မဲခေါင်၊ ဩဂုတ် ၂၂
ကရင်နီပြည်နယ်၊ ဖားဆောင်းမြို့နယ်၊ ကျောက်စုကျေးရွာမှာ စစ်ကောင်စီနဲ့ တော်လှန်ရေး အင်အားစုတို့ တိုက်ပွဲတွေ ပြင်းထန်နေပြီး စစ်ကောင်စီက ရွာလုံးကျွတ် မီးရှို့ဖျက်ဆီးသွားတယ်လို့ ကရင်နီ တော်လှန်ရေး အင်အားစုတွေနဲ့ နီးစပ်သူ NLD လွှတ်တော် အမတ်ဟောင်း ဦးသန်းလင်းလင်း က မဲခေါင်သတင်းဌာနကို ပြောပါတယ်။
ပြီးခဲ့တဲ့ ဇူလိုင်လ ၂၂ ရက်မှာ မယ်စဲ့၊ ဖားဆောင်းနဲ့ သံလွင်မြစ်ကမ်း ကာကွယ်ရေး အတွက် ကရင်နီ တော်လှန်ရေး အင်အားစုတွေ ကာကင်းအဖြစ် ပြုလုပ်ထားတဲ့ ကျောက်ပန်းညိုကျေးရွာနဲ့ ၀မ်အောင်း(ရှမ်း)ကျေးရွာက စခန်း ၃ ခုကို စစ်ကောင်စီက အင်အား ၃၀၀ ခန့်နဲ့ သိမ်းပိုက်ခဲ့ပြီးနောက် ကျောက်စုကျေးရွာကိုပါ ဆက်တိုက် ထိုးစစ်ဆင်လာတာ ဖြစ်ပါတယ်။
“ဩဂုတ် ၁၉ ရက် ညနေပိုင်းလောက် ဖြစ်မယ်။ ဖုန်းလိုင်းတွေက ပြတ်တောက်နေတော့ အသံက သိပ်မကြည်ဘူး။ ၁၉ ရက် ဒါမှမဟုတ် ၂၀ ပဲ။ စစ်ကြောင်း ၅ ကြောင်း အင်အား ၄၀၀ ကျော်လောက်တော့ ရှိမယ်။ အတင်း စစ်ကြောင်းထိုးပြီး ရွာလုံးကျွတ် မီးရှို့သွားတယ်” လို့ သူကရှင်းပြပါတယ်။
ဇူလိုင်လ တတိယ အပတ်တည်းက စစ်ကြောင်း ၃ ကြောင်း၊ အင်အား ၃၀၀ ခန့်နဲ့ စစ်ကောင်စီက ကျောက်စုကျေးရွာကို စစ်ကြောင်း ထိုးလာတာ ဖြစ်ပေမဲ့ ပြီးခဲ့တဲ့ ရက်ပိုင်းက စစ်ကြောင်း ၂ ကြောင်း ထပ်ဖြည့်ပြီး အင်အား ၄၀၀ ထက်မနည်း အသုံးပြုလာတာဖြစ် တယ်လို့ ဦးသန်းလင်းလင်းက ဆိုပါတယ်။
လက်ရှိ စစ်ကောင်စီဘက်က အင်အားသုံး စစ်ကြောင်းထိုးနေသလို ပြည်သူ့ကာကွယ်ရေးတပ်ဖွဲ့ဘက်က ပြန်လည် ခုခံနေတာကြောင့် တိုက်ပွဲတွေ ပြင်းထန်နေတယ်လို့ ဆိုပါတယ်။
လက်ရှိ ဖြစ်ပွားနေတဲ့ ကျောက်စုကျေးရွာ တိုက်ပွဲ အခြေအနေနဲ့ ပတ်သက်ပြီး ဖားဆောင်း PDF ပြောရေးဆိုခွင့်ရှိသူကို မဲခေါင်သတင်းဌာနက ဆက်သွယ်မေးမြန်းပေမဲ့ ဒေသတွင်း ဖုန်းလိုင်းတွေ ဖြတ်တောက်နေတာကြောင့် အခြေအနေ အသေးစိတ် မသိနိုင်သေးဘူးလို့ ဆိုပါတယ်။
ကျောက်စုကျေးရွာနဲ့ ဒေါနိုးကူး ဒုက္ခသည်စခန်းကို ပြီးခဲ့တဲ့ ဇူလိုင်လ ၁၁ ရက် ညသန်းခေါင်က စစ်ကောင်စီ လေကြောင်းသုံး ဗုံးကြဲ တိုက်ခိုက်ခဲ့တာကြောင့် အသက် ၁၁ နှစ်အရွယ် ကလေးငယ် တစ်ဦး သေဆုံးခဲ့ရသလို ဘာသာရေး အဆောက်အအုံ တစ်လုံး၊ လူနေအိမ် ၆ လုံးပျက်စီးခဲ့ရပါတယ်။
အဆိုပါ လေကြောင်း တိုက်ခိုက်မှုဖြစ်ပြီးနောက် ဒေသခံတွေ ကျောက်စုကျေးရွာမှာ အရေးပေါ် နေရာ ပြောင်းရွှေ့ခဲ့တာကြောင့် လက်ရှိ ကျောက်စုကျေးရွာမှာ လူသူကင်းမဲ့နေပြီး တိုက်ပွဲတွေကြား စစ်တလင်း ဖြစ်နေတယ်လို့ ဒေသခံတစ်ဦး က ပြောပါတယ်။
MK-007
#MeKongNews
#ကျောက်စုကျေးရွာ
#မီးရှို့ဖျက်ဆီး
