မဲခေါင်၊ အောက်တိုဘာ ၁၉
ရှမ်းပြည်နယ်တောင်ပိုင်း၊ မိုးဗြဲဒေသမှာ ဘီလူးချောင်းရေ မြင့်တက်လာလို့ စစ်ရှောင် ၁,၅၀၀ ၀န်းကျင်ဟာ မနေ့ကစပြီး နေရာပြောင်းရွှေ့နေရကာ အရေးပေါ် အကူအညီတွေ လိုအပ်နေတယ်လို့ မိုးဗြဲ စစ်ရှောင် တစ်ဦးက မဲခေါင်သတင်းဌာနကို ပြောပါတယ်။
ရှမ်းပြည်နယ် တောင်ပိုင်းမှာ မိုးဆက်တိုက် ရွာသွန်းပြီး အင်းလေးကန်နဲ့ ဆက်စပ်နေတဲ့ မိုးဗြဲ ရေကာတာက ရေလွှတ်ချမှုကြောင့် အခုလို ဘီလူးချောင်းရေ မြင့်တက်လာခဲ့တာ ဖြစ်ပါတယ်။
“ရေက မိုးရွာကတည်းက တက်လို့ အိမ်တွေထဲ ၀င်နေပြီ။ ရေကာတာက ရေလွှတ်နေတော့ ပိုဆိုးတာပေါ့။ အခုဆို ရေက ခေါင်မိုးကပ်တော့မယ်။ ဘယ်လိုမှ နေလို့ကို မရတော့ ပြောင်းရပြီပေါ့ရှင်” လို့ ဒေသတွင်း စစ်ရှောင်နေရသူ တစ်ဦးက ရှင်းပြပါတယ်။
လက်ရှိ မိုးဗြဲ ရေကာတာ ဆက်တိုက် ရေလွှတ်ချမှုကြောင့် ဘီလူးချောင်းရေ ၈ လက်မနီးပါး မြင့်တက်လာပြီး ချောင်းတစ်လျှောက် စစ်ရှောင်တွေ စိုက်ပျိုးထားတဲ့ ပြောင်းနဲ့ စပါးခင်းတွေ ရေနစ်မြုပ် ပျက်စီးကုန်တယ်လို့ နောက်ထပ် စစ်ရှောင် တစ်ဦးက ပြောပါတယ်။
“စပါးနဲ့ ပြောင်းတွေက ရိတ်ခါတော့ နီးနေပြီ။ ရလည်း မရသေးဘူး။ ဒီအချိန်က ရေများလို့ မရဘူး။ အခုတော့ သွားပြီ။ ရေများရုံ မဟုတ်ဘူး။ ရေပါမြုပ်နေပြီ။ အကုန်ပျက်ကုန်ပြီ” လို့ သူကရှင်းပြပါတယ်။
ဘီလူးချောင်း တစ်လျှောက်မှာ စစ်ရှောင်တွေ စိုက်ပျိုးထားတဲ့ ပြောင်းနဲ့ စပါးခင်း ဧက ထောင်နဲ့ချီရှိပြီး အကုန်လုံး နီးပါး ရေနစ်မြုပ် ပျက်စီးသွားပြီလို့ ဆိုပါတယ်။
မနေ့က လွိုင်ကော်မြို့ ဘီလူးချောင်း အနီးနားက ရပ်ကွက်နေ ပြည်သူတွေ ပြောင်းရွှေ့နေကြပါတယ်။
MK-007
#MeKhongNews
#မိုးဗြဲ
#ဘီလူးချောင်း
#စစ်ဘေးရှောင်