မဲခေါင်၊ မတ် ၂၅
ရှမ်းပြည်တောင်ပိုင်း၊ ဓနုဒေသအခြေစိုက် ၁၀၀၃ တပ်ရင်းက ဒေသခံပြည်သူလူထု၏ ပစ္စည်းဥစ္စာများအားကားများဖြင့် လာရောက်ခိုးယူနေသည် ဆိုသည့် Mawshan Myay Media (Telegram Channel) ပါသတင်းမှာ ဝါဒဖြန့် Post တစ်ခုသာဖြစ်ပြီး အမှန်တကယ်မဟုတ်ကြောင်း မတ်လ ၂၃ ရက်က ထုတ်ပြန်ပါတယ်။
အဆိုပါ စစ်ကောင်စီကိုအားပေးထောက်ခံတဲ့ မတ်လ ၂၀ ရက်က ဝါဒဖြန့်သတင်းတွင် ဓနု ၁၀၀၃ တပ်ရင်းအနေနဲ့ မတ်လ ၁၈ ရက်က”ပြည်သူလူထုများသို့ မေတ္တာရပ်ခံခြင်းနှင့်အသိပေးထုတ်ပြန်ခြင်း” ပါ မှတ်တမ်းဓာတ်ပုံများကို အသုံးပြုကာ ဝါဒဖြန့်မှုလုပ်ခဲ့ခြင်းသာဖြစ်တယ်လို့ ဖြေရှင်းထုတ်ပြန်ပါတယ်။
ယင်းဓာတ်ပုံတွေဟာ အကြမ်းဖက်စစ်ကောင်စီတွေ စစ်ကြောင်းထိုးနေတဲ့ ပင်လောင်းမြို့နယ် နောင်ဝိုးကျေးရွာ၊ ဗန်းမောက်ကျေးရွာနဲ့ နမ့်ဖောမူကျေးရွာတွေမှာ ပိတ်မိနေတဲ့ ပြည်သူတွေကို ဘေးလွတ်ရာ ရွှေ့ပြောင်းပေးနေခြင်းသာ ဖြစ်တယ်လို့ ဆိုပါတယ်။
အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာန(MOD) က ညွန်ကြားထားသည့် လူထုအပေါ် လူသားဆန်ဆန် အလေးထားဆက်ဆံရန်၊ ပြည်သူပိုင်ပစ္စည်းဥစ္စာများကို အသုံးပြုပါက အသုံးပြုသည့်ကာလအပေါ် အခကြေးငွေပေးချေရန် စည်းမျဉ်းစည်းကမ်းများချမှတ်ထားသည့်အပြင် ဓနုတပ်ရင်းသာမက တော်လှန်ရေးမဟာမိတ်အင်အားစု များဟာ တိုက်ပွဲမဖြစ်မီ၊ တိုက်ပွဲဖြစ်ပြီး လူထုအသက်တွေကို ကာကွယ်ဖို့၊ လူထုနေအိမ်တွေက ပစ္စည်းတွေကို ဝင်ရောက်ခိုးယူထာ မီးရှို့ဖျက်ဆီးတာတွေ မလုပ်ကြဖို့ စစ်ဥပဒေချမှတ်ထားပြီး အားလုံးလိုက်နာလျက်ရှိတယ်လို့ ပြောပါတယ်။
ဓနု ၁၀၀၃ တပ်ရင်းဟာ ဓနုဒေသ၊ ဓနုလူမျိုးတွေအတွက်သာ တိုက်ပွဲဝင်နေတဲ့ တပ်ရင်းမဟုတ်ဘဲ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန လက်အောက်ခံ PDF တပ်ရင်းဖြစ်တဲ့အတွက် နိုင်ငံရဲ့ ဘယ်နေရာမဆို သက်ဆိုင်ရာ တော်လှန်ရေးမဟာမိတ်အင်အားစုတွေနဲ့ ပူးပေါင်းပြီး အကြမ်းဖက်စစ်ကောင်စီကို တိုက်ထုတ်သွားမှာဖြစ်တယ်၊ ဒါကြောင့် စစ်ကောင်စီကို ထောက်ခံအားပေးတဲ့ Media တွေရဲ့ ရေးသားဖြန့်ဝေမှုတွေကိုမယုံကြည်ကြဖို့ မေတ္တာရပ်ခံတယ်လို့ ပါရှိပါတယ်။
ယင်း `Mawshan Myay Media (Telegram Channel) ပါသတင်းအား ရှမ်းသံတော်ဆင့်သတင်းဌာနက အချက်အလက်စစ်ဆေးသူတွေရဲ့ စစ်ဆေးမှုအရသတင်းတု သတင်းမှားဖြစ်ကြောင်း စစ်ဆေးတွေ့ရှိခဲ့တယ်လို့ ယနေ့ မတ်လ ၁၅ ရက် သတင်းတွင် ဖော်ပြထားပါတယ်။
MK-012
