မဲခေါင် ၊ မေ ၁
ရှမ်းပြည်နယ်တောင်ပိုင်း၊ ပင်လောင်းမြို့အဝင်အထွက် ဂိတ်တွေမှာ စစ်ကောင်စီတပ်က ဒေသခံပြည်သူတွေဆီက ငွေတွေ မတရားတောင်းစားနေတယ်လို့ ပင်လောင်းမြို့နယ် ဒေသခံတွေက မဲခေါင်သတင်းဌာနကို ပြောပါတယ်။
အဲ့ဒီ့မြို့အဝင်အထွက်ဂိတ်တွေမှာ စစ်ကောင်စီတပ်သားတွေက ငွေမပေးရင် ခြိမ်းခြောက်ပြောဆိုတာတွေ၊ စစ်ဆေးမေးမြန်းတာတွေ၊ ရိုင်းရိုင်းစိုင်းစိုင်း ဆဲဆိုတာတွေ ပြုလုပ်ကြတယ်လို့ ဒေသခံတွေက ပြောပါတယ်။
ယခင်ကဆို ကားတွေကို မြို့ဝင်ကြေးသာ တောင်းကြပေမယ့် ယခုအချိန်မှာ ကား၊ ဆိုင်ကယ်တွေကို မြို့ဝင်ကြေးသာမက ဟင်းဖိုးဆိုပြီးတော့ ငွေကျပ်သောင်းဂဏန်းအထိ တောင်းကြတယ်လို့ ကိုယ်တိုင်ကြုံခဲ့ရသူတွေကပြောပြပါတယ်။
“အသွားကော အပြန်ကော ပေးရတယ်။ ကျွန်တော့်ကားကို တားပြီး ဟင်းဖိုး သုံးသောင်းတောင်းတယ်။ အဲ့ဒါ တောင်းတောင်းပန်ပန်နဲ့ တစ်သောင်းခွဲပေးခဲ့လိုက်ရတယ်။” လို့ ကိုယ်တိုင်ပေးခဲ့ရတဲ့ ပင်လောင်းဒေသခံတစ်ဦးကပြောပါတယ်။
ပင်လောင်းမြို့ မြောက်ဘက်မှာ စစ်ကောင်စီအဝင်ဂိတ်တစ်ခုရှိပြီး မြို့တော်ဘက် ပေါင်းလောင်း လမ်းခွဲမှာလည်း ဂိတ်တစ်ခုရှိပါတယ်။
ဒီကိစ္စနဲ့ပတ်သက်ပြီး စစ်ကောင်စီက ခန့်ထားတဲ့ ပအိုဝ်းကိုယ်ပိုင်အုပ်ချုပ်ခွင့်ရဒေသ ဥက္ကဌ ခွန်ရဲထွေးကို မဲခေါင်သတင်းဌာနက ဆက်သွယ်ပေမယ့် ဖုန်းလက်ခံဖြေဆိုခြင်းမရှိပါဘူး။
CJ – 002
#MeKongNews
#ပင်လောင်းမြို့နယ်
#မြို့အဝင်အထွက်ဂိတ်
#ငွေတောင်း