မဲခေါင်၊ မတ် ၁၆
နွေဦးတော်လှန်ရေး ကာလအတွင်း ပအိုဝ်းလူမျိုးစုရဲ့ နိုင်ငံရေး ဦးဆောင်နေသူ ပအိုဝ်းအမျိုးသား ဖက်ဒရယ်ကောင်စီ (PNFC) ဥက္ကဌ ခွန်မြင့်ထွန်းရဲ့ အမည် အလွဲသုံးစားလုပ်ပြီး စစ်ကောင်စီ ထောက်ခံသူတွေက လူမှုကွန်ယက်စာမျက်နှာ (Facebook)ပေါ်မှာ အမုန်းစကားတွေ ဖြန့်ဝေနေတယ်လို့ အင်တာနက်သုံးစွဲတဲ့ ပအိုဝ်းလူငယ်တွေက ပြောပါတယ်။
ခွန်မြင့်ထွန်းအမည်နဲ့ ဖေဖော်ဝါရီ ၁၉ ရက်နေ့ကမှ ဖွင့်လှစ်ထားတဲ့ အကောင့်တုဟာ နေ့စဉ်နေတိုင်း သတင်းမှားတွေ တင်ဆက်နေပြီး ပအိုဝ်းလူမျိုးနဲ့ တော်လှန်ရေး အင်အားစုတွေအကြား ပဋိပက္ခဖြစ်ပွားအောင် ရည်ရွယ်ချက်ရှိရှိ ဖန်တီးနေတာကို လေ့လာတွေ့ရှိရပါတယ်။
ခွန်မြင့်ထွန်းက “အကောင့်တုတွေက ဘာမှားလဲဆိုတော့ ကျနော်က ခွန်ကို ပေါင်းတဲ့အခါမှာ Khun နဲ့ သုံးတယ်၊ ထွန်းကို Tun နဲ့ ပေါင်းတယ်။ အကောင့်တုမှကြတော့ ခွန်ကို Hkun နဲ့ ပေါင်းတယ်။ နောက်ပြီး ထွန်းကို Htun လို့ ရေးထားတယ်။ ဒီလိုမျိုး လုပ်နေတာတွေကတော့ တော်လှန်ရေးကို ပုံဖျက်ဖို့အတွက် နွေဦးတော်လှန်ရေးမှာ ပအိုဝ်းလူမျိုးတွေ ပါဝင်ဆင်နွှဲနေတာကို မကျေနပ်တဲ့ အင်အားစုတွေပေါ့။ အထူးသဖြင့် စစ်ကောင်စီ လက်အောက်ခံ ဌာနခွဲမျိုးတွေပေါ့။ ဒီလိုမျိုး လုပ်ရပ်တွေကို ကျနော်တို့မှ မဟုတ်ပါဘူး။ အခြားသော နေရာတွေမှာလည်း သူတို့ စနစ်တကျ လုပ်နေမှာ ဖြစ်ပါတယ်” လို့ ပြောပါတယ်။
ခွန်မြင့်ထွန်းအမည်နဲ့ လက်ရှိ အကောင့်တု ၂ ခု ပေါ်ပေါက်နေတဲ့အထဲမှာ ပထမ တစ်ခုကတော့ သူရဲ့ ပအိုဝ်းအမျိုးသားဝတ်စုံ ဝတ်ထားတဲ့ ဓါတ်ပုံနဲ့ ကိုယ်ရေးမှတ်တမ်းပုံ (Profile) တင်ထားပြီး ဒုတိယ တစ်ခုကတော့ သူရဲ့ မိသားစုံပုံနဲ့ ဖော်ပြထားတယ်လို့ သိရပါတယ်။
ပြီးခဲ့တဲ့ နှစ်ပေါင်း ၆၀ အတွင်း ပအိုဝ်းလူမျိုးတွေ အနေနဲ့ စစ်ဏာရှင်နဲ့ သူတို့ လက်ဝေခံ ပအိုဝ်းအမျိုးသား အဖွဲ့ချုပ်ပါတီ (PNO)ရဲ့ လက်အောက်မှာ နေခဲ့ရတာကြောင့် အသိအမြင် အားနည်းခဲ့တယ်လို့ ဆိုပါတယ်။
ဒါပေမယ့် ဒီနေ့ခေတ်မှာတော့ အာဏာရှင်တွေရဲ့ လုပ်ရပ်ကို ကိုယ်တွေ့ကြုံလာရတာနဲ့အမျှ ပအိုဝ်းပြည်သူတွေဟာ နားလည် သဘောပေါက်လာကြပြီ ဖြစ်တာကြောင့် အခုလို ဝါဒဖြန့်တဲ့အပေါ် စိုးရိမ်စရာ မရှိဘူးလို့ ခွန်မြင့်ထွန်းက ဆက်ပြောပါတယ်။
“ကျနော့်ရဲ့ အကောင့်စစ်မှာ သတင်းအချက်အလက်တွေ၊ ကျနော့်ကို ဝေဖန်ပြောကြားတာတွေ ကောင်းသည် ဖြစ်စေ၊ ဆိုးသည် ဖြစ်စေ ဘယ်တုန်းကမှ တုံ့ပြန် ဖြေရှင်းတာမျိုး လုပ်လေ့ မရှိပါဘူး။ အခုအကောင့်တုတွေမှာတော့ comment (မှတ်ချက်) ရေးသူတွေအပေါ် ကျနော်ကနေပြီးတော့ ပြန်လည် ဖြေရှင်းတဲ့ ပုံစံမျိုး သူတို့ ဝါဒ ဖြန့်နေတာပေါ့။ ဒါကလည်း သူတို့ရဲ့ အမှားအယွင်း တစ်ခု ဖြစ်ပါတယ်” လို့ အကောင့် အစစ်နဲ့ အတုကြား ကွာခြားချက်ကို ခွန်မြင့်ထွန်းက ရှင်းပြပါတယ်။
အလားတူ စစ်ကောင်စီ ထောက်ခံသူတွေဟာ မတ်လ ၁၂ ရက်နေ့ကလည်း ဟိုပုံးမြို့နယ်၊ မဲနယ်တောင်ဒေသ၊ နမ့်ဟူးကျေးရွာကို စစ်ကောင်စီ၊ ပအိုဝ်းပြည်သူ့စစ် (PNA) ပူးပေါင်းတပ်တွေ မီးရှို့ဖျက်ဆီးခဲ့ပြီး ပအိုဝ်းအမျိုးသား လွတ်မြောက်ရေး တပ်မတော် (PNLA)က လုပ်ဆောင်တယ်လို့ လိမ်ညာ ဝါဒဖြန့်ခဲ့ပါသေးတယ်။
CJ-007
