မဲခေါင်၊ မတ် ၉
ရှမ်းပြည်နယ်တောင်ပိုင်းက သီးနှံထွက်ကုန်တစ်မျိုးဖြစ်တဲ့ နနွင်းတက်မှာ လတ်တလောဈေးကွက်တွင် အဝယ်လိုက်နေသော်လည်း ရောင်းသူ မရှိဖြစ်နေတယ်လို့ အောင်ပန်းနဲ့ပင်လောင်း နနွင်းစိုက် တောင်သူနဲ့ အောင်ပန်းပွဲရုံတွေဆီက သိရပါတယ်။
နနွင်းတက်တွေရဲ့ အမျိုးအစားနဲ့အရောင်အပေါ်မှာ မူတည်ပြီး ဈေးနှုန်းကွာဟာမှုနဲ့ ဈေးကွက်ရလိုမှု ကွာခြားတယ်လို့ သိရပါတယ်။
အဖြူက ဈေးနဲတယ်၊ အနီက ဈေးမြင့်တယ်၊ ဒါပေမယ့် အဖြူက ဥပွားများတယ်၊ အနီက နဲတယ်၊ ဈေးက တစ်ထောင်လောက်ကွာတတ်တယ်လို့ လဲသက်အုပ်စု၊ မိုင်းပျဉ်းရွာက နနွင်းစိုက်တောင်သူ တစ်ဦး က မဲခေါင်ကိုပြောပါတယ်။
လတ်တလော အောင်ပန်းပွဲရုံရောက်ဈေးမှာ သာစည်ဆင်တောင် ခေါင်းပါ ၄၅၀၀ ကျပ်၊ ဆင်တောင်ခေါင်းလွတ်(ရှယ်စ) ၆၅၀၀ ကျပ်၊ အောင်ပန်း၊ ကမ်းဘားနီ ခေါင်းအပါ ၄၅၀၀ ကျပ်၊ ပေါင်းလောင်းနနွင်း ၃၅၀၀ ကျပ်၊ တီကျစ်တောင်ဘို့လ(ရှယ်စ) ခေါင်းအပါ ၆၈၀၀ ကျပ်နဲ့နနွင်းတက်အညံ့စ(ခြင်ဆေးထွန်း) ၄၇၀၀ ကျပ် ဖြစ်တယ်လို့ သိရပါတယ်။
ခေါင်းဆိုတာက ပြန်စိုက်တဲ့ မျိုးကိုပြောတာ၊ အဲဒါဖယ်ပြီးရောင်းရင် တစ်ဈေးပေါ့၊ ကျမတို့က အဓိကပြောင်းစိုက်တာ၊ နနွင်းကိုတော့ အရန်စိုက်တာ၊ အရင်းက ၁ ပိဿာ ၆၀၀ မှာ ဥခူးရင် ဆာလာဝက်လောက်ပြန်ရတယ်၊ ဈေးရရင်တော့ ကိုက်ပါတယ်လို့ တောင်သူ နန်းရီဝင်းက ပြောပါတယ်။
နနွင်းကို ၅ လ ပိုင်းတွင် စတင်စိုက်ပျိုးပြီး ပေါင်းရှင်းတာကလွဲလို့ ပစ်ထားလို့ရပြီး စောရင် ၁၁လပိုင်း နဲ့ နောက်ကျရင် ၁ လပိုင်းတွေမှာ ဖော်ရောင်းကြတယ်လို့ သူကပြောပါတယ်။
နနွင်းကို ရှမ်းတောင်ပင်လောင်း၊ တီကျစ်ဘက်မှာ အဓိက စိုက်ပျိုးပြီး ပင်းတယ၊ ရွာငံနဲ့ သာစည်ရှမ်းနယ်အစပ် ဆင်တောင်မှာ အများ ဆုံးစိုက်ပျိုးကြကာ ယခုနှစ်တွင် ဈေးတက်နိုင်သည့်အတွက် တောင်သူတွေ ကုန်ထိန်းကိုင်ထားနေကြသလို နယ်မြေအခြေအနေအရ သွား လာရေးမလွယ်ကူတဲ့နေရာတွေနဲ့ ဂိတ်ကြေးတွေကြောင့် လာရောက်ဝယ်ယူတာကိုပဲ စောင့်နေကြတယ်လို့ သိရပါတယ်။
ယခင်နှစ်များက နနွင်း ၁ ပိဿာ ကျပ် ၂၀၀၀ ကျော်သာရှိခဲ့သော်လည်း ယမန်နှစ်တွင် ဈေးအမြင့်ဆုံး ၄၇၀၀ ကျပ်အထိရရှိခဲ့ပြီး နောက်ယခုနှစ်တွင် ဈေးမြင့်ပေးပြီး ကုန်ချိန် အကန့်အသတ်မရှိ ဝယ်လိုသော်လည်း တောင်သူများ မရောင်းချသေးပဲဈေးကိုစောင့်ကြည့်နေကြကြောင်း
အောင်ပန်းပွဲရုံတွေဆီက သိရပါတယ်။
အဆိုပါ နနွင်းတက်ကို မီးဖိုချောင်သုံးအပြင် ဆေးဝါးကုန်ကြမ်းအတွက် ပြည်တွင်း ရန်ကုန်၊ မန္တလေးက အဓိကဝယ်ယူကာ ဘင်္ဂလားဒေ့ရှ်နဲ့အိန္ဒိယနိုင်ငံတွေကို နယ်စပ်ကုန်သွယ်ရေးက တဆင့်ပေးပို့ရောင်းချ နေကြတယ်လို့ သိရပါတယ်။
MK-012
