မဲခေါင်၊ မတ် ၉
ဘတ်တစ်သန်းအထိ ဆုငွေပေးမယ်လို့ ထိုင်းဘက်က ထုတ်ပြန်ထားတဲ့ မူးယစ်မှောင်ခိုသမား ကျီဆာဒါ ကို မြန်မာမူးယစ်ဆေးဝါးတားဆီးကာကွယ်ရေးတပ်ဖွဲ့ (DEA) က တာချီလိတ်မှာ ဖမ်းဆီးပြီး ထိုင်းအာဏာပိုင်တွေထံကို ဒီနေ့လွှဲပေးလိုက်ပါတယ်။
တာချီလိတ်-မယ်ဆိုင် အမှတ် (၂) ချစ်ကြည်ရေးတံတားကနေ ဒီနေ့မတ်လ ၉ ရက်နေ့မှာပဲ ပြန်လည် လွှဲအပ်ခဲ့တာပါ။
၂၀၁၆ ဇူလိုင် ၂၂ ရက်နေ့က ဒန်ချိုင်းခရိုင်၊ ဖရေးခရိုင်ခွဲစစ်ဆေးရေးဂိတ်ကို စိတ်ကြွရူးသွပ်ဆေးပြား အလုံး ၆၀၀၀၀ သယ်ဆောင်ဖြတ်သန်းတဲ့ ကားကို ဟိုင်းရိုင်ရဲတပ်ဖွဲ့ ဖမ်းဆီးရာမှာ ၃ ဦး ဖမ်းမိခဲ့ပြီး စေခိုင်းသူက ကျီဆာဒါဆိုသူဖြစ်ကြောင်း စုံစမ်းသိရှိခဲ့ရလို့ သတင်းပေးသူ၊ ဖမ်းဆီးပေးသူအတွက် ဘတ် ၁ သန်းအထိ ပေးမယ်လို့ ထိုင်းဘက်က ၀ရမ်းထုတ်ခဲ့တာဖြစ်ပါတယ်။
ဒါပေမဲ့ ကျီဆာဒါဟာ နယ်စပ်ဖြတ်ကူးသွားပြီး တာချီလိတ်မှာ Fight Bar ဆိုင်ဖွင့်လှစ်လို့ ဇိမ်ခံ ဟိုတယ်တစ်ခုဖြစ်တဲ့ 1G1 Hotel ဟိုတယ်မှာတည်းကာ သက်သောင့်သက်သာနဲ့ ဆက်လက် စီးပွားရှာနေခဲ့တယ်လို့ ဆိုပါတယ်။
ဒါကြောင့် မြန်မာအာဏာပိုင်တွေက ဟိုတယ်မှာ ကျီဆာဒါကို ဖမ်းဆီးကာ တရားမ၀င် နိုင်ငံဖြတ်ကျော်လာမှုနဲ့ တာချီလိတ်မှာ ထောင်ဒဏ် ၆ လ ချပြီး ထိုင်းဘက်ကို မတ် ၉ ရက်နေ့ မှာ ပြန်လည် လွှဲပြောင်းပေးအပ်လိုက်တာဖြစ်ပါတယ်။
လုပ်ထုံးလုပ်နည်းအရ ကျီဆာဒါကို ဖရေးခရိုင်၊ ဒန်ချိုင်းခရိုင်ခွဲက ဟိုင်းရိုင်ရဲစခန်းက ဆက်လက်တရားစွဲဆိုသွားမယ်လို့ သိရပါတယ်။
#MeKongNews
#တာချီလိတ် #မယ်ဆိုင်