဖြစ်ပွားရာ စစ်သား ၃ ဦးသေဆုံးကာ ၁၀ ဦးထက်မနည်း ဒဏ်ရာရခဲ့တယ်လို့ အလယ်ပိုင်းတိုင်း ဒီးမော့ဆို အမှတ် (၁၁၀၂) တပ်ရင်းက ဒီကနေ့ ထုတ်ပြန်လိုက်ပါတယ်။
ရေနီပေါက်ကျေးရွာ၊ ကြိုးတံတားကနေ မတ်လ ၁၆ ရက် မနက်ပိုင်းမှာ အင်အား ၁၂၀ ခန့်ရှိတဲ့ စစ်တပ် စစ်ကြောင်း ထိုးစစ်ဆင်လာတာကြောင့် ကာကွယ်ရေး ပူးပေါင်းတပ်တွေနဲ့ တိုက်ပွဲ ဖြစ်ပွားခဲ့တာပါ။
တိုက်ပွဲအတွင်း စစ်ကောင်စီတပ် လက်နက်ကြီး ပစ်ခတ်မှုကြောင့် ရေနီပေါက်ကျေးရွာ အတွင်းက ပြည်သူ နေအိမ် အများအပြား မီးလောင်ပျက်စီးခဲ့ပြီး ပြည်သူ ၄ ဦး လက်နက်ကြီး ထိမှန် ဒဏ်ရာရရှိခဲ့တယ်လို့ သိရပါတယ်။
၂ နာရီ ဝန်းကျင်ကြာ တိုက်ပွဲအပြီး အထိနာတဲ့ စစ်ကောင်စီတပ်ဟာ ကျေးရွာနေ ပြည်သူ ၇ ဦးကို ဓားစာခံ အနေနဲ့ ဖမ်းဆီး ခေါ်ေဆောင်သွားရာ ဒီကနေ့ထိ သတင်း ပျောက်နေတယ်လို့ ဆိုပါတယ်။
စစ်ကောင်စီတပ်ဟာ ကျေးရွာတွေ အတွင်းက ပြည်သူတွေကို ဖမ်းဆီး သတ်ဖြတ်လေ့ ရှိတာကြောင့် ဖမ်းဆီးခံ ပြည်သူ ၇ ဦးရဲ့ မိသားစုဝင်တွေက စိုးရိမ်နေကြတယ်လို့ ပြောပါတယ်။
အဆိုပါ တိုက်ပွဲကို အလယ်ပိုင်းတိုင်း စစ်ဒေသ အမှတ် (၃) ပြည်သူ့ကာကွယ်ရေး တပ်မတော် ဒီးမော့ဆို (၁၁၀၂) တပ်ရင်း DMO-PDF (P3-1102)၊ အလယ်ပိုင်းတိုင်း အမှတ် (၁၁၀၁)၊ (၁၁၀၄)၊ (၁၁၀၆)၊ (၁၁၀၇)၊ (၁၁၀၈) တပ်ရင်းနဲ့ KNDF B0-21 တို့ ပူးပေါင်း တိုက်ခိုက်ခဲ့တာဖြစ်ပြီး ပြည်သူ့ကာကွယ်တပ်ဘက်က ထိခိုက်ကျဆုံးမှု မရှိဘူးလို့ ဖော်ပြထားပါတယ်။
MK-007
#DMO-PDF