မဲခေါင်၊ မတ် ၃၁
ရှမ်းပြည်မြို့တော်၊ တောင်ကြီးမြို့ရှိ နိုင်ငံကူးလက်မှတ်ထုတ်ပေးရေးရုံး (ပတ်စ်ပို့ရုံး)မှာ မှတ်ပုံတင်ကို စမတ်ကတ် ပြောင်းလဲထားမှသာ ပတ်စ်ပိုစ့် ပြုလုပ်ခွင့် ပေးတော့မယ်လို့ ပွဲစားတွေက ပြောပါတယ်။
အခုလို သတ်မှတ်ချက်ကို ဧပြီလ ၂၂ ရက်နေ့ နောက်ပိုင်းကစပြီး အကောင်အထည်ဖော်သွားမှာ ဖြစ်ပြီး စမတ်ကတ် မပြောင်းလဲရသေးသူတွေ အနေနဲ့ အမြန်ဆုံး ပြုလုပ်ကြဖို့ အုပ်ချုပ်ရေးမှူးတွေက ရပ်ကွက်အတွင်း လှည့်လည်ကြေညာနေကြတယ်လို့ ဒေသခံတွေက ဆိုပါတယ်။
အခုလိုလုပ်တာဟာ စစ်ကောင်စီရဲ့ နောက်ထပ်တင်းကြပ်မှုတစ်ခုဖြစ်ပြီး ပတ်စ်ပို့ပြုလုပ်မယ့်သူတွေအတွက် အခက်တွေစေတယ်လို့ ပတ်စ်ပို့ပြုလုပ်ဖို့ ကြိးစားနေသူတစ်ဦးက ပြောပါတယ်။
“တိုကင်ရထားတာက ၈ လပိုင်းပေါ့။ ဒီကြားထဲ စမတ်ကတ် ပြောင်းထားမှ ဆိုတော့ သေပြီပေါ့။သူတို့ လုပ်ပေးတုန်းက စစ်မှုထမ်းဖို့ အချက်အလက် ယူတယ်ဆိုလို့ မလုပ်ထားရဘူး။ အခုတော့ ချည်တုတ်ပြီး ရိုက်သလိုပဲ။ လုပ်တော့လည်း စစ်မှုထမ်းဖို့ အချက်အလက်ဝင်မယ်။ မလုပ်တော့လည်း ပတ်စ်ပိုစ့်မရရင် ထွက်ပြေးလို့ မရဘူး” လို့ သူကပြောပါတယ်။
စစ်ကောင်စီတပ်ဟာ မတ်လ အစပိုင်းကတည်းက တောင်ကြီးမြို့ ရပ်ကွက်အားလုံး နီးပါးမှာ လူငယ်တွေကို စမတ်ကတ် ပြောင်းလဲဖို့ အစည်းအဝေး ခေါ်ယူခဲ့ပြီး ရောက်ရှိလာတဲ့အချိန်မှာ စစ်မှုထမ်းဥပဒေကိုပါ ဆွေးနွေးတာတွေ ပြုလုပ်ခဲ့ပါတယ်။
တောင်ကြီးမြို့မှာ မှတ်ပုံတင်ကို စမတ်ကတ်ပြောင်းလဲဖို့အတွက် ဒေသအာဏာပိုင်တွေက အတင်းတွန်းအားပေးနေပြီး ဒီလိုတွန်းအားပေးတာဟာ စစ်မှုထမ်းဥပဒေအတွက် အချက်လိုချင်တာကြောင့်လို့လည်း မြို့ခံတွေက ယူဆနေပါတယ်။
ပြည်ပထွက်ခွါမယ့် လူငယ် တစ်ဦးက “တိုကင်တော့ မမီလိုက်ဘူး။ သူတို့က ဒီလိုလုပ်မှ ပတ်စ်ပိုစ့်ပေးမယ် ဆိုရင်လည်း မလုပ်ဘူးပေါ့။ အောက်လမ်းကနေပဲ ကူးမယ်။ စမတ်ကတ်လုပ်တာဟာ စစ်မှုထမ်းဖို့ အချက်အလက်ပေးတာ ဖြစ်တဲ့အတွက် ကျနော်ကတော့ လူငယ်အားလုံးကို မလုပ်စေချင်ဘူး” လို့ ပြောပါတယ်။
စစ်ကောင်စီ လက်အောက်ခံ လူဝင်မှုကြီးကြပ်ရေးနဲ့ ပြည်သူ့အင်အား ဦးစီးဌာန (လဝက)ရုံးဟာ စမတ်ကတ် လဲလှယ်ပေးတဲ့အချိန်မှာ မပါဝင်ခဲ့သူတွေကို နောက်ပိုင်း ရုံးမှာပြန်လုပ်ပေးခဲ့ပေမယ့် ငွေကြးအဆမတန်တောင်းခံမှုတွေ ကြုံနေရတာကြောင့် အခုမှ လုပ်မယ့် ပြည်သူတွေအတွက် အခက်အခဲတွေ ဖြစ်နေတယ်လို့ သိရပါတယ်။
နိုင်ငံသားတွေရဲ့ အချက်အလက်တွေကို ဒီဂျစ်တယ်စနစ်ထဲထည့်သွင်းပြီး Smart Card ထုတ်ပေးမယ့် အစီအစဉ်ကို အာဏာသိမ်းစစ်တပ်က တွန်းအားပေးအကောင်အထည်ဖော်နေတာ ဖြစ်ပြီး အဲဒီစနစ်ကို UID (Unique ID or Unique Identification Number) လို့ အမည်ပေးထားပါတယ်။
UID စနစ်မှာ မှတ်ပုံတင်၊ ဖုန်းနံပတ်၊ ဘဏ်အကောင့်၊ ကိုယ်ရေးအချက်အလက်၊ ဆွေးမျိုးစဉ်ဆက်၊ နေရပ်လိပ်စာအပါအဝင် အချက်အလက်တွေအကုန်လုံးကို ချိတ်ဆက်သွားမှာဖြစ်ပြီး ဒီလိုစနစ်မျိုးဟာ နိုင်ငံတိုးတက်ရေးအတွက် အရေးပါပေမယ့် စစ်အာဏာရှင်လက်ထက်မှာတော့ သူ့ကိုဆန့်ကျင်တဲ့သူတွေကို ဖိနှိပ်ဖို့သက်သက်သာဖြစ်တယ် လေ့လာသုံးသပ်သူတွေက ယူဆထားပါတယ်။
CJ – 007
ပုံ – တောင်ကြီးမြို့ရှိနိုင်ငံကူးလက်မှတ်ထုတ်ပေးရေးရုံးတွင် တိုကင်တန်းစီနေစဉ်
