မဲခေါင် ၊ ဇူလိုင် ၁၄
ရှမ်းပြည်နယ်တောင်ပိုင်း၊ ပင်လောင်းမြို့နယ်အတွင်း စစ်ဘေးရှောင်လာတဲ့ ပြည်သူလူထုတွေ တုပ်ကွေး ဖြစ်ပွားမှုများပြားနေပေမယ့် ဆေးဝါးကုသမှု အချိန်မီ မရရှိကြဘူးလို့ စစ်ဘေးရှောင်နေတဲ့ ပြည်သူတွေကပြောပါတယ်။
စစ်ဘေးရှောင်ပြည်သူတွေ ထောင်ချီရှိနေတဲ့ ပင်လောင်းမြို့နယ်မှာ စစ်ကောင်စီနဲ့ PNO ပြည်သူ့စစ်တို့ရဲ့ ကန့်သတ်မှုတွေကြောင့် ကျန်းမာရေးစောင့်ရှောက်မှု အပြည့်အဝ ရရှိဖို့ ခက်ခဲနေဆဲဖြစ်ကာ အခုအချိန် တုပ်ကွေးဖြစ်ပွားမှုများတဲ့ မိုးရာသီမှာ ဆေးဝါးရရှိဖို့ ပိုခက်ခဲကြတာပါ။
“တစ်ချို့နည်းနည်းပါးပါးကတော့ သွေးလွန်တုပ်ကွေးဖြစ်တယ်။ အများစုက တုပ်ကွေးဖြစ်တာပေါ့။ လူကလည်းများတော့ တစ်ယောက်ပြီးတစ်ယောက် ကူးကူးပြီးဖြစ်တာဗျ။ ဆေးကလည်း ဝယ်တိုင်းမရဘူး။ အခက်အခဲတွေများတယ် အဖွဲ့အစည်းတွေအနေနဲ့ စခန်းတွေထိ လိုက်လံ ကုသမှုပေးနိုင်ရင်တော့ ကောင်းမယ်ဗျ” လို့ စစ်ဘေးရှောင်ပြည်သူတွေကို ကူညီနေသူတစ်ဦးက ပြောပါတယ်။
ဒါ့အပြင် တုပ်ကွေးဖြစ်ပွားနေတဲ့ သူတွေအများစုဟာ စစ်ရှောင်စခန်းမှာ နေထိုင်တဲ့ ကလေးတွေနဲ့ သက်ကြီးရွယ်အိုတွေဖြစ်တာကြောင့် လုံလောက်တဲ့ ဆေးဝါးကုသမှုတွေ မရရင် စိုးရိမ်ရတယ်လို့ စစ်ဘေးရှောင် ပြည်သူတစ်ဦးကပြောပါတယ်။
“အဖြစ်အများဆုံးက ကလေးနဲ့ သက်ကြီးရွယ်အိုတွေ။ သူတို့တွေက ကိုယ်ခံအားလည်းနည်းတော့ စိုးရိမ်ရတယ်ဗျ။ ဖြစ်တာကလည်း လူ ၂၀ ဆိုရင် ၁၀ ကျော်က ဖြစ်နေတာ။ တစ်ယောက်ကောင်းရင် နောက်တစ်ယောက်ကဖြစ် အဲ့လိုဖြစ်နေတယ်ဗျ။ တုပ်ကွေးကနေ အဖျားတွေပြင်းပြီး မဆုံးရှုံးသင့်ပဲ ဆုံးရှုံးရမှာ စိုးရိမ်တယ်ဗျ” လို့ သူကပြောပါတယ်။
ပင်လောင်းမြို့နယ်အတွင်းမှာ ဆန်တွေ၊ ဆေးဝါးတွေ သယ်တာကို စစ်ကောင်စီ ဂိတ်တွေက ကန့်သတ်တာ သိမ်းဆည်းတာတွေကြောင့် လိုအပ်တဲ့ ဆေးဝါးတွေကို ဝယ်ဖို့အခက်အခဲ ဖြစ်နေတာပါ။
ဒါ့အပြင် ပင်လောင်းမြို့နယ်အတွင်းရှိ စစ်ဘေးရှောင်စခန်းတွေကို အလှူရှင်တွေကိုယ်တိုင် တိုက်ရိုက် သွားရောက်ကူညီခွင့်ကိုလည်း စစ်ကောင်စီ လက်အောက်ခံ PNO ပြည်သူ့စစ်က ပိတ်ပင်ထားတာကြောင့် စစ်ဘေးရှောင်နေရတဲ့ ပြည်သူလူထုတွေ အကူအညီ ရရှိဖို့ အခက်အခဲဖြစ်နေပါတယ်။
ပင်လောင်းမြို့နယ်အတွင်းမှာ ရှမ်းပြည်နယ် နဲ့ ကရင်နီပြည်နယ်မှ စစ်ဘေးရှောင်လာတဲ့ ပြည်သူတွေ ၅၀၀၀ ကျော်ရှိနေဆဲဖြစ်ပြီး စစ်ဘေးရှောင်ပြည်သူတွေဟာ စစ်ရှောင် စခန်း ၁၀ ခု နဲ့ ဆွေမျိုးတွေရဲ့ နေအိမ်တွေမှာ နေထိုင်နေရတာဖြစ်ပါတယ်။
CJ-002
#MeKongNews
#ပင်လောင်း
#စစ်ကောင်စီ
#ပြည်သူ့စစ်
#စစ်ဘေးရှောင်
#ကရင်နီ
