မဲခေါင်၊ ဧပြီ ၂၁
နိုင်ငံတဝှမ်း အပူချိန်မြင့်တက်လို့ မိုးမျှော်နေစဉ် ရှမ်းပြည်နယ် တောင်ပိုင်း၊ ဆီဆိုင်မြို့မှာ မိုးသည်းထန်စွာ ရွာသွန်းပြီး မိုးသီးတွေ ကျနေတယ်လို့ ဒေသခံတွေက ပြောပါတယ်။
ဒီကနေ့ နေ့လယ် ၂ နာရီကနေ ၃ နာရီ ထိုးခါနီးအထိ မိုးသည်းထန်စွာ ရွာသွန်းတာဖြစ်ပြီးတော့ မိုးသီးတွေပါ ကျရောက်တာ ဖြစ်တယ်လို့ ဆီဆိုင်မြို့ခံ တစ်ဦးက ပြောပါတယ်။
“ အခုက တအားပူနေတော့ ဒီလို ရွာချလိုက်တော့လည်း ကောင်းတာပဲ။ အပူသက်သာတယ်။ အပြင် ရောက်နေသူတွေတော့ မိုးသီးထိရင် တော်တော်နာမှာပဲ။ မိုးသီးက လက်မလောက်ရှိတယ်” လို့ သူကပြောပါတယ်။
လက်ရှိအချိန် ဒေသခံတွေ တန်ခူးလ ရိုးရာ ထုံးစံ ဘုန်းတော်ကြီးကျောင်းတွေ လိုက်လံ ကန်တော့နေတဲ့ အချိန်လည်း ဖြစ်ပါတယ်။
“ ကျောင်းလာကန်တော့တဲ့ ဒကာတွေလည်း ပျော်လို့ပဲလား မသိဘူး မိုးသီးတွေ လိုက်ကောက်နေကြတယ်” လို့ ဆီဆိုင်မြို့က ရဟန်းတော် တစ်ပါးက မိန့်ကြားပါတယ်။
ပြီးခဲ့တဲ့ ဧပြီလ ၁၇ ရက်နေ့ကလည်း ဆီဆိုင်မြို့နယ် ကယန်းလေးကျေးရွာမှာ မိုးသက်လေပြင်းကျလို့ နေအိမ် ၃၇ လုံး ပျက်စီးခဲ့ပါသေးတယ်။
CJ – 002