မဲခေါင်၊ ဧပြီ ၄
ရှမ်းပြည်တောင်ပိုင်း၊ ဖယ်ခုံအနောက်ဘက်၊ရီနွဲ့ကျေးရွာအုပ်စု၊ ဆိုင်ခွန်ဆောင်ငံကျေးရွာကို စစ်ကောင်စီက ဧပြီ ၂ ရက်၊ ည ၈ နာရီခန့်က လေယာဉ်နဲ့ဗုံးကြဲလို့ ဒေသခံ ၄ ဦး သေဆုံးတယ်လို့ ဒေသသတင်းအရင်းအမြစ်ထံက သိရပါတယ်။
ဖယ်ခုံအနောက်ဘက် ဆိုင်မွတ်ဆောင်ငံကျေးရွာကို စစ်ကောင်စီတပ်က လေယာဥ်နဲ့ ၂ခါ ဗုံးကြဲရာမှာ ရွာအလယ်ပိုင်း ထဲ ကျလို့အိမ် ၁၀ လုံးကျော်အပြင် လူ ၄ ဦး ပါသေဆုံးသွား တယ်လို့ သိရပါတယ်။
သေဆုံးတဲ့အထဲမှာ ၁၀ နှစ်အရွယ်အမျိုးသမီး ၁ ဦးနဲ့ ကျေးရွာက လူငယ် အမျိုးသား ၃ ဦး ပါတယ်လို့ Kayan New Generation Youth(KNGY) က ဖော်ပြထားပါတယ်။
စစ်ကောင်စီဟာ မြေပြင်တိုက်ပွဲမရှိဘဲ ပင်လောင်း၊ ဖယ်ခုံနဲ့မိုးဗြဲ မြို့နယ်က ကျေးရွာတွေကို လေယာဉ်နဲ့ဗုံးကြဲရာမှာ အလားတူ ယမန်နေ့ ဧပြီ ၂ ရက်မှာပဲ ပင်လောင်းမြို့နယ်၊ ပင်ပုံကျေးရွာက ဘုန်းတော်ကြီးကျောင်းတည့်တည့်အပေါ် ဗုံးကြဲချလို့ ပျက်စီးသွားခဲ့တယ်လို့ သိရပါတယ်။
ပြီးခဲ့တဲ့ မတ်လ ၃၀ ရက်ကလည်း လအိကျေးရွာဆေးရုံကို လေယာဉ်နဲ့ ၂ခါ ဗုံးကြဲခဲ့ပါသေးတယ်။
MK-012