မဲခေါင်၊ စက်တင်ဘာ ၂၁
ကရင်နီပြည်နယ်၊ ဒီးမော့ဆိုမြို့နယ် အနောက်ဘက်ခြမ်းမှာရှိတဲ့ စစ်ရှောင်စခန်းကို စက်တင်ဘာလ ၁၉ ရက်နေ့က စားနပ်ရိက္ခာနဲ့ အသုံးအဆောင်တွေ သွားရောက်လှူဒါန်း ခဲ့တယ်လို့ စစ်ဘေးရှောင်တွေကို ကူညီပေးနေတဲ့ စစ္စတာ စိမ့်စမ်းရေ ကပြောပါတယ်။
အဲဒီ စစ်ဘေးရှောင် စခန်းမှာ အိမ်ခြေ ၉၆ အိမ်နဲ့ လူဦးရေ ၃၆၂ ဦး နေထိုင်ကာ စစ်ရှောင်ကာလ ၂ နှစ်ကျော်ပြီလို့ သိရပါတယ်။
“ ဘာကြောင့်ဆိုတာက ရှင်းပါတယ် စစ်ဖြစ်နေတဲ့ နေရာမို့လို့ပါ။ စစ်ရှောင်မှာ ရိက္ခာမရှိပါ။ ပြည်သူမှာ ပြည်သူပဲ ရှိတော့ စစ္စတာ ဖြစ်ပေမယ့် ကျွန်မလည်း ပြည်သူပါ။ ပြည်သူထဲမှာမှ လူသားထု အကျိုးအတွက် သေချာပေါက် ဝင်ရောက် ကူညီပေးဖို့ ပါဝင်သင့်တဲ့ လူသားတွေ အတွက် ဘုရားမေတ္တာကို မျှဝေရမယ့်သူလို့ ခံယူလို့ လူသားချင်း စာနာစိတ်ထားရှိလို့ ဒီအလုပ်တွေလုပ်ရင်း ကူပေးနေတာပါ” လို့ စစ္စတာ စိမ့်စမ်းရေက ပြောပါတယ်။
စစ်ရှောင်စခန်းက ပြည်သူတွေ အတွက် ဆန်၊ ဆီ၊ ဆား၊ ဆေး၊ ခေါက်ဆွဲခြောက်၊ ခရမ်းချဥ်သီး၊ လက်ဖက်၊ ကြက်ဥ၊ ဖူဂျီဆပ်ပြာ၊ အဝတ်အထည်၊ ခြင်ထောင်၊ စိပ်ပုတီး တွေ လှူဒါန်းခဲ့တယ်လို့ သိရပါတယ်။
ကရင်နီပြည်နယ်မှာ စစ်ဘေးရှောင် ကာလ ကြာမြင့်လာတာနဲ့အမျှ စားနပ်ရိက္ခာတွေနဲ့ ဆေးဝါးတွေ ခက်ခဲလာပြီး တချို့ စစ်ရှောင် စခန်းတွေမှာ ရိက္ခာ ပြတ်လပ်နေတယ်လို့ စစ်ဘေးရှောင် ပြည်သူတွေက ပြောပါတယ်။
လက်ရှိ စစ်ဘေးရှောင်တွေကို ကူညီပေးသူတွေ အနေနဲ့ အလှူငွေရရှိမှု နည်းပါးလာတာ၊ ကုန်စျေးနှုန်း မြင့်တက်လာတာ၊ လမ်းခရီးမှာ ပစ္စည်း သိမ်းဆည်းခံရတာတွေကြောင့် ကူညီရာမှာ အခက်အခဲတွေ ဖြစ်လာတယ်လို့ သိရပါတယ်။
CJ-004
#MeKongNews
#ဒီးမော့ဆို
#စစ်ဘေးရှောင်
#စားနပ်ရိက္ခာ_ဆေးဝါး