မဲခေါင်၊ ဧပြီ ၂၈
ရှမ်း-ကရင်နီ နယ်စပ် ပင်လောင်းနဲ့ ဖယ်ခုံ ဒေသမှာ စစ်ကောင်စီ၊ PNO ပူးပေါင်းတပ်တွေနဲ့ ကရင်နီ တော်လှန်ရေး အင်အားစုတွေကြား တိုက်ပွဲတွေ ဆက်လက် ပြင်းထန်နေပြီး စစ်တပ်က ဖယ်ခုံ- ခေါင်းအိ လမ်းကို ပိတ်ထားလို့ ပြည်သူတွေ ဂရုစိုက် သွားလာကြဖို့ ဖယ်ခုံ PDF က အသိပေးထားပါတယ်။
စစ်ကောင်စီက ပင်လောင်းနဲ့ ဖယ်ခုံ ဒေသမှာ အင်အား ဆက်တိုက်ဖြည့်ပြီး စစ်ကြောင်းထိုးနေလို့ တိုက်ပွဲတွေ ဆက်လက် ပြင်းထန်မယ်လို့ ဖယ်ခုံ PDF က မဲခေါင်သတင်းကို ပြောပါတယ်။
“တိုက်ပွဲကတော့ နေ့တိုင်းဖြစ်နေတာပဲ။ သူတို့က နေ့တိုင်း စစ်ကြောင်းထိုးဖို့ ကြိုးစားနေတာ။ သူတို့ အသေများရင် ပြန်ဆုတ်သွားတယ်။ အင်အားဖြည့်ပြီးရင် ပြန်တက်လာတယ်။ ဖယ်ခုံ အရှ့ခြမ်းမှာတော့ မနေ့က လေယာဉ်နဲ့ လာပစ်သွားတယ်။ အခုတော့ ဖယ်ခုံ-ခေါင်းအိ လမ်းကို သူတို့ပိတ်ထားတယ်။ ပြည်သူတွေ အသွားအလာ ဂရုစိုက်ကြပါ” လို့ သူက သတိပေး ပြောဆိုပါတယ်။
အလားတူ မိုးဗြဲမြို့မှာ စစ်ကောင်စီတပ်တွေ အထိနာပြီးနောက် မိုးဗြဲ-ဖယ်ခုံ လမ်းမှာ တိုက်ပွဲတွေ ဖြစ်လာနိုင်လို့ လမ်းခေတ္တ ပိတ်ထားရာ ပြည်သူတွေ ဖြတ်သန်း သွားလာတာ မပြုလုပ်ဖို့ မိုးဗြဲ PDF က ထုတ်ပြန်ထားပါတယ်။
လက်ရှိ ရှမ်း-ကရင်နီ နယ်စပ်ကနေ ကရင်နီပြည်ထဲ ထိုးစစ်ဆင်နေတဲ့ စစ်ကောင်စီ၊ PNO ပူးပေါင်းတပ်တွေကို ဒေသတွင်း တော်လှန်ရေး အင်အားစုတွေ ပူးပေါင်း တိုက်ခိုက်နေတာကြောင့် ပင်လောင်းနဲ့ ဖယ်ခုံမြို့နယ် တွေမှာ ၂ လကျော်ကြာတဲ့ အထိ တိုက်ပွဲတွေ ပြင်းထန်နေပြီး ဒေသခံ ၆,၀၀၀ ကျော် နေရပ်စွန့်ခွာ ထွက်ပြေး တိမ်းရှောင် နေရတယ်လို့ စစ်ရှောင် ကူညီပေးနေသူတွေထံက သိရပါတယ်။
MK-007