မဲခေါင်၊ မတ် ၂၂
ရှမ်းပြည်နယ် တောင်ပိုင်း၊ ပင်လောင်းမြို့နယ်၊ လုံးပဉ်ကျေးရွာ အနီးမှာ ကရင်နီ အမျိုးသားများ ကာကွယ်ရေးတပ်-KNDF အပါအဝင် တော်လှန်ရေးတပ်ပေါင်းစုနဲ့ စစ်ကောင်စီတပ် တိုက်ပွဲ ပြင်းထန်ခဲ့တယ်လို့ PNDF ကပြောပါတယ်။
ဒီကနေ့ နေ့လယ် ၁ နာရီကနေ ညနေ ၃ နာရီအထိ တိုက်ပွဲ ဖြစ်ပွားခဲ့တာဖြစ်ပြီး စစ်ကောင်စီတပ်နဲ့ PNO ပြည်သူ့စစ် ပူးပေါင်းတပ်တွေ ပြန်ဆုတ်သွားတယ်လို့ ပအိုဝ်း အမျိုးသား ကာကွယ်ရေးတပ်-ခမ်းကောင် PNDF-KK က ပြောပါတယ်။
“အခုဖြစ်နေတာ လူမျိုးရေး ဘာသာရေး နဲ့ဆိုင်တဲ့ပွဲ မဟုတ်ဘူး။ အာဏာရှင်ကို တော်လှန်နေတဲ့ပွဲ ဖြစ်တယ်။ အာဏာာရှင်ကို ကျွန်တော်တို့က တော်လှန်နေမှာပဲ။ အာဏာရှင်နဲ့ ပါလာတာတွေ ကိုတော့ ကျွန်တော်တို့က တိုက်နေရမှာပဲ။ ရန်သူကလည်း သူ့အလုပ် သူလုပ်နေတယ်။ ကျွန်တော်တို့ဘက်က လုပ်စရာရှိတာ ဆက်လုပ်မှာ ဖြစ်ပါတယ်” လို့ PNDF-KK ပြန်ကြားရေး တာဝန်ခံ ခွန်ဗွေဟုန်းက ပြောပါတယ်။
ဒီနေ့ ဖြစ်ပွားတဲ့ တိုက်ပွဲမှာ စစ်ကောင်စီတပ်နဲ့ လက်အောက်ခံ PNO ပြည်သူ့စစ် ပူးပေါင်း အင်အား ၆၈ ဦးနဲ့ စစ်ကြောင်းထိုးလာတာလို့ သူကပြောပါတယ်။
ဒီတိုက်ပွဲမှာ စစ်ကောင်စီဘက်က ထိခိုက် သေဆုံးမှု ရှိပေမယ့် အတည်မပြုနိုင်သေးဘူးလို့ ခွန်ဗွေဟုန်းက ပြောပါတယ်။
ပြီးခဲ့တဲ့ မတ် ၂၀ ရက်မှာလည်း တိုက်ပွဲမှာ အရေးနိမ့်နေတဲ့ စစ်ကောင်စီတပ်က ပင်လောင်းမြို့နယ် နမ့်နိန်းကျေးရွာ အနီး တောင်တွေကို ဂျက်လေယာဉ် ၂ စီးနဲ့ ဗုံးကြဲ တိုက်ခိုက်မှု ပြုလုပ်ခဲ့ပါတယ်။
ရှမ်း-ကရင်နီ နယ်စပ်မှာ ဖေဖော်ဝါရီ လကုန်မှ စပြီး ဒီကနေ့အထိ တိုက်ပွဲ ပြင်းထန်နေရာ မတ်လ ၈ ရက်ကနေ ၁၂ ရက်နေ့ အထိ စစ်ကောက်စီတပ်ဘက်က ၉၀ နီးပါး သေဆုံးကာ လက်နက် အများအပြား ရခဲ့တယ်လို့ အမျိုးသား ညီညွတ်ရေး အစိုးရ၊ ကာကွယ်ရေးဝန်ကြီးဌာနက ထုတ်ပြန်ထားပါတယ်။
CJ-002
#PNDF-KK